“O le Faauo na Faia le Eseesega,” Mo le Malosi o le Autalavou, Iuni 2021, 8 – 9.
Sau, Mulimuli Mai ia te A’u
O leFaauo na Faia le Eseesega
O lo’u liua na alu ai le ono tausaga. Ana faapea e le’i iai ia te a’u ni uo lelei, semanu ou te le auai lava.
O au o se tagata liliu mai. Ae e ono tausaga faatoa o’u auai i Le Ekalesia a Iesu Keriso o le Au Paia o Aso e Gata Ai.
O se tasi o mafuaaga o le taimi a’o tuputupu a’e, e le’i i ai so’u manatu lelei e uiga i le Ekalesia. Afai na e faitau i mea sa ou faitau i ai i la’u tusi aoga a o 12 ou tausaga, atonu e te faapena foi. O mea sa fai mai ai sa matuai le manaia lava. Ma talu ai ou te le’i feiloai lava i se Au Paia o Aso e Gata Ai, sa ou taliaina ai mea sa ou faitauina e moni.
Sa ou ola a’e i Kenetaki, ISA. O le nofoaga na ou nofo ai, sa toalaiti lava tagata o le Ekalesia. O lea sa ou ofo ai ina ua siitia atu le aiga o Martinez i lo matou pitonuu ina ua 13 o’u tausaga.
Sa fiafia tagata uma ia i latou. Sa agalelei ma faigofie ona faamasani i ai. E to’aono le la fanau—lea na foliga mai e toatele! Ma sa i ai lo la’ua atalii o la’u tupulaga lea sa vave ona avea ma a’u uo mamae.
O le mea moni lava, ou te manatu o ia o se uo sili i tagata uma. Sa i ai se malamalama e uiga ia Mateo lea na faalatalata atu ai tagata ia te ia. E ui lava na ou manatu sa fai si ese itiiti o lana lotu, ae na vave lava ona le faalavelave lena mea ia te a’u ona o la ma faauoga.
Feiloai i isi Tagata Lotu
I ni nai tausaga mulimuli ane, sa ma ulufale atu ai ma Mateo i le aoga maualuga. O le taimi lena na ou feiloai ai i isi tagata o le Ekalesia. Sa i ai ni nai tagata i la matou aoga, ma isi i le nuu. I le aluga o taimi, latou te talanoa i o latou olaga ma talanoa mai i le Ekalesia i se tulaga masani. Na iu lava ina amata ona ou alu i gaoioiga a le Ekalesia, taaalo pasiketipolo ma isi talavou, ma sa ou alu foi i le seminare i le taeao po mo ni nai vaiaso.
Sa i ai le tele o a’u uo lelei o e sa filifili e mulimuli i tulaga faatonuina lelei, ae sa i ai se mea faapitoa e uiga i a’u uo o le Au Paia o Aso e Gata Ai. Ioe, na latou le inu pia pe ulaula pe faia ni fualaau faasaina. Ma e ui o nisi o a’u uo na aafia faaletino ma a latou uo tama po o uo teine, o nei uo e le’i faapena. Ae sa sili atu foi nai lo lena. Sa i ai se malamalama e uiga ia i latou sa atoatoa lelei. Latou te le’i faamalosia lava le talalelei ia te au—na ona latou ola ai lava. Pe a oo i le taimi sa’o, latou te faasoa mai ni mea laiti ia te au.
Ma o le aiga o Martinez sa masani ona faamaoni ma limafoai. Sa talia a’u i lo latou fale i soo se taimi. Ma sa matala foi i taimi uma lo latou umukuka!
Sa ou Tauivi Pea.
Ae, sa fai lava si o’u tumau i la’u lotu, ma ou manatu pea o nisi o mea sa talitonu i ai Mateo sa ese lava. Sa i ai foi so’u uiga malosi patino. E ui lava ina tele ona ou ola i tulaga faatonuina o le Ekalesia, ae ou te le’i manao e ta’u mai e se tagata ia te au po o le a lo’u tulaga faatonuina e tatau ona i ai.
I le taimi lava lea e tasi, sa ou lagona ai le le mautonu faaleagaga. Ou te manatu e mafai ona tupu lena mea pe a e lagona le latalata atu i le malamalama ma le lelei o le talalelei ae tulei esea. E ui sa ou talitonu i le Atua, ae sa ou tauivi e talia faapea o le Atua e mafai pe o le a iai sona aafiaga tele i lo’u olaga. Ae peitai, sa ou latalata atu i le malamalama o le talalelei i isi tagata.
Atonu o le mafuaaga lena na ou filifili ai e faatasi i a’u uo i se aoga a le Ekalesia a o 18 ou tausaga. Sa matou auai i le Iunivesite o Polika Iaga i Provo, Iuta, ISA, lea na ou feiloai ai i nisi o tagata o le Ekalesia. Tagata lelei. Tagata Agalelei. E faatumulia i le malamalama, e pei lava ua toe i ai i le aiga. Ma ou te le’i auai lava i le Ekalesia.
O le Mea na Iu Lava ina Faia le Eseesega
Ina ua mavae lena tausaga muamua i le aoga, sa leai sa’u tupe ma toe foi atu i Kentucky e nonofo ma lo’u tama. Sa 19 ou tausaga, ma na amata ona malaga uma a’u uo e fai ni misiona pe sa i ai pea i Iuta.
Ae o le mea ofoofogia o le tuuina mai lea e le Atua isi tagata ofoofogia i lo’u olaga. O le aiga o Martinez sa nonofo latalata ane ma valaaulia a’u i totonu o lo latou fale i soo se taimi lava ou te manao ai. Ma sa ou iloa ai o loo i ai isi Au Paia o Aso e Gata Ai o lo’u vaitausaga sa nonofo lata mai foi. Sa latou tutu uma lava faatasi ma au a o ou tauivi ma ou talitonuga.
Sa leai se tasi na faamalosia au. Sa leai se tasi faalavelave ia te au. Sa na o lo latou amio lelei lava ia te a’u.
Mulimuli ane, ina ua mavae tausaga uumi e ono, sa amata ona ou suesue faatasi ma faifeautalai. Sa tele ni fesili loloto, ae faatasi ai ma le agalelei ma le faamalosiauga a uo, sa iu ai ina ou saunia e tatala lo’u loto, suesue ma tatalo e uiga i le Tusi a Mamona, iloa le Agaga, ma talia le papatisoga.
Mai mea uma sa fesoasoani ia te au i la’u malaga, masalo o le mea aupito sili lea ona taua o le onosai, lagolago agalelei a isi tagata.