« ភ្ជាប់ » ដើម្បីកម្លាំងនៃយុវជន ខែ មីនា ឆ្នាំ ២០២២ ។
ភ្ជាប់
អ័ដាម អិល
អាយុ ១៥ ឆ្នាំ ប្រទេស ហ្សាម៉ាអ៊ីក
ថតរូបដោយ គ្រីស្ទីណា ស្ម៊ីធ
ឪពុកម្ដាយរបស់ខ្ញុំបង្ហាញខ្ញុំពីរបៀបដើម្បីក្លាយដូចជាព្រះគ្រីស្ទ ។ ពួកគាត់តែងតែជួយដល់មនុស្សដទៃជានិច្ច ! ហើយនៅពេលពួកគាត់បម្រើដល់អ្នកដទៃ ពួកគាត់មិនរអ៊ូរទាំឡើយ ។ ពួកគាត់រក្សាថ្ងៃឈប់សម្រាកឲ្យបរិសុទ្ធ ។ ពួកគាត់ក៏ធ្វើការអធិស្ឋានជារៀងរាល់ព្រឹក និងរៀងរាល់យប់ផងដែរ ។
ខ្ញុំរៀនអ្វីៗផ្សេងទៀតមកពីឪពុកម្ដាយរបស់ខ្ញុំ ។ ប៉ារបស់ខ្ញុំគឺជាវិចិត្រករដ៏អស្ចារ្យម្នាក់ ។ ជាពិសេសគាត់ពូកែខាងគូរស្រមោលដោយខ្មៅដៃ ។ ខ្ញុំដាក់គោលដៅមួយ ដើម្បីកែលម្អរូបសិល្បៈរបស់ខ្ញុំ ដូច្នេះខ្ញុំអង្គុយមើលគាត់គូរយ៉ាងកៀក ។
គោលដៅមួយទៀតដែលខ្ញុំមាន គឺដើម្បីទទួលបានពិន្ទុល្អនៅសាលារៀន ។ ពេលខ្លះ ខ្ញុំភ័យនៅពេលប្រឡង ។ នៅពេលមួយនោះ ខ្ញុំភ័យខ្លាំងណាស់ ដូច្នេះខ្ញុំបានអធិស្ឋាន ។ បន្ទាប់មក ខ្ញុំមានអារម្មណ៍ធូរស្រាល និងរីករាយក្នុងចិត្ត ។ ខ្ញុំអាចបន្ដការប្រឡងដោយមិនមានបញ្ហា ។ ខ្ញុំដឹងថា ព្រះវិញ្ញាណបរិសុទ្ធបានជួយខ្ញុំឲ្យឈប់មានអារម្មណ៍ភ័យខ្លាច ។
នៅពេលមួយ ខ្ញុំបានធ្វើការនៅក្នុងគម្រោងបម្រើមួយ ដើម្បីជួយលាបថ្នាំនៅលើជញ្ជាំងសាលារៀននៅក្បែរផ្ទះ ។ ដំបូងឡើយ ខ្ញុំមិនចង់ទៅទីនោះទេ ប៉ុន្ដែក្រោយមក ខ្ញុំចាប់ផ្ដើមមានអារម្មណ៍ចង់ទៅវិញ ។ ឥឡូវនេះ មិនថាខ្ញុំដើរកាត់សាលារៀននោះនៅពេលណានោះទេ វាធ្វើឲ្យខ្ញុំមានអារម្មណ៍ពិសេស ។ ខ្ញុំដឹងថា ខ្ញុំបានជួយកុមារនៅទីនោះ ។