« អំណាចបព្វជិតភាពអំឡុងពេលនៃជំងឺរាតត្បាតសាកល » ដើម្បីកម្លាំងនៃយុវជន ខែ មីនា ឆ្នាំ ២០២២ ។

បាវចនា និង ខ្ញុំ

យុវវ័យចែកចាយពីរបៀបដែលពួកគេកំពុងរស់នៅតាមពាក្យពេចន៍នៃបាវចនារបស់ក្រុមយុវនារី និងកូរ៉ុមបព្វជិតភាព

អំណាច បព្វជិតភាពអំឡុងពេលនៃជំងឺរាតត្បាតសាកល

« ខ្ញុំនឹងស្រឡាញ់ព្រះ … ហើយប្រើបព្វជិតភាពរបស់ទ្រង់ដើម្បីបម្រើអ្នកដទៃ ដោយចាប់ផ្តើមពីក្នុងគេហដ្ឋានរបស់ខ្ញុំ » ។

ដោយ ខូល ខូលីន

នៅពេលយើងចាប់ផ្ដើមធ្វើពិធីសាក្រាម៉ង់នៅផ្ទះ ដោយសារតែជំងឺរាតត្បាតសាកលកូវីដ-១៩ នោះខ្ញុំបានជួយចែកសាក្រាម៉ង់ដល់គ្រួសាររបស់ខ្ញុំ ។ វាល្អណាស់ដែលខ្ញុំអាចធ្វើការណ៍នេះនៅក្នុងផ្ទះរបស់ខ្ញុំផ្ទាល់ ហើយវាធ្វើឲ្យខ្ញុំដឹងថា តើខ្ញុំមានអំណរគុណខ្លាំងប៉ុណ្ណាចំពោះពិធីសាក្រាម៉ង់ ។ ខ្ញុំមានអំណរគុណ ដែលខ្ញុំអាចរស់នៅឆ្លងកាត់គ្រានៃការមានពិធីសាក្រាម៉ង់នៅគេហដ្ឋាននេះ ។

អ្នកជិតខាងរបស់យើងម្នាក់ត្រូវការនរណាម្នាក់ ដែលអាចយកសាក្រាម៉ង់ជូនដល់គាត់ ។ ពុំមាននរណាម្នាក់នៅក្នុងគេហដ្ឋានរបស់គាត់ ដែលអាចរៀបចំ ឬប្រសិទ្ធពរដល់សាក្រាម៉ង់បាននោះទេ ដោយសារស្វាមីរបស់គាត់បានលាចាកលោកទៅកាលពីពីរបីឆ្នាំមុនម៉្លេះ ។ គាត់ក៏ប្រយ័ត្នប្រយែងនឹងអ្នកដែលមកលេងដែរ ដោយសារតែជំងឺរាតត្បាតនេះ ។ ប៉ារបស់ខ្ញុំ និងខ្ញុំគឺជាបងប្អូនប្រុសដែលផ្ដល់ការងារបម្រើដល់គាត់ ដូច្នេះយើងបានផ្ដល់ការប្រសិទ្ធពរសាក្រាម៉ង់ជូនគាត់ ទាំងពាក់ម៉ាស់ និងធ្វើតាមវិធានការទប់ស្កាត់ផ្សេងៗទៀតដើម្បីសុវត្ថិភាពរបស់គាត់ ។

គាត់មានអំណរគុណយ៉ាងខ្លាំង ដែលយើងអាចធ្វើដូច្នេះបាន ។ វាធ្វើឲ្យខ្ញុំមានអារម្មណ៍សោកសៅបន្ដិច ដែលគាត់នៅឯកោ ដោយសារគាត់រស់នៅតែម្នាក់ឯងនៅក្នុងគេហដ្ឋានរបស់គាត់អំឡុងពេលនៃជំងឺរាតត្បាតនេះ ។ ប៉ុន្ដែ ខ្ញុំក៏មានអំណរគុណផងដែរ ដែលខ្ញុំអាចធ្វើអ្វីមួយដែលសំខាន់ជាខ្លាំងជូនគាត់បាន ដើម្បីធ្វើឲ្យគាត់សប្បាយចិត្ត ។ វាគឺជាការណ៍ល្អដែលអាចបម្រើដល់គាត់បាន ។ វាធ្វើឲ្យខ្ញុំរីករាយ ដែលប៉ារបស់ខ្ញុំ និងខ្ញុំអាចទៅបម្រើអ្នកជិតខាងរបស់យើងបាន ។

ខ្ញុំមានអំណរគុណដែលមានបព្វជិតភាព ដោយសារវាមិនត្រឹមតែផ្ដល់ផលប្រយោជន៍ដល់ខ្ញុំប៉ុណ្ណោះទេ ប៉ុន្ដែក៏ដល់មនុស្សផ្សេងទៀតផងដែរ ។ វាជួយខ្ញុំឲ្យក្លាយជាបុគ្គលដ៏ប្រសើរ និងជួយខ្ញុំឲ្យមើលឃើញពីរបៀបដែលខ្ញុំអាចបម្រើដល់មនុស្សដទៃទៀតបាន ។ ការចែកសាក្រាម៉ង់នៅក្នុងគេហដ្ឋានរបស់ខ្ញុំ និងដល់អ្នកជិតខាងរបស់ខ្ញុំបានបើកភ្នែកខ្ញុំ ។ ខ្ញុំត្រូវទាញយកប្រយោជន៍ពីឱកាសចែកចាយសាក្រាម៉ង់នេះ និងបម្រើដល់សមាជិកដែលមិនអាចធ្វើវាដោយខ្លួនគេបាន ។ ខ្ញុំមានអំណរគុណ ដែលខ្ញុំអាចប្រើប្រាស់បព្វជិតភាពដើម្បីផ្ដល់ពរជ័យដល់មនុស្សដទៃ និងដល់គ្រួសាររបស់ខ្ញុំ ។

អ្នកនិពន្ធរស់នៅរដ្ឋយូថាហ៍ ស.រ.អា. ។