“Kappukōt Jisōs Kraist ilo Kallim̧ur M̧okta,” N̄an Kōkajoorļo̧k Jodikdik ro, Jān. 2022.

Itok, Ļoor Eō

Kappukōt Jisōs Kraist ilo Kallim̧ur M̧okta

Jān Marissa Widdison

Māākjiin ko an Kabun̄ in

Erkein rej wāween ko jilu kwoj maron̄ pukōti kōn Rilo̧mo̧o̧r eo ilo am̧ ekkatak Kallim̧ur M̧okta

Pija

Jisōs Kraist

Pop quiz eo: Ewi wōt bok in jeje ko rekwojarjar rej kōn Jisōs Kraist? Hmm. Jen lale m̧ok:

Bok in Mormon ej bar juon kallim̧ur kōn E.

Katak im Bujen Ko ej bar juon kōro̧ro in ennaan ko jān E n̄an Josep Smith im rikanaan ro jet.

Kallim̧ur Ekāāl ej kōmeļeļe kōn iien ko kōn mour eo An.

Bōtaab ta eo kōn Kallim̧ur M̧okta? Ej ke katakin kōj kōn Jisōs Kraist, barāinwōt?

Aaet! Ilo m̧ool, Rilo̧mo̧o̧r eo ej likūt eļapļo̧k kijejeto n̄an jipan̄ rikaļoor ro An meļeļe jerbal eo An ilo Kallim̧ur M̧okta: “Im Ej jino ippān Moses im ri kanaan otemjej, im kōmmeḷeḷeik n̄an erro ilo jeje ko otemjej men ko kōn e make” (Luk 24:27).

Erkein rej wāween ko jilu kwoj maron̄ pukōt Jisōs Kraist ilo am̧ etale Kallim̧ur M̧okta iiō in.

1. Jeje ko rekwojarjar me rej kōnono kōn Jisōs Kraist rej kōjerbal juon āt eoktak.

Ilo Kallim̧ur M̧okta, Jisōs emakijkij ān̄inn̄ini “Irooj” ak “Anij.” Ukok (Version) ko an Baibōļ kar je jān Kabun̄ in ekoba footnote ko me remaron̄ jipan̄ eok meļeļe n̄e juon eoon ej kōnono kōn Jisōs Kraist. N̄an waanjon̄ak, ke Moses ekar kōnono ippān Anij ilo wōjke eo eurur (lale Exodus 3:6), footnote eo j kalikkar ekar kōnono n̄an Rilo̧mo̧o̧r eor.¹ Būreejtōn Russell M. Nelson ekar kōketak kōj n̄an ekkatak kōn āt ko roktak im taitōļ ko an Kraist kar kōjerbali ilo jeje ko rekwojarjar.²

2. Men ko im iien ko me rej kakeememej kōj kōn Jisōs Kraist.

Elōn̄ eoon ko ilo Kallim̧ur M̧okta ekoba kakōļļe ko me remaron̄ katakin kōj kōn Jisōs Kraist im kakeememej kōj kōn jipan̄ eo Ej letok n̄an kōj. N̄an waanjon̄ok:

Elōn̄ eoon ko rej kōmeļeļeik iien ko ijo armej ro retiljek kar kakien er n̄an katok kōn mennin mour ko āinwōt m̧ōttan kabun̄jar eo aer. N̄an waanjon̄ak, eļan̄n̄e ajri ro nejin Israel raar kakōļļeik kōjām eo aer kōn būtōktōk in ļaam̧, raar kōjparok er jān nan̄inmej eo enana. Katōk kein rej kakeememej kōj bwe Jisōs Kraist ekar kōtļo̧k E make n̄an aer m̧ane āinwōt m̧ōttan Pinmuur eo An n̄an anjo̧ ioon mej ilo jetōb im ilo kanniōk. (Lale Exodus 12:23).
Juon iien juon rikanaan kar etan Elijah ekar aikuj in tilekek ilo āne jem̧aden. Ekar en̄jake būrom̧ōj im kar ba bwe ekar kōņaan bwe en kar mej. Ke ekar kiki, pilawe im dān ilo kabwilōn̄lōn̄ kar waļokļo̧k. Menin emaron̄ kakeememej kōj bwe Jisōs Kraist ej Dān in Mour eo im Pilawe in Mour eo, unjen kōjatdikdik eo im mour eļap tata. (Lale 1 Kiin̄ Ro 19:1–8).
“Am̧ in naan ej e ļaap n̄an neō,” juon rijeje sam ekar je (Sam Ko 119:105). Im Maika ekar kam̧ool, “Men̄e ij jijet ilo marok, Jeova enaaj aō meram n̄an eō” (Maika 7:8). Naan ko aer rej kakeememej kōj bwe Jisōs Kraist ej Meram eo an Laļ in, tōl kōj ļo̧k n̄an kapijuknen eo ad ilo lan̄.

Ilo am̧ riit, kwoj maron̄ em̧ool lo men ko jet me rej kakeememej kom̧ kōn Jisōs Kraist im maron̄ eo An n̄an lo̧mo̧o̧ren kōj. N̄an waanjon̄ak, ke baam̧le eo an Noa kar lo̧mo̧o̧ren er jān ibwijleplep eo ilo wa ark eo ak ke kar leļo̧k iien n̄an Jona n̄an ukweļo̧k ilo an kar pād lowaan raj eo. Iien kein remaron̄ kakeememej kōj bwe Rilo̧mo̧o̧r eo emaron̄ bōkļo̧k kōj ilo lan̄ ko an mour in im letok n̄an kōj iien ko rem̧m̧an n̄an bar ro̧o̧l n̄an ioon iaļ eo ejim̧we. (Lale Jenesis 7:1; Jona 1:17.)

3. Eoon ko me rej kanaan kōn ļotak eo an Jisōs Kraist.

Rainin jej reim̧aanļo̧k n̄an im kōppopo n̄an Itok eo Kein Karuo an Jisōs Kraist. Ilo juon wāween ejja āinwōt, rikanaan ro an Kallim̧ur M̧okta raar reim̧aantak n̄an im kar jeje kōn itok eo An kein kajuon, ke Ekar ļotak ioon laļ in. N̄an waanjon̄ok:

Juon rikanaan kar etan Balaam ekar kōmeļeļeik ekōjkan an “juon iju enaaj waļo̧k jān Jekob” (Bōnbōn 24:17). Menin ej meļeļe in Rilo̧mo̧o̧r eo enaaj kar ļotak ilo menmenbwij eo an Jekab (ak Israel).
Juon rikanaan kar etan Nathan ekar jiron̄ Kiin̄ Devid bwe Jisōs Kraist enaaj kar juon bwijjin Devid—bwe menmenbwij eo an enaaj kar jutak “ tūroon in aelōñ eo an n̄an indeeo.” (2 Samuel 7:13).
Rikanaan Aiseia ekar je jet iaan Kōmeļeļe ko rebun̄bun̄ ilo Kallim̧ur M̧okta kōn Rilo̧mo̧o̧r eo. Jet iaan naan ko an raar kōjerbali āinwōt naan in al ko ilo Handel’s Messiah, eo emakijkij kar al kake ilo iien Kūrijm̧ōj. (Lale Aiseia 7; 9; 40; 53.)

Pija

leddik eo riiti jeje ko rekwojarjar kōn ten̄ki

Kōn jidik wōt kōmālmel, kwonaaj maron̄ lo Jisōs Kraist ilo aolepān Kallim̧ur M̧okta ilo iiō in. E ej iakwe eok eļap tata, ejja āinwōt An kar iakwe Adam im Iv, Aron im Miriam³—im elōn̄ ro jet E make ekar jerbal in karejar n̄an er ilo tōre kein etto, bwebwenato ko reim̧we. Kōn tōmak ilo Jisōs Kraist, im kōn jipan̄ eo jān ro jet, menin enaaj juon iiō ekabwilōn̄lōn̄ in ekkatak jeje ko rekwojarjar!