“Mauaina o le Malosi e Faamagalo Ai,” Mo le Malosi o le Autalavou, Iuni 2021, 10–11.
Sau, Mulimuli Mai ia te A’u
Mauaina o le Malosi e FaamagaloAi
Ua poloaiina i tatou e le Alii ia faamagalo atu i isi. O le a Ia fesoasoani mai ia i tatou e tausi Ana poloaiga, e aofia ai lenei.
Ata na tusia e James Madsen
Pe foliga mai e faigata atu ona tausia nisi poloaiga nai lo o isi?
O le tasi lenei e faafefeina le tele o tagata: “O A’u, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma” (Mataupu Faavae ma Feagaiga 64:10).
Faatali. E tatau ona tatou faamagalo atu i tagata uma na faia mea sese ia i tatou? E mafai lena mea?!
O se tasi o mea o le faamagalo o se tagata mo le fai atu o se mea le faaaloalo ia te oe pe mo le aveina o le falaoa mulimuli o loo i luga o le laulau ai. Ae faapefea ia manu’a loloto? Na soligatulafono matuia e mafai ona faalavelaveina pe suia ai le ala o o tatou olaga?
O nisi taimi o le mafaia ona faamagalo se tasi na matuai faatiga ia i tatou e mafai ona pei tatou te le mafaia.
O le tala fiafia lenei: Faatasi ai ma le fesoasoani a Iesu Keriso, e le faatapulaaina lava i tatou i mea e mafai ona tatou faia na o i tatou lava.
O Le Fesoasoani Sa Ia Manaomia
O se Kerisiano tuuto mai Netalani e igoa ia Corrie Ten Boom na iloa e ia lava ia le mana o le ole atu i le Atua e fesoasoani ia te ia e faamagalo se tagata.
O ia ma lona uso o Betsy na faafalepuipuiina i tolauapiga i le taimi o le Taua Lona II a le Lalolagi. Sa onosaia e Corrie ma isi sauaga matautia mai leoleo o le falepuipui Nazi. Na oo ina maliu lona uso o Betsy o se taunuuga o lena sauaga. Sa sao mai Corrie.
Ina ua mavae le taua, sa maua e Corrie le mana faamalolo o le faamagaloga o isi. Sa masani ona ia faasoa atu lana savali i nofoaga faitele. Ae i se tasi aso, na tuuina atu ai ana upu i le suega mulimuli.
I le mae’a ai o se tautalaga faalauaitele, sa oo atu ai ia Corrie se tasi o leoleo sa sili ona saua o le falepuipui mai tolauapiga.
Sa ia ta’u atu ia Corrie o lea ua avea o ia ma Kerisiano talu mai le taua ma ua salamo i mea matautia na ia faia o se leoleo o le falepuipui.
Na ia faaloaloa atu lona lima ma fesili atu, “Pe o le a e faamagalo mai ia te au?”
E ui lava i mea uma sa ia aoaoina ma faasoa mai e uiga i le faamagalo atu o isi, ae sa le mafai e Corrie ona talia le lima o lenei alii faapitoa ma faamagalo ia te ia—e le mafai nao ia, i soo se ala.
Na ia tusia mulimuli ane, “E oo lava i mafaufauga ita ma le tauimasui sa pupuna a’e ia te a’u, sa ou vaaia ai le agasala ia i latou. … Le Alii e, Iesu, na ou tatalo ai, faamagalo mai a’u ma fesoasoani mai ia ou faamagalo ia te ia.
“Sa ou taumafai e ataata, [ma] sa ou tauivi e sii a’e lo’u lima. Sa ou le mafaia. E leai se mea na ou lagonaina, leai ma sina fasi lagona o le mafanafana po o le alofamama. Ma o lea na ou toe faia ai se tatalo le leoa. Iesu, e le mafai ona ou faamagalo ia te ia. Aumai ia te a’u Lau faamagaloga.
“A o o’u tago atu i lona lima, sa faapea ona tupu se mea ofoofogia lava. Mai i lo’u tauau e faasolo atu i lo’u ogalima ma oo atu i lo’u lima na pei o se uila na sosolo atu mai ia te a’u ia te ia, ae o totonu o lo’u loto na oso a’e ai se alofa mo lenei tagata ese lea na toetoe lava a lofituina ai a’u.
“Ma o lea na ou iloa ai, e le o toe faalagolago le faamaloloina o le lalolagi i la tatou faamagaloga po o lo tatou amiolelei, ae o loo faalagolago ia te Ia. A Ia fetalai mai ia i tatou ia alolofa i o tatou fili, Na te aumaia, faatasi ma le poloaiga, o le alofa lava ia.”1
O loo i ai le Atua iina e fesoasoani ia te oe e tausia Ana poloaiga, e aofia ai le poloaiga e faamagalo atu—e tusa lava pe faigata. E mafai ona Ia fesoasoani ia te oe e pei foi ona Ia fesoasoani ia Corrie Ten Boom.
O Le Faamalologa e Te Agavaa I Ai
E faigata le olaga. E fesouaina. Ma e matuai tumu lava i tagata ua i ai le faitalia na tuuina mai e le Atua.
I na taimi pe a faia e se tasi se filifiliga e mafua ai ona e maua le tiga ogaoga—pe oo lava i se tulaga faafuasei—e mafai ona e maua le mana faamalolo a o e tatalo mo le fesoasoani ma taumafai e faamagalo atu.
O le faamagaloina o isi e aumaia ai le faamalologa i lou agaga. Faatasi ai ma le fesoasoani a le Atua, a o e faamagalo atu i se tasi sa sese ia te oe, ua e tuu ese se avega matautia mai ou tauau lena e mafai ona taofia mai oe. E tusa lava pe lagona le faigata o le ala i le faamalologa moni, faatasi ma le Atua, e le tatau lava ona e savali ai na o oe.