“Na Vunau kei na Veiyalayalati: Raici Vakararaba,” Me iSakisaki ni iTabagone, Janu. 2021, 14–15.
Lako Mai, Mo Muri Au
Na Vunau kei na Veiyalayalati: Raici Vakararaba
Joseph and Sydney mai vei Annie Henrie Nader
Na cava beka?
Na Vunau kei na Veiyalayalati e dua na ivakasokumuni ni ivakatakila ni gauna oqo mai vua na Kalou a ciqomi vakalevu cake mai vua na parofita o Josefa Simici. E vuqa vei ira na ivakatakila oqo a soli mai me isau ni taro a kerea vua na Kalou o Josefa kei ira eso tale na lewe ni Lotu taumada.
Na cava a caka kina na Vunau kei na Veiyalayalati?
Ena gauna e liu ni Lotu, e vica walega na ilavelave a volai ni ivakatakila oqo. Ena 1831, era sa lewa na iliuliu ni Lotu me ra tabaka na ivakatakila ena dua na iVola ni iVakaro. Ena dua na koniferedi ni Noveba 1831 ka veivosakitaki kina na iVola ni iVakaro, a ciqoma kina o Josefa na ivakatakila ka sa tiko oqo ena wase 1, na ikau ni Vunau kei na Veiyalayalati.
Na iVunau
Na imatai ni vakasokumuni ni ivakatakila e vakatokai me iVola ni iVakaro. E muri qai vakatokai na iVunau kei na Veiyalayalati baleta ni ra sa vakuria e vica vata na ivakavuvuli “ena ivunau ni Lotu,” e kilai me “ivunau” me lekaleka (ena gauna oqo sa vakatokai na (Lectures on Faith [iVakavuvuli ena Vakabauta]). Me tekivu mai na itabataba ena 1921, sa sega tale ni wili kina na Lectures on Faith [iVakavuvuli ena Vakabauta], ia na ulutaga na Vunau kei na Veiyalayalati a dei tikoga.1
Na Veiyalayalati
Na vo ni ivola e tu kina na ivakatakila e soli vei Josefa Simici. Na iwasewase oqo e kilai me “veiyalayalati kei na ivakaro ni Turaga” se “veiyalayalati” me lekaleka. Era a vakayagataka na Yalododonu taumada na “veiyalayalati” se “ivakaro” me baleta na ivakatakila eso oqo a ciqoma na Parofita me vakaduiduitaki ira mai na volavola tale eso nei Josefa Simici, me vaka na ivunau vakauqeti kei na nona ivakavakadewa ni iVolatabu.2
Na cava e bibi kina nikua na Vunau kei na Veiyalayalati?
Na Vunau kei na Veiyalayalati e lewena tu na ivakatakila mai vei Jisu Karisito vei ira na nona tamata. E vakatavulici keda ni kilai keda yadua na Kalou ena yacada, ni dau rogoca o Koya na noda masu ka sauma na noda taro, ka ni se vosa tikoga na Kalou nikua. E vakavulica talega na ivunau yaga me baleta na yavu ni veivakabulai ka solia vei keda na ikuri ni rai ki na Veisorovaki i Jisu Karisito. E vakarautaka na vakacegu ena nona vakaraitaka na nona lomani keda na Kalou ka kacivi keda me da lako mai Vua ena gauna mada ga eda caka cala kina.