“Aua Lava Nei Mou Atu Le Faatuatua!” Mo le Malosi o le Autalavou, Iun. 2021, 14–17.
Aua Lava nei Mou Atu le Faatuatua!
I le avea ai ma se tagata sulufai, sa aoaoina e Muriel mo ia lava o loo i ai pea le Atua iina, pe a sili atu ona e manaomia o Ia.
Ata na pueina e Cody Bell, vagana ua faamatalaina
Mai i lea taimi i lea taimi, e mafai lava ona foliga mai e pei o loo masofa le lalolagi atoa o siomia oe.
Ona mumu lea o le afi.
I se afā.
O nisi taimi e mafai ona lagona ai o le olaga ua le mautonu ma faavaivai loto lea e te ono mafaufau ai pe o le a toe sa’o ea le faalogona i se taimi.
O Muriel B., o le na faaaluina se taimi i le tolauapiga a tagata sulufai a o laitiiti, e i ai se mea e fia ta’u atu e uiga i le oo atu i ni tulaga faigata: “Ia faatumauina le Atua i ou tafatafa i taimi uma ma aua lava nei mou atu le faatuatua. O taimi leaga ua na o sina taimi le tumau lava!”
O se tasi lenei o tagata e iloa se mea pe lua e uiga i taimi leaga.
Ma ua ia iloa le auala e sao mai ai.
Taua ma le Saogalemu
Na amata lava le olaga o Muriel i se tulaga masani. Sa o se teineitiiti i le Ripapelika Temokarasi o Congo. Sa ia te ia se aiga fiafia, o se aiga saogalemu ma le mafanafana, o se moega mafanafana, ma le tele o meaai.
Ona amata lea o le taua.
Ina ua mavae lena, na faasolo ina leaga vave mea uma. O lona taimi sili ona leaga ina ua toso e tagata feita lona tama agaalofa—“le Kerisiano aupito malosi ua ou iloa”—ese mai le aiga i le faafefeina lea i le fana.
O le mea e faafetai ai, sa toe faatasia lona tama ma i latou mulimuli ane. Ae ua le toe saogalemu le olaga mo Muriel po o lona aiga. Sa latou sosola atu i se tolauapiga a tagata sulufai i Uganda.
Sa lima tausaga o Muriel i le taimi na sosola ai lona aiga i se tolauapiga a tagata sulufai i Uganda.
Ata mai faaaloaloga o Muriel B.
O tolauapiga a tagata sulufai o nofoaga le tumau mo tagata e faamalosia e tuua o latou aiga ona o le taua po o isi mafuaaga. E tatau ona latou ofoina atu le saogalemu, ma o le mea lea sa faia lava, ae o le olaga mo Muriel ma lona aiga o se mea sa mamao lava mai le faigofie.
Sao mai ma le Malosi
“Sa matou faafetai ona ua matou o ese mai le taua,” o le tala lea a Muriel. “Ma o tagata na latou taulimaina le tolauapiga, sa latou faia le mea sili latou te mafaia e fesoasoani ia i matou, ae sa le lava ni mea.”
Sa le lava meaai, le lava fale, le lava ni vailaau—le lava soo se mea lava.
“Sa ūina i matou e iniseti i le po,” sa ia manatua. “Ma sa leai se matou meaai mo ni aso i se taimi. Sa tele foi ni faamai sa i ai i le tolauapiga.”
O le tolauapiga o nofoga a tagata sulufai i le asō.
Atapue mai le Getty Images
O Muriel ma lona aiga sa le’o ni tagata O Le Ekalesia a Iesu Keriso o le Au Paia o Aso e Gata Ai i lea taimi, ae sa tuuto ma faatinoina le faaKerisiano. Sa ia i latou se faatuatua mausali i le Atua ma Lona Alo, o Iesu Keriso. “Sa faimai pea o’u matua e mafai ona ou tatalo i taimi uma ma anapogi.”
Ma o le mea lena sa ia faia. A o teineitiiti i se tolauapiga a tagata sulufai, i se vaitau ua a’oa’o ai le toatele o tamaiti e faitau ma tusitusi, sa tatalo ai Muriel i aso uma ina ia sao mai. Sa tatalo o ia mo meaai. Sa tatalo o ia mo le saogalemu. Sa tatalo o ia mo le malosi ma le lototele e faaauau ai pea.
Ma sa ia vaaia le faia e le Atua o vavega i o latou olaga.
“Na aveese i matou e le Atua mai le taua,” na ia fai mai ai, “o lea na ou iloa ai e mafai ona ou faatuatuaina o Ia. Soo se taimi lava e sili ona matou manaomia ai o Ia, e pei o le taimi na leai ai se matou meaai mo se taimi umi lava, sa Ia faamanuiaina pea lava i matou. Sa Ia faia ni vavega laiti na atiae ai lou faatuatua ia te Ia.”
E ala i le fesoasoani e tausia nai ona tei laiti, ua tele nei ni tomai a Muriel e faaaoga a’o ia tausia lana lava tama.
I le mavae ai o le toeitiiti lua tausaga i le tolauapiga a tagata sulufai, na toe liliu ai lona olaga. Sa siitia atu Muriel ma lona aiga atoa i le Iunaite Setete e amata se olaga fou i se nuu fou. Mo mea uma sa ia vaaia ma ola ai, sa na o le valu lava tausaga le matua o Muriel.
O le taimi lena na filifili ai ona matua e saili se lotu fou e auai.
Faatuatua ma Uo
“Sa mananao i taimi uma lo’u Tina ma lo’u Tama e tapuai i le Atua ma avatu le faafetai ia te Ia,” o le tala lea a Muriel. “I se tasi Aso Sa, e lei leva ona matou taunuu i le Iunaite Setete, sa la fai mai, ‘Ta o e saili se lotu. ”
Sa lei mamao atu le la sailiga. A o savavali solo i le taulaga sa la tau atu i ni faifeautalai se toalua O Le Ekalesia a Iesu Keriso o le Au Paia o Aso e Gata Ai i luga o le auala.
E le’i umi, ae papatisoina Muriel faatasi ma ona matua. Sa papatisoina ia tei laiti o Muriel i le taimi na lava ai lo latou matutua.
O Muriel ma lona tina ma lona tei laitiiti.
O le tele o mea sa ia a’oa’oina i le lotu na masani ai Muriel, o le sa a’oa’oina e uiga i le Atua ma Iesu Keriso i lona olaga atoa. O isi autu sa fou. “Ou te lei faalogo lava ia Iosefa Samita po o Polika Iaga po o le Tusi a Mamona,” o lana tala lea.
E le na o le pau ia o mea fou. Sa i ai se aganuu fou atoa e a’oa’o. O iinei, e faia ai e tagata o le Ekalesia se eseesega tele. Sa latou a’oa’oina le aiga i auala e faaaoga ai nisi o masini eletonika ma meafaigaluega sa ese mai le aiga muamua. Sa latou fesoasoani i le gagana. O le mea sili lava sa latou fesoasoani ai o le avea lava ma ni uo.
Fesoasoani ma le Faamoemoe
Ua uunaia e Muriel le autalavou i le aso e fai le mea lava lea e tasi. “E manaomia foi e tagata sulufai ni uo. E lei i ai ni uo a lo matou aiga ina ua matou o mai i lenei atunuu, ae o le taimi lava na matou auai i le Ekalesia, sa toatele tagata sa asiasi mai ia i matou! I le taimi nei ua toatele a matou uo.”
I le aluga o tausaga, sa mafai ai e Muriel ona fesoasoani e auauna atu i na lava uo o e na faamanuiaina lona olaga i aso ua mavae.
Ina ua ulufale atu o ia i Tamaitai Talavou, sa auauna atu Muriel i au peresitene o vasega ma fesoasoani i ituaiga uma o gaoioiga a le autalavou. Sa ia auauna atu ma a’oa’o atu ma faasoa atu lana molimau.
E ala atu i le faatuatua i le talalelei, o loo faaauau pea ona maua e Muriel ma lona aiga le faamoemoe e oo lava i faigata o le olaga.
Ae o se tasi o auala sili o loo ia faaauau ai pea ona fesoasoani i ana uo o le tuuina atu o lona malosi i le talalelei ma lona faatuatua i le Atua.
“O loo tauivi nisi o a’u uo e saili le faamoemoe i le taimi nei lava,” o lana tala lea. “Ae ou te ta’u atu pea ia i latou, e leai se mea leaga e faavavau. Mo a’u, ou te lagona e leai se mea e le mafai ona fai e le Atua mo oe.
“O nisi taimi pau le mea e mafai ona ou tatalo ai ia maua le lototoa ina ia tumau ai pea. E tulei ai pea. Sa fesoasoani mai pea le Atua ia te au ia maua lea lototele. Mo le vaega sili lava, o le faamanuiaga o le lototele e tumau ai le tulei agai i luma pau lena o le mea e te manaomia moni lava.”