I Melepone, Ausetalia

Talofa lava! O lo’u igoa o Benjamin H. E 18 o’u tausaga, ma ou te sau mai Glen Iris, o se pitonuu o Melepone, Ausetalia. O Melepone o le laumua o Vitoria ma na ta’ua “o le aai e sili ona ola o le lalolagi.” E tele ituaiga o tau e faafuasei mai i Melepone ma e ono mafai ona e aafia ai i vaitau uma e fa i le aso e tasi!

Olaga i Melepone

Matou te nonofo ma lo’u tina, lo’u tama, ma nai o’u tei laiti e toafa. Sa matou siitia mai i le eria o Melepone mo le galuega a lo’u tama.

Ou te alu lava i se aoga faalelotu, ma e fai a matou toniga—faapeleue viole ma ofuvae lanu uliuli ma se ofutino ma se fusiua. E ui lava o se aoga faalelotu, e le toatele lava ni tagata e talitonu, ma o tagata e faalelotu latou te le faaalia moni mai lava. Ou te fiafia i avanoa uma faafaifeautalai ou te maua ona e na o au lava le tagata O Le Ekalesia a Iesu Keriso o le Au Paia o Aso e Gata Ai i la’u aoga.

O la’u ata i le telefoni o se ata o Iesu ona o le tele o taimi e vaaia ai e tagata oe ua tatala lau telefoni ma o le a latou vaaia ma fesili e uiga i ai. O se faitotoa sili o se talanoaga e uiga i le talalelei! E i ai foi la’u taulima e faapea mai, “O Au o se Atalii o le Atua.” Ou te faaaogaina i le tele o taimi ma o loo iloga i lo’u lima ona o lena mea, ae sa ou filifili lava e faaauau pea ona ou faaaogaina aua e fesili mai tagata i taimi uma ia te au e uiga i ai. E tele taimi latou te fesili mai ai pe mafai ona avea i latou ma se atalii/afafine o le Atua. Na o lo’u ta’u atu lava ia i latou ioe o latou lava!

Taaloga

O le taalo pasiketipolo o se mea lelei tele ma na fesoasoani ia te au e maua ai nisi o au uo. O loo i ai se paka i talaane o lo matou fale ma ou te lagona ai le faaosofia atili e alu atu ma togi le polo, ina ia matuai lelei ai i le pasiketipolo. Sa matou taaalo mo le aoga, ma sa lelei tele la’u taalo faasaga i se isi ‘au. O le lua o aso mulimuli ane sa ou iloa ai sa latou ofoina mai ia te au se avanoa mo se ‘au i setete uma, o se tulaga maoae tele. Sa matou faia ni sailiiliga ma iloa ai latou te taaalo i Aso Sa, ma e lei oo moni mai lava i lo’u mafaufau e taalo ai iina.

Ekalesia

E le tele ni a matou talavou i le matou uarota. E tusa ai ma alii talavou o a’u, o isi ositaulaga e toalua, ma pe a ma le 5 tiakono. E fiafia o matou taitai e ave i matou i masina taitasi e asiasi ma vaai talavou e le omai ma valaaulia i latou i gaoioiga a le autalavou. E manaia tele pe a vaai atu i le manatu tele o taitai i isi.

Sa matuai taulai atu la matou uarota i sini ona o le polokalama fou a Fanau ma le Autalavou. Sa i ai se matou gaoioiga tuufaatasi a le autalavou na aofia ai eria uma e fa! O eria taitasi sa i ai se gaoioiga e ese o loo faapipiii ai. Sa ou nafa ma le taulai atu i le gaoioiga o le sini faaletino, o lea sa matou taaalo volipolo ai.

Sa matou galulue lava e faamamafa atu na vaega e fa o o matou olaga. Na fesoasoani foi ia te au e iloa ai le tulaga taua o le faatuina o sini. A aunoa ma ni sini, e faigata ona iloa o loo alualu i luma lou olaga.

Ou te manatu e taua mo tagata o le Ekalesia ona malamalama i le ofoofogia o le i ai o le malamalama ua tatou maua, e pei o le fuafuaga o le faaolataga.