Kenning og sáttmálar: Yfirlit

Eftir Annelise Gardiner

Kirkjutímaritin

Ljósmynd

Ljósmynd

Joseph Smith og Sidney Rigdon

Joseph og Sydney, eftir Annie Henrie Nader

Hvað er hún?

Kenning og sáttmálar er safn nútíma opinberana Guðs, aðallega veittar spámanninum Joseph Smith. Margar opinberanirnar bárust sem svar við spurningum frá Joseph og annarra fyrritíðar meðlima kirkjunnar til Guðs.

Hvers vegna var Kenning og sáttmálar búin til?

Á fyrri tíma kirkjunnar voru aðeins til örfá handskrifuð eintök þessara opinberana. Árið 1831 ákváðu kirkjuleiðtogar að prenta og gefa út opinberanirnar í Boðorðabók. Á ráðstefnu í nóvember 1831, þar sem Boðorðabókin var til umræðu, barst Joseph opinberunin sem er nú 1. kaflinn, sem formála að Kenningu og sáttmálum.

Tímaröð:

1823 Fyrsta opinberunin skrásett: Kafli 2.
1833 Boðorðabókin var gefin út. Fá eintök varðveittust eftir að æstur múgur gerði atlögu að prentsmiðjunni. Tveir unglingar, Mary Elizabeth og Caroline Amelia Rollins, björguðu eins mörgum blaðsíðum og þær gátu og földu þær frá múgnum á maís-akri.
1835 Fyrsta stærra prentaða upplagið. Það innihélt fleiri opinberanir og nafninu var breytt í Kenning og sáttmálar.
1844 Þessi útgáfa var prentuð stuttu eftir píslarvættisdauða Josephs Smith, með fleiri opinberunum og kafla 135.
1847 Brigham Young hlaut leiðbeiningar um hvernig flytja skyldi hina heilögu vestur: Kafli 136.
1876 Í þessari útgáfu var bætt við 26 nýjum köflum og í henni var hverjum kafla skipt upp í vers.
1890 Wilford Woodruff gefur út yfirlýsinguna sem batt enda á fjölkvæni í kirkjunni (sjá Opinber yfirlýsing–1).
1918 Joseph F. Smith miðlar sýn sinni um andaheiminn: Kafli 138.
1921 Í þessari og síðari útgáfum voru Lectures on Faith [Fyrirlestrar um trú] ekki lengur hafðir með.
1978 Spencer W. Kimball hlýtur opinberunina um prestdæmið sem varð Opinber yfirlýsing–2.
1981 Í þessari útgáfu voru fyrirsagnir staðlaðar og gagntilvísunum bætt við, ásamt nokkrum opinberunum.
2013 Í þessari útgáfu voru sögutengdar upplýsingar uppfærðar í fyrirsögnum.

Kenningin

Fyrsta safn opinberana nefndist Boðorðabókin. Síðari söfn nefndust Kenning og sáttmálar, því í þeim var bætt við trúarpistlum „um kenningu kirkjunnar,“ stytt sem „kenningin“ (ber nú heitið Lectures of Faith [Fyrirlestrar um trú]). Í útgáfunni 1921 og síðar voru Fyrirlestrar um trú ekki hafðir með, en heitið Kenning og sáttmálar var áfram hið sama.¹

Sáttmálar

Það sem eftir var bókarinnar voru opinberanir gefnar Joseph Smith. Þessi hluti var þekktur sem „Sáttmálar og boðorð Drottins,“ stytt sem „sáttmálar.“ Hinir heilögu fyrritíðar notuðu hugtökin „sáttmálar“ eða „boðorð“ til að vísa til þessara opinberana sem gefnar voru spámanninum, svo þeir gætu aðgreint þær frá öðrum ritum Josephs Smith, líkt og innblásnum prédikunum og þýðingu hans á Biblíunni.²

Hvers vegna er Kenning og sáttmálar mikilvæg á okkar tíma?

Kenning og sáttmálar hefur að geyma opinberanir Jesú Krists til fólks hans. Hún kennir okkur að Guð þekkir sérhvert okkar eftir nafni, hann hlustar á bænir okkar og svarar spurningum okkar, og að Guð talar enn á okkar tíma. Hún kennir líka verðmætar kenningar um sáluhjálparáætlunina og veitir frekari skilning á friðþægingu Jesú Krists. Hún veitir huggun með því að útskýra hvernig Guð elskar okkur og býður okkur enn að koma til sín, jafnvel þótt við gerum mistök.