“Karōk in M̧ōņōņō eo an Anij im Mejān Kajjik eo Am̧ Ekwojarjar,” N̄an Kōkajoorļo̧k Jodikdik ro, Jān. 2022.
Karōk in M̧ōņōņō eo an Anij im Mejān Kajjik eo Am̧ Ekwojarjar
Meļeļe im mour ekkar n̄an karōk in m̧ōņōņō eo ekōm̧m̧an bwe kwon tōpar mejān kajjik eo am̧ ekwojarjar.
Kōmeļeļe jān Albert Espí
Ta eo ej itok n̄an ļōmņak eo am̧ n̄e kwoj ron̄ naan eo mejān kajjik? Kwoj ke ļōmņak kōn juon men ekar jiktok ilo ļōmņak im̧aanļo̧k im jab maron̄ joļo̧k? Juon men enana ak em̧m̧an me maron̄ jab ukōte jekdo̧o̧n ta eo kwoj kōm̧m̧ane? Ak bōlen kwoj ļōmņak kōn juon eo ebun̄bun̄ (hero) ilo juon pija in alooj ak bok, eo ekar kāālet n̄an kadedeļo̧k jibadbad eo, lo̧mo̧o̧ren laļ in, ak erom kiin̄ ak kwiin?
Tikjinede ko remaron̄ errā kōn ukok kein; ijo wōt ke, n̄e jej kōnono kōn mejān kajjik eo ekwojarjar, jej kōnono kōn juon men eoktak. Ejjab āinwōt mejān kajjik eo kwoj riit kake ilo bok ko ak lo ilo pija in alooj ko, bōk mejān kajjiōk eo ekwojarjar am̧ epidodo kōnke kwoj juon ajri nejin Anij, bōtaab ej barāinwōt aikuji am̧ kōjerbal anemkwoj in kāālet eo am̧.
Anij ewōr an aolep kajoor ko ilo lan̄ im ilo laļ. Bujen ko jej kōm̧mani ippān Jemedwōj Ilan̄ rej kōtļo̧k An erom juon m̧ōttad ilo ad etetal ilo ļan̄ ko an mour in. Mejān kajjik eo ekwojarjar ad—kōjatdikdik eo ad n̄e jej m̧ōttāik Anij—ej kōm̧m̧an an pidodo kōn karōk in m̧ōņōņō eo An.
Meļeļe karōk in m̧ōņōņō eo an Jemedwōj Ilan̄ enaaj kōm̧m̧an bwe kwon kile patok eo am̧ indeeo im un eo. Im kāālet n̄an kōm̧m̧an im kōjparok bujen ko ippān Anij enaaj kōm̧m̧an bwe kwonk bōk jibadbad jab in.
Ilo bok in Moses jej riiti bwe “Moses eaar weaaklōn̄ļo̧k ilo juon toļ eutiej otem utiej, Im eaar lo Anij jelm̧ae doon, im eaar ekkōnono ippān” (Moses 1:1–2). Jān iien loļo̧k in an make, Anij ekar katakin Moses kōn paotok indeeo eo an. Men̄e Moses ekar wabanban im jab wānōk, ekar ekkatak juon men eaorōk kōn e make: e ekar ilo m̧ool juon nejin Anij (lale Moses 1:6).
Keememej Wōn Kwe
Setan ej kōņaan bwe kwon meļo̧kļo̧k wōn kwe. Ke Setan ekar kajjieon̄ in kareel Moses jān jerbal eo Irooj ekar kōpooje n̄an e, Moses ilo peran ekar uwaak, “Wōn kwe? Bwe lo, N̄aij juon m̧aan nejin Anij” (Moses 1:13; katak kar kobaitok). Innām Moses ekar kean̄, “Ilo̧k jān ijin, Setan; jab m̧oņe eō” (Moses 1:16; katak kar kobaitok).
Ilo bar jet naan ko, Moses ekar ba: “Kwojjab maron̄ m̧oņe eō, bwe Ijeļā wōn n̄a. Ejjeļo̧k ippam̧ meram eo im aiboojoj eo an Anij. Kōn menin etke ij aikuj kabun̄jar n̄an eok ak po ilo m̧oņ ko am̧?”
Lale kwaar n̄an jidik meļo̧kļo̧k bwe Anij ej iakwe eok im ekōņaan jipan̄ im kōjeraam̧m̧an eok. Ewōr juon An itok limo ekwojarjar ilo kwe make āinwōt juon iaan ajri ro Nejin. Jouj im bōk iien n̄an ekkatak ta lukkuun meļeļe in n̄an erom juon nejin Anij. Innām kōm̧m̧ani mennin kōttōpar ko im kōm̧m̧ani kāālet ko me renaaj jipan̄ eok mour ekkar n̄an jeļā jab in aolep raan.
Ewōr juon Jerbal Ippa n̄an Kwe
Elōn̄ am̧ jerbal ko im n̄ūrbōktak ko raorōk. Ewōr kein ekkatak ko am̧ ilo jikuuļ, jemjerā ko, eddo ko an baam̧le, im bōlen juon jerbal. Aaet, idajon̄jon̄ eo am̧ ej n̄an kōjjepaan wōt juon aolepān jerbal kein raorōk ilo am̧ jab meļo̧kļo̧k lukkuun jibadbad eo am̧ ilo mour. Ewōr juon jerbal an Anij n̄an kwe n̄an kadedeļo̧k (lale Moses 1:6). Ej uwaak eo n̄an kajjitōk eo “Etke ij pād ijin ioon laļ in?”
Āinwōt juon ajri nejin Anij, kwaar itok n̄an laļ in n̄an bōk juon ānbwin in kanniōk. Ippān ānbwinnūm̧, kwoj maron̄ kāālet n̄an tiljek ilo ļoor Jisōs Kraist. Kwoj maron̄ kāālet n̄an pokake kien ko an Anij, bōk kain̄i ko rekwojarjar, im kōm̧m̧an im kōjparok bujen ko an gospel eo. Kōm̧m̧ane men kein naaj kōpooj eok n̄an kakūrm̧ool mejān kajjōk eo am̧ ekwojarjar.
Kōn un in ealikkar ilo ļōmņak, kwoj maron̄ lo aorōk eo an bōk kwojkwoj eo kajjojo wiik, ekkatak jeje ko rekwojarjar, jar raan otemjeļo̧k, kōm̧m̧ani kōttōpar ko ewōr tokjāer, im jerbal n̄an ro jet. Men kein rej jipan̄ kakeememej eok kōn etke kwoj lukkuun pād ijin, im renaaj jipan̄ eok erom erreo n̄an bōk revelesōn eo an juon make me kwoj aikuji n̄an m̧ōņōņō im pād wōt ilo iaļ in bujen eo. Ilo am̧ ukweļo̧k im niknik ļoor Irooj, kwonaaj bōk tōl an juon make ilo aolep jekjek ko an mour eo am̧.
Kajjieon̄ n̄an Erom Wōn Eo Kwaar Kōņaan Erom
Kea ko im n̄ūrbōktak ko an laļ in, ak jab jeļā ko am̧ make, maron̄ kōm̧m̧an am̧ jerwane kōļmenļo̧kjeņ eo an jerbal eo am̧ aorōk ilo karōk in lo̧mo̧o̧r eo eļap an Anij. Eļan̄n̄e menin ej waļo̧k, ij karuwaineneik eok n̄an itok n̄an Kraist (lale Moronai 10:32). Ejjeļo̧k men epidodo ilo karōk indeeo eo an Anij eļan̄n̄e ejjab E, im kōn E aolep men em̧m̧an maron̄ tōpare.
Kajjieon̄ n̄an ļoor Rilo̧mo̧o̧r eo ej wāween eo em̧m̧antata n̄an kalimjōk men ko an gospel eo. Kōn tōmak im kōjatdikdik ilo E, kwoj maron̄ jelm̧ae apan̄ ko an mour in kōn lōke. Kwonaaj barāinwōt bōk juon alikkar eļapļo̧k ilo am̧ kōm̧m̧ani kāālet ko, ņa mejļan jorrāān ko, jerbal m̧aanļo̧k n̄an menin kōttōpar ko rejim̧we, im jelm̧ae kapo ko.
Jokāālet ko am̧ renaaj jelet indeeo eo. Kōn Jisōs Kraist im pinmuur in jouj eo An, komaron̄ bōk lan̄lōn̄ ilo mour in im eo tok juon. Komaron̄ kile mejān kajjōk eo ekwojarjar am̧ kōn bōk aolep men ko ewōr Ippān im mour kōn juon kain mour Ej tōl, eo ej “mour indeeo, … eo ej mennin letok eo eļaptata ian mennin letok ko an Anij” (Katak im Bujen Ko 14:7).