Fesili ma Tali

“E faigata ia te au ona lelei ma o’u matua. E mafai faapefea ona ou faaleleia lo matou va?”

“O sootaga e alu ai le taimi. Taimi e faatasitasi ai. … Taimi e talisapaia ai e le tasi ma le isi mea e fiafia ma luitau ai. Taimi e talanoa sa’o ai ma faamaoni le tasi ma le isi a o tatou tauivi ia sili atu ona lelei faatasi.”

Douglas D. Holmes, o le sa avea muamua ma Fesoasoani Muamua i le Au Peresitene Aoao o Alii Talavou, konafesi aoao Ape. 2020 (Ensign po o le Liahona, Me 2020, 23).

Amata Laitiiti ma Faigofie

“Faailoa atu lou alofa ia i latou e ala i faatinoga. Tatalo faatasi i taimi o taumafataga. Fesoasoani ia i latou i feau. Tatalo mo i latou. O o tatou matua o le a avea pea ma o tatou matua, ma o le a avea pea i tatou ma a latou fanau. Aoao e faaaloalo ia i latou ma ia usiusitai. E le o tuai lava ona faaleleia la outou mafutaga ma i laua.”

Nikki F., 20, Mindanao, Filipaina

Ia Agalelei

“Taumafai ia iloa mea e fiafia i ai ou matua. O se tasi mea e aoga mo au o le faia o se po o taaloga a le aiga. Afai e te taumafai ia sili atu laitiiti ona agalelei, ma sili atu le faalogo soo, o le a mafai ona e toe faaleleia ia sootaga.”

William S., 12 tausaga, Virginia, ISA

Faataitai Faatasi ni Mea Fou

“O le a ou taumafai e saili ni mea ou te tutusa ai ma ou matua, e pei o musika, taaloga, po o kuka, ona vaai lea mo ni avanoa e fai faatasi ai na mea. E mafai foi ona avea o se mea malie le faataitai o mea e fai ma fiafia i ai le tasi ma le isi.”

Eva D., 16, Uelese, Malo Aufaatasi

Faalogo

“O se mea e mafai ona e faia o le faalogo i fautuaga a ou matua ma usitai i a la tulafono. O nisi taimi atonu tatou te mafaufau ai e sa’o i tatou, ae o le fautuaga a o tatou matua e mafai ona aogā i le taimi mulimuli. O se tasi foi lea o Poloaiga e Sefulu o le “ia e ava i lou tama ma lou tina” (Esoto 20:12). Tatou te ola latalata atili atu i lo tatou Tama Faalelagi ma o tatou matua e ala i le usiusitai i lenei poloaiga.”

Seth S., 14, Oregon, ISA

Suesuega Faaleaiga o Tusitusiga Paia

“E mafai ona faaleleia atili e ala i mea faigofie e pei o tatalo faaleaiga ma le suesueina o le Sau, Mulimuli Mai ia te A’u faatasi. O lenei faiga o le a sili atu ai lo outou lotogatasi ma o le a outou lagonaina ai le mafutaga a le Agaga. A o outou aoao faatasi, o le a faamalosia ia sootaga faaleaiga. O le a e mauaina se molimau e faapea, e faavavau ma taua aiga.”

Fatima S., 16, Piura, Peru

Faatino i luga o le Alofa

“E le o se manatu leaga le faia o ni feau e aunoa ma le ta’uina atu ia te oe e fai. Afai e i ai se mea ua le fiafia ai ou matua, e pei o le faaaluina tele o le taimi i se masini eletonika. Ia la iloa e te popole i lo la manatu e ala i le taumafai e faatapulaa le taimi i luga o le masini. Faaali atu ia i laua e te popole e ala i le faaaluina o le taimi faatasi ma i laua. O le a faatuatuaina tele oe e ou matua ma o le a sili atu ona lelei le tou sootaga ma i laua.”

Justice C., 18, Iuta, ISA

O tali ua faamoemoe e mo le fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Le A Sou Manatu?

Ou te le lagonaina se mea ao ou tatalo. E mafai faapefea ona ou faia au tatalo ia sili atu le taua?

Auina mai lau tali ma le ata ae lei oo i le aso 15 o Iulai, 2021.

Alu i le ftsoy. ChurchofJesusChrist.org, kiliki i le “Submit Your Work.” Saini e alu i totonu i lau Faitotoa a le Ekalesia ona filifili lea o le “For the Strength of Youth” i lalo o le “Choose Magazine.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila. Pe imeli mai ia i matou i le [e-mail].

E ono faapupuuina ia tali mo le uumi po o le manino.