“6 i le taeao. Faifeautalai,” Mo le Malosi o le Autalavou, Iun. 2021, 6–7.
Sau, Mulimuli Mai ia te A’u
6 i le taeao. Faifeautalai
Sa toeitiiti lava ou ta’uina atu i la’u uo le mafuaaga na ou taofia ai le feau mo le afiafi ae na tuu mai e le Agaga se uunaiga laitiiti mo au.
I le tuputupu a’e, sa ou manao lava e avea a’u ma se faifeautalai o le au paia. Sa ou iloa le taua o le faasoaina atu o le talalelei i tagata e le auai i la tatou faatuatuaga. Sa ou tatalo foi mo ni avanoa. Ae peitai, e leai se tasi o tagata ou te iloaina e le o ni tagata o Le Ekalesia a Iesu Keriso o le Au Paia o Aso e Gata Ai na fiafia mai. Na suia uma lena mea ina ua ou ulufale atu i le aoga maualuga ma feiloai ai ma Robbie.*
Na ma faauo ma Robbie i se faaaliga musika i le falefaafiafia o le alalafaga. Ina ua uma, sa ma fesootai pea lava pea ma tafafao i nisi taimi.
I se tasi afiafi sa ma faia ni feau tusitusia i luga o telefoni. Ona o le seminare i le vaveao o le taeao e sosoo ai, sa manaomia ai ona ou taofia ina ia ou alu e moe.
“Faafetai mo le talanoa, ae ou te usupo i le taeao!” Sa ou auina atu le savali.
“O le a le vave?” Le fesili a Robbie.
“5:30 i le taeao.” Sa ou tali atu ai. Sa ou le mautinoa pe tatau ona ou faamatalaina pe aisea, ae sa ou lagonaina se uunaiga laitiiti mai le Agaga e faasoa atu.
“E fai la’u seminare i le vaveao i le 6 i le taeao,” sa ou fai atu ai. “O se vasega i la’u Ekalesia matou te suesue ai tusitusiga paia ma aoao ai e uiga i le Atua a o lei amataina le aoga. Ou te lagona i taimi uma le fiafia pe a uma le vasega.”
Ona, ou toe lagonaina lea o le isi tama’i uunaiga: “E tatau ona e sau i se isi taimi,” o la’u tala lea.
Sa fiafia Robbie ina ua ou faamatalaina atu po o le a le seminare. “Ia, seki a! E mafai ona ou tietie atu i le uila iina. Atonu o le a ou alu atu taeao.”
I le taimi muamua, na ou faapea sa ula mai Robbie. Ae o le taeao na sosoo ai a o ma tietie atu ma lo’u tama i le paka o taavale ae le’i taina le 6 i le taeao, sa i ai iina Robbie o loo faatalitali i fafo o le falesa ma lana uila vilivae. Sa ou te’i.
O lena aso na aoao ai le matou vasega i malumalu a o matou suesueina le Feagaiga Tuai. Na maofa Robbie i le lesona atoa—sa fiafia o ia i ata uma ma aoao mai tamaiti aoga uma e uiga i auala e tuufaatasia ai e malumalu i tatou ma le Atua ma o tatou aiga.
Sa talia e le faiaoga ma isi tamaiti aoga ia Robbie e aunoa ma se lapataiga faapea o le a sau o ia. Na faaauau pea ona sau Robbie i le taimi atoa na totoe o le tausaga aoga. Sa sau foi o ia i nai gaoioiga a le autalavou. Sa ia faauo ma isi talavou i la’u uarota ma le siteki. I le faaiuga o le tausaga aoga, na sau ai Robbie i le faeasaite faaiu o le tausaga mo le seminare faatasi ma i matou.
O le tau mafanafana na sosoo ai sa siitia atu ai lo’u aiga i se isi uarota ese, ae ina ua toe amata le aoga, sa faaauau pea ona alu Robbie i le seminare, ma sa toe taliaina foi o ia e le vasega atoa.
E le’i auai Robbie i le Ekalesia, ae sa ia talanoa mai lava e uiga i lona aafiaga lelei ia te au pe a ma feiloai mulimuli ane.
O lo’u aafiaga i le valaauliaina o Robbie i le seminare na aoaoina ai a’u e faapea o le faasoaina atu o le talalelei e le na o le valaaulia o uo e feiloai ma faifeautalai. O le mea moni, atonu e le mafai lava ona latou auai i le Ekalesia. E mafai ona faigofie e pei o le faasoaina atu o mea o loo tutupu i lou olaga i le avea ai ma se tagata o le Ekalesia. Afai la latou te fiafia i ai, e mafai ona e valaaulia i latou e faataitai.
Afai o loo e sailia ni avanoa e faasoa atu ai le talalelei, taumafai e amata i le mea o loo e i ai ma mea o loo e faia. E matua tele lava auala faigofie e faailoa atu ai lou talitonuga ma le molimau e ala i le faasoaina atu o mea e te faia e latalata atili atu ai ia Keriso. Faalagolago i le Agaga ma o le a Ia fesoasoani e taiala oe.