“Mauaina o Tali mai le Alii,” Mo le Malosi o le Autalavou, Iuni. 2021, 26–27.
Mauaina o Tali mai le Alii
O mea nei e tolu e manatua e fesoasoani ia te oe e maua ai tali i au tatalo.
Atatusi mai le Getty Images
Na i ai se taimi na e ole atu ai i le Atua i se fesili ma lagona ai e lei tali mai o Ia i lau tatalo? Ou te iloa na ou maua ai—ma sa faigata ona malamalama i le mafuaaga. Ae e le faapea ai e le o faafofoga mai le Atua. O le mea moni, e faafofoga mai o Ia ma tali mai ia tatou tatalo uma (tagai Mataio 7:7–8). O nisi taimi e na o le taimi lava e alu ai ma se galuega mo i tatou e malamalama ai i Ana tali.
O ni mataupu faavae nei e tolu e mafaufau i ai o le a fesoasoani ia te oe e maua ai tali mai le Alii ma iloa ai pe a oo mai.
1. Aua le Faanatinatia le Taimi a le Atua
Afai e te pei o au, e te le manao e faatali mo ni tali pe a i ai sau fesili. Ou te fiafia i le mafai ona liliu atu i le Google, Siri, po o le Alexa ma maua ai se tali vave.
Ae e le masani ona galue le Alii faapena. O nisi taimi e faatalitali o Ia seia tatou saunia. E oo foi i le Perofeta o Iosefa Samita na tele lava ina faatalitali mo tali i ana tatalo. I le 1833 o le toatele o tagata O Le Ekalesia a Iesu Keriso o le Au Paia o Aso e Gata Ai sa nonofo i le Itumalo o Jackson, Misuri, ISA. Ae peitai, ia Novema o lena tausaga, sa tutuliese ai i latou e tagata faatupu vevesi mai le itumalo. Sa popole Iosefa. Sa ia fesili atu i le Alii pe aisea na tupu ai. E lei tali atu le Alii i lena fesili i le taimi lava lena, ae na Ia faamafanafanaina Iosefa, i le faapea mai, “Ia filemu ma iloa o au o le Atua.”1 O le vaega o le tali na totoe na oo mai i le masina na sosoo ai (tagai Mataupu Faavae ma Feagaiga 101).
Pe a le tali maia au tatalo i le taimi lava lena, ou te maua le malosi mai le iloaina e oo lava i perofeta o nisi taimi e faatalitali ai. Afai tatou te faatuatua ma faalagolago i le taimi a le Alii e pei o Iosefa, o le a tali mai le Alii i a tatou tatalo i Lana lava taimi. Ma o nisi taimi atonu tatou te faatali ai mo se taimi umi lava.
2. Faaauau Pea le Galue
Sa aoao mai Peresitene Russell M. Nelson, “E fiafia le Alii i taumafaiga, ma o taumafaiga e aumaia taui.”2 Pe a e mafaufau i ai, e faatatau i mea uma tatou te faia. E manaomia taumafaiga e faamalolosia ai musele ma aoao ai ni tomai fou.
O le mataupu faavae foi lava lea e tasi e faatatau i le mauaina o tali mai le Alii. Sa vaai Alema le Itiiti i se agelu, ae o lena aafiaga lava ia sa le lava. O lana molimau ia Iesu Keriso ma Lana Togiola sa faatoa sili atu le malosi ina ua ia “anapogi ma tatalo i le tele o aso” (Alema 5:46).
Mafaufau ia Iosefa Samita ma le Uluai Faaaliga. Sa le na ona ala ae a o Iosefa i luga i se tasi taeao ma filifili e ole atu i le Atua po o le fea lotu e auai. Sa tauivi moni lava o ia ma lana fesili mo le lua tausaga.3 Sa matua galue malosi o ia e saili ni tali, ma ina ua saunia o ia, sa tali mai le Tama Faalelagi ia te ia.
3. Toe Vaai—Atonu ua Uma Ona E Mauaina Lau Tali
A o ou laitiiti, sa ou manatu sa na o ni auala patino na taliina ai e le Atua ia tatalo. E toatele tagata e fetagisi a o latou tuuina atu a latou molimau, ma sa ou manatu afai ou te le tagi, e le i tautala mai le Agaga ia te au. Pe afai foi e le mu lou loto e pei ona faamatalaina e le Alii ia Oliva Kaotui (tagai Mataupu Faavae ma Feagaiga 9:8), sa ou faapea sa ou le lagonaina le Agaga.
Ae ua ou aoaoina e fetalai mai le Atua ia i tatou taitoatasi i auala eseese ma faaletagata lava ia. O le ki mo au o le aoaoina po o a na auala. I le Feagaiga Fou, na aoao mai ai Paulo e uiga i ala e mafai ai e le Agaga ona tatou maua se lagona: “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoia” (Kalatia 5:22 – 23). E mafai e le Agaga Paia ona faaaogaina soo se tasi o na lagona e fesootai mai ai ia i tatou.
O tali mai le Agaga Paia e masani ona filemu ma faigofie. E mafai i nisi taimi ona latou o mai “vave, ma atoatoa, ma i le taimi e tasi,” e pei o le kiina o se moli i totonu o se potu pogisa, e pei ona aoao mai e Elder David A. Bednar o le Korama a Aposetolo e Toasefululua. Ae o le tele lava o taimi e o mai ai e pei o se la oso—“o le faasolosolo malie ona faateleina o le malamalama” — pe pei foi o se malamalama i se aso puaoa. Ua lava le taitaiga tatou te maua e faia ai na o ni nai laa i luma.4 O lea la ia toe vaai, ma ia mautinoa e lei tuuina mai e le Atua ia te oe se tali e te lei iloaina ona sa e faamoemoe i se isi mea.
“O Finagalo moni ea le Atua e fetalai atu ia te oe? Na fesili mai ai Peresitene Russell M. Nelson. “Ioe!”5 Afai tatou te onosai ma tuu atu le galuega talafeagai, o le a tatou maua tali i a tatou tatalo. Seia oo mai na tali, e mafai ona tatou faalagolago i le Alii ma agai pea i luma. Sa fetalai atu le Alii ia Iosefa Samita, “Ia filemu ma ia iloa o au o le Atua” (Mataupu Faavae ma Feagaiga 101:16). O lena fautuaga e mafai foi ona faamafanafanaina ai i tatou.