“Malosi mai i o Tatou Matua,” Mo le Malosi o le Autalavou, Iuni. 2021, 18–19.
Sau, Mulimuli Mai ia te A’u
Malosi mai i o Tatou Matua
O nisi taimi e na o sina vaaiga itiiti lava mai se isi tagata e fesoasoani ia i tatou ia loto faafetai ai mo mea ua tatou maua.
O le avea ma talavou e le faigofie i taimi uma. Ma talitonu i ai pe leai, o le avea ma se matua o se talavou e le sili atu le faigofie. Ae o la tatou sootaga ma o tatou matua e faapitoa, ma afai e te galue i ai, e mafai ona avea lena sootaga ma se faamanuiaga sili i lou olaga.
O ni nai faataitaiga nei o ni lagona o nisi o taitai o le Ekalesia e uiga i le sootaga sa latou faia ma o latou matua.
Peresitene Russell M. Nelson
Peresitene o le Ekalesia
“Sa ou faamemelo i o’u matua. O i la’ua o mea uma ia te a’u ma na ou aoaoina mai ai ni lesona taua tele. E le lava lo’u faafetai ia i laua mo le olaga fiafia i le aiga sa la’ua fatuina mo a’u ma nai o’u tei. Ae, e oo foi lava a o o’u tamaitiiti, sa ou iloa lava sa ou misia se mea. I se tasi aso sa ou oso ai i se taavale la’u pasese ma alu i se … faletusi e sue se tusi e uiga i le Ekalesia. Sa ou fiafia lava e aoao e uiga i le talalelei.
“Ina ua oo ina ou malamalama i le Upu o le Poto, sa ou manao i ou matua ia ola i lena tulafono. O lea la, i se tasi aso a o ou talavou, sa ou alu ai i le matou fale pito i lalo ma ta’ei uma ai fagu malosi i luga o le fola sima! Sa ou faatalitali i lo’u tama na te faasalaina a’u, ae sa leai ma sana tala.
“Ina ua ou matua ma amata ona malamalama i le ofoofogia o le fuafuaga a le Tama Faalelagi, sa tele ina ou faapea ifo ia te a’u lava ia, “Ou te le toe fia manao lava i se isi meaalofa o le Kerisimasi! Ua na o lo’u manao lava ia faamauina i o’u matua.” Sa le’i tupu lea mea na leva ona ou moomoo i ai seia oo ina pasia e o’u matua lo la ta’i 80 tausaga, ona tupu loa lea. E le mafai ona ou faaalia atoa atu le olioli lea sa ou lagonaina i lena aso (tagai Alema 26:16), ma ou te lagonaina i aso taitasi lena olioli o le la faamauga ma lo’u faamau atu ia i laua.”1
Ata na tusia e Jarom Vogel
Peresitene Dallin H. Oaks
Fesoasoani Muamua i le Au Peresitene Sili
“O ou uiga faaalia i le tulafono o le sefuluai na faatulagaina e ala i faataitaiga ma upu a lou tina, na faaalia i se talanoaga ou te manatua mai lou talavou.
“Sa lagolagoina e lo’u tina nofofua lana fanau laiti e toatolu i se totogi faatauvaa o se faiaoga. Ina ua ou malamalama o loo matou ola e aunoa ma nisi o mea mananaia ona sa lei lava ni matou tupe, sa ou fesiligia lo’u tina pe aisea e faaalu ai le tele o lona totogi i le sefuluai. E le i galo lava ia te a’u lana faamatalaga: “Dallin, atonu o loo i ai nisi tagata e mafai ona ola e aunoa ma le totogiina o le sefuluai, ae tatou te le mafaia. Ua filifili le Alii e aveesea lou tama ae tuu mai ia te a’u e tausia outou. E le mafai ona ou faia lena mea e aunoa ma faamanuiaga a le Alii, ma ua ou mauaina na faamanuiaga e ala i le totogiina o se sefuluai faamaoni. A ou totogiina la’u sefuluai, ua ou maua le folafolaga a le Alii o le a Ia faamanuiaina i tatou, ma e tatou te manaomia na faamanuiaga ina ia tatou ola lelei.”2
Sister Michelle D. Craig
Fesoasoani Muamua i le Au Peresitene Aoao o Tamaitai Talavou
“A o ou laitiiti, sa siitia atu lo’u aiga i le isi itu o le atunuu. Faatasi ai ma le fesoasoani a isi, sa matou faaaluina se aso e uta ai mea uma i se taavale toso lapoa lea o le a toso e lou tama i tua atu o la matou taavale. O le taeao sa tatau ona matou o ese atu ai, sa ou tei i lou ala i luga ma le iloaina o le matou malaga na tolopo i ni nai aso. Sa ala lou tama i le vaeluaga o le po ma se lagona malosi e le tatau ona ia tosoina le taavale toso. Nai lo le fetuunaia o le uunaiga, sa mulimuli lo’u tama i le uunaiga ma faatuai ai lo matou siitia ese atu. Nai lo lena, sa ia faafaigaluegaina se tagata totogi e lauina uta lea na tuuina uma a matou meatotino i se tasi o a latou loli.
“Ina ua matou tuua mulimuli ane, sa matou fetaiai ma matagi malolosi ma loli ma taavale toso na mafuli i luga o le ala. Sa faafetai lo matou aiga mo lo matou saogalemu. E aunoa ma ni upu, sa aoaoina au e lo’u tama ina ia maua le lototele e mulimuli ai i uunaiga mai le Agaga, e tusa lava pe le talafeagai na uunaiga, e tusa lava pe atonu latou te le malamalama i ai. E le’i galo lava ia te au lena lesona.”
Elder Quentin L. Cook
O Le Korama a Aposetolo e Toasefululua
“Sa i ai i lou tama ni tulafono se tolu. Muamua, e tatau ona i ai ni a matou sini aoga. Lona lua, e mafai ona sui a matou sini i soo se taimi. Ae o le lona tolu, po o le a lava le sini sa matou filifilia, e tatau ona matou galulue maelega i ai.”
Sa ia fai mai foi, “E tele mea e ofoina mai e tagata ia i tatou pe afai tatou te naunau e aoao mai ia i latou. O le mafuaaga lena e taua ai le siomia o oe lava i tagata lelei.”3