Anjo̧ Jān Kōppeļaak ko an Setan

Jān Eric B. Murdock

Māākjiin ko an Kabun̄

Setan ej kōm̧m̧ani aolep men ko emaron̄ m̧oņe kōj kaki. Kam̧m̧oolol ewōr ippād jipan̄ eo ekwojarjar n̄an joļo̧k aujiid ko an.

Juon rijibain ej kanno̧n̄ addiin pein im juon bo̧o̧l ej jako ilo im̧aan mejād.

Kabwilōn̄lōn̄!

Innām ej kanōktok juon rabit jān juon aat in ioon bar ejjeļo̧k kobban im ej kōm̧m̧an bwe juon men en jako ilo mejatoto.

Waao! Ekōjkan an kōm̧m̧ane?

Rijbain eo ekar lo kilen an kōm̧m̧an bwe armej ro ren tōmak bwe raar kam̧oole juon men epen ke, ilo m̧ool, raar lo wōt ta eo rijibain eo ekar kōņaan bwe ren loe.

Ejim̧we! Rijibain ro rekar jab lukkuun lo rijippan̄ ro aer ilo jimettan. Raar lo wāween ko rekapeel n̄an m̧oņe kōj n̄an ļōmņak jaar lo juon en eo me ekar lukkuun in waļo̧k. Riab ko rettiņo ilo men ko remaron̄ bōd ak m̧oņ.

Ilo an menin aolep kōm̧m̧an n̄an kam̧ōņōņō im kalimomo, kain men ko remaron̄ bōk jet im m̧oņ ko rej kauwōtata—jim̧or ilo kanniōk im jetōb.

Rijeļā M̧oņ im Rim̧oņ eo Ekauwōtata

Setan ej rikōjedāt eo an aolep jim̧we im ejjab kōņaan bwe jabdewōt en ļoor Jemedwōj Ilan̄ im Jisōs Kraist. Ekōņaan bwe jen en̄taan im āinwōt e (lale 2 Nipai 2:27).

N̄an kōtōprak menin, ej kōm̧m̧ane jabdewōt men emaron̄e n̄an kōm̧m̧an bwe jen kajjitōk ak kowaan m̧ool ko indeeo. Ejjab bōjrak an jerbal n̄an kapok kōj n̄an tōmak bwe em̧m̧an ej nana im nana ej em̧m̧an (lale Aiseia 5:20). En̄in ej etke jet iien rej ņan etan jemen aolep riab ko im rikapo eo eļap tata (lale Moses 4:4). Im eļakkar de kōm̧m̧ane menin ium̧win juon iien elukkuun in, aitok.

Wōtlo̧k Eo

Ilo Jikin Kallib Eden, Anij ekar jiron̄ Adam im Iv n̄an jab m̧ōn̄ā jān leen wōjke eo in jeļā em̧m̧an im nana. Eļan̄n̄e rekar m̧ōn̄ā, renaaj kar aikuj diwōjļo̧k jān Jikin Kallib Eden im naaj kar āliktata mej. Bōtaab Anij ekar jiron̄ er bwe remaron̄ kāālet (lale Moses 3:16–17).

Setan ekōņaan kakkure karōk eo an Anij. Ekar kajjieon̄ in kapo Iv n̄an m̧ōn̄ā jān leen wōjke eo kar kamoiki. Ekar riab im kar ba liin ejjamin naaj kar mej (eo ej lukkuun jum̧ae ta eo Anij ekar ba). Ekar barāinwōt jiron̄ e jimettan-m̧ool ko (lale Moses 4:11).

Āliktata, jim̧or Adam im Iv raar m̧ōn̄ā leen wōjke eo im kar kadiwōjļo̧k er jān im̧aan mejān Anij. Jeje ko rekwojarjar rej ņan etan menin “mej ilo jetōb.” Erro kar barāinwōt erom wabanban, ej meļeļe in bwe renaaj kar mej ilo kanniōk. Menin kar jeļā kake āinwōt Wōtlo̧k eo.

Āinwōt ro bwijjin Adam im Iv, kōj, barāinwōt, jej jepeļļo̧k jān im̧aan mejān Anij im naaj ioon mej ilo kanniōk. Jej barāinwōt mālijjon̄ jān men ko reppen an mour in im kapo ko an Setan.

Menin emaron̄ āinwōt juon men enana, bōtaab Wōtlo̧k eo ej juon m̧ōttan aorōk ilo karōk eo an Jemedwōj Ilan̄. Ej barāinwōt letok n̄an kōj iien eo em̧m̧an n̄an ekkatak im eddōkļo̧k jān kōjerbal anemkwoj in kāālet eo ad n̄an kāālet n̄an kōm̧m̧an em̧m̧an. Im kōnke Jisōs Kraist im Pinmuur eo An, jemaron̄ ukweļo̧k n̄e jej jerawiwi im m̧aanjabpopo n̄an bōk mour indeeo. Aolep men me rekar waļo̧k kōn Wōtlo̧k eo, Jisōs Kraist ej kajim̧wi. Setan ekar jab kabōjrak karōk eo an Anij.

Anjo̧ Jān Kōppeļaak ko an Setan

Setan ej wōnm̧aanļo̧k wōt rainin n̄an kajjieon̄ in m̧oņe kōj im riabe kōj. Erkein rej jejjo wāween ko ej kōm̧mane menin:

1. Kapo

Setan ekōņaan door ļōmņak ko rettoon im jab jouj ilo iaļ eo ad. Ekōņaan bwe men kein ren deļo̧n̄e ļōmņak ko ad im kōm̧m̧an bwe jen jerbali. Jemaron̄ jum̧ae kapo ilo ad jiron̄ Setan n̄an ilo̧k ettoļo̧k (lale enaan eo an Elder Stevenson ilo peij 4). Juon iaan kōjparok ko reļļap tata ņae kapo ej n̄an jar iien otemjej (lale Alma 13:28; 3 Nipai 18:15). Jemaron̄ barāinwōt riit im ekkatak jeje ko rekwojarjar. Rej bōktok Jetōb eo n̄an būruōd, bar kam̧ool n̄an kōj kōn ta m̧ool eo, im bōbrae kōj ņae kapo eo ilju im jekļaj.

2. Riab ko im M̧oņ

Setan jet iien ej jiron̄ kōj men ko āinwōt: “Kwoban kōm̧m̧ane juon men ejim̧we,” “Ekanooj ļap am̧ jerawiwi ban jeorļo̧k am̧ bōd,” “Epen n̄an oktak,” ak “Ejjeļo̧k tokjam̧ im ejjeļo̧k juon ej lukkuun kea kake eok.”

Men kein rej riab ko. Jab tōmaki! En̄in ej m̧ool eo: Anij ej iakwe eok im ej lan̄lōn̄ ilo kwe kōnke kwoj juon Nejin. Kwolukkuun kabwilōn̄lōn̄! Ekanooj lōn̄ am̧ kōjatdikdik ko, im ilo am̧ ļoor e, ilju im jekļaj eo am̧ eromaak! Em̧ool jekdo̧o̧n n̄e kwoj kōm̧m̧ani bōd ko, ej maron̄ wōr wōt am kōjatdikdik im, ippān doon ippān Kraist, kwoj ukōt men ko.

Kwoj maron̄ aolep iien jeļā bwe Setan ej ba riab ko n̄an kwe. Kwoj maron̄ barāinwōt pedped ioon Jetōb eo n̄an aolep iien jiron̄ eok m̧ool eo (lale Jekab 4:13). En̄in ej juon un ej aorōk n̄an kajjieon̄ n̄an aolep iien bōk Jetōb eo ippād.

Jemaron̄ barāinwōt kile im jum̧ae riab ko an Setan ilo ad riiti jeje ko rekwojarjar aolep iien im ennaan ko jān ritōl ro an Kabun̄ in. Kwoj maron̄ lo eoon ko rōkōbōkakkak ak kout ko n̄an kakeememej eok kōn m̧ool ko me rej oktak jān riab ko an Setan. Kwomaron̄ kakilōklōk er ak likūt er ilo juon jikin ijo enaaj emakijkij am̧ lo er.

3. Ebbweer

Setan ej iakwe n̄e jej en̄jake jānliklik. Ekōņaan bwe jen tōmak bwe jabdewōt men ej kōm̧m̧an bwe jen ebbweer naaj pād n̄an indeeo. Bōtaab menin ejjab m̧ool.

Elder Jeffrey R. Holland jān Doulul eo an Jon̄roulruo Rijilōk ro ekar katakin bwe Setan ekōņaan bwe jen tōmak menin kōnke “[Setan] ejeļā e ejjab maron̄ eddōkļo̧k, e ejjab maron̄ wōnm̧aanļo̧k, bwe laļ ko ejjeļo̧k jem̧ļo̧kier e ejjmanin naaj wōr juon an ilju im jekļaj eromaak. E ej juon em̧m̧aan enana lukōje kōn maron̄ ko indeeo, im ekōņaan bwe kom̧in nana barāinwōt. Ekwe, jab lo ilo men jab in.”¹

Jemedwōj Ilan̄ im Jisōs Kraist rej kōņaan bwe kwon m̧ōņōņō. Eļan̄n̄e jej oktakļo̧k n̄an Er, Remaron̄ jipan̄ eok kijin̄en̄e wōt ilo mālijjon̄ ko im lo aenōm̧m̧an im lan̄lōn̄.

Jejeļā Wōn Ewiin ilo Jem̧ļo̧kin

Rilo̧mo̧o̧r eo ej kajjitōk ippād n̄an “reitok n̄an [E] ilo aolep ļōmņak; jab pere, jab mijak” (Katak im Bujen Ko 6:36). Ilo ad ron̄jake kajjitōk in, jouj in pinmuur eo An im kajoor eo renaaj aolep iien dipenļo̧k jān an Setan kajjieon̄ kapo kōj. Jejjab aikuj in ron̄jake jeļā kōppeļak ko an Setan. Jemaron̄ bōk peran eo im kajoor eo n̄an anjo̧ ioon kapo ko an Setan im niknik ilo apan̄ ko an mour in.

Jisōs Kraist ekar ba, “N̄a, meram in laļ; eo ej ļoor Eō e jāmin etal ilo marok, a enaaj an meram in mour.” (Jon 8:12). Ekar barāinwōt ba, “Ilo laļ kom̧ij en̄taan: a kom̧win m̧ōņōņō; N̄a Iar bōk anjo̧ ioon laļ” (Jon 16:33).

Jisōs Kraist emaron̄ kotak lōn̄ļo̧k kōj im kōkajoor kōj ņae jabdewōt jeļā kōppeļak ko Setan ej kajjieon̄ kōjerbali ņae kōj. Ilo ad keememej Rilo̧mo̧o̧r eo im katak ko An, jemaron̄ lo jeļā in kōppeļaak ko im m̧oņ ko an Setan im lo “men ko āinwōt aer lukkuun waļo̧k” (Jekab 4:13).