“Kajjitōk ko im Uwaak ko,” N̄an Kōkajoorļo̧k Jodikdik ro, Jān. 2022.
Kajjitōk ko im Uwaak ko
“Ejjab lōn̄ ippa men ko reier wōt ippān armej ro ilo kumi in jodikdik eo aō. Ekōjkan an ļapļo̧k aō maron̄ en̄jake ekkejel ippāer?”
Kappukōtļo̧k Eo Juon
“Eļapļo̧k aō en̄jake ekkejel ippān ro jet n̄e ij lukkuun kajjieon̄ joļo̧k iien ippāer kajjojo, ejjab baj ilo nememen ko an kumi. Eļan̄n̄e kwoj kōņaan pukōt juon eo em̧m̧an am̧ aitōle, pukōtļo̧k armej eo me ej āinwōt rej aikuji juon m̧ōttan. Emaron̄ jujen ļapļo̧k am̧ jeraam̧m̧an jān er!”
Latyanna P., 17, Singapore
Kwaļo̧k Itok limo ko Ami
“Elōn̄ wōt iaan armej ro ilo kumi in jodikdik eo aō ewōr ippāer men ko roktak eitok limoier ie. Ikōņaan kajjitōk ippāer kōn itok limo ko aer kōnke ej kwaļo̧k ij kea kōn er. Innām ej leļo̧k n̄an er juon iien n̄an kajjitōk kōn itok limo ko aō barāinwōt. Kōm̧m̧an ekkejel ko ippān armej ro ebōk iien—kōm̧m̧ane wōt!”
Erin F., 18, Utah, USA
Pukōt Men Ko Reier Wōt Juon
“Eļan̄n̄e kwoj kōņaan bwe en wōr juon am̧ jemjerā epaakļo̧k ippān kum̧i eo am̧ ak ro m̧ōttam̧, pukōt men ko rem̧m̧an, eļap meļeļeier me kwoj maron̄ kōm̧m̧ane ippān doon, men̄e eļan̄n̄e relukkuun in iiet. Kwoj maron̄ lo juon men em̧m̧an ippam̧ ak iien em̧m̧an me kom̧ij aolep m̧ōņōņō kake. Kajjitōk kōn jipan̄ jān Jemedwōj Ilan̄, im E enaaj lewaj n̄an kom̧ im̧we.”
Carla V., 12, Peru
Kam̧m̧oolol kōn Oktak ko Ami
“An ļapļo̧k aō joļo̧k iien ippān armej ro ilo kumi in jodikdik eo aō, eļapļo̧k aō iakwe ta eo ejej uwaan kōn er! Ij ekkatak ekōjkan an em̧m̧anļo̧k aō jerbal n̄an er, eo ejipan̄ eō epaakeļo̧k er im n̄an Jisōs Kraist. Jej aolep ajri ro nejin Jemedwōj Ilan̄, kōn menin elōn̄ļo̧k ippān men ko reier wōt juon jān ad ļōmņak.”
Sarah M., 16, Oregon, USA
Kajjieon̄i Men ko Rekāāl
“Baj m̧ōttāik wōt er im jab bōjrak jān kōnono n̄an er. Kajjieon̄i men ko rekāāl bwe en ļapļo̧k kobaiktok. Juon ļaddik ilo ward eo am ekar jab lukkuun kōņaan ikkure ko, bōtaab ej aolep iien ikkure ippām. Innām kōmij kōm̧m̧ane men ko eitok limo in ie, āinwōt jibain ko ak kadkad kōn kaaj. Kajjeon̄i men ko rekāāl ej juon wāween em̧m̧an n̄an en̄jake ekkejel.”
Jarren M., 17, Nova Scotia, Canada
Pukōtļo̧k
“Pukōtļo̧k im jipan̄ juon eo ilo kumi in jodikdik eo am̧ eo ej pād ilo juon iien aikuj. N̄e jej kajjieon̄ in erom juon waanjon̄ak kōn iakwe eo an Rilo̧mo̧o̧r eo, enaaj jipan̄ kōj ļapļo̧k ad ekkejel n̄an doon.”
Joshua C., 20, Faleniu, American Samoa
Kwon Erom Kwe Make
“Ilo iien kwonaaj bōlen lo men ko reier wōt juon ippam̧, bōtaab emaron̄ in jab ilo iien eo em̧ōkaj tata. Ilo iien in, kwomaron̄ ekkejel ilo m̧akūtkūt ko im men ko me rej waļo̧k ilo wiik eo. Lem̧ōņōņō ilo m̧akūtkūt ko! Kāālet n̄an bōk koņaam̧ ie, im kwon erom kwe make!”
Hannah W., 18, Nova Scotia, Canada