« គន្លឹះបីយ៉ាងសម្រាប់ការទាស់ទែងគ្នាមានកាន់តែតិចនៅក្នុងគ្រួសាររបស់អ្នក » ដើម្បីកម្លាំងនៃយុវជន ខែ មីនា ឆ្នាំ ២០២២ ។

ជំនួយ ជីវិត

គន្លឹះបីយ៉ាងសម្រាប់ ការទាស់ទែងគ្នាមានកាន់តែតិច នៅក្នុងគ្រួសាររបស់អ្នក

ដោយ ដេវីឌ ឌីកសុន

ទស្សនាវដ្តីសាសនាចក្រ

តើគ្រួសាររបស់អ្នកពេលខ្លះមានការឈ្លោះប្រកែកគ្នាដែរឬទេ ? អ្នកមិននៅឯកោនោះឡើយ ។

« វាមិនយុត្តិធម៌នោះទេ ! វាជាវេន របស់ខ្ញុំ ! »
« នែ៎ ឯងមិនបានសុំខ្ចីវានោះទេ ! »
« ប៉ា ! អានីតា បានលៀនអណ្ដាតដាក់ខ្ញុំ ! »

ប្រសិនបើសម្ដីទាំងនោះណាមួយស្ដាប់ទៅដូចធ្លាប់ឮពីមុន នោះអ្នក អាច ជាផ្នែកមួយនៃគ្រួសារមួយ ។ ហើយគ្មានគ្រួសារណាមួយចៀសផុតពីការមានជម្លោះនោះឡើយ ។ អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់ ធ្លាប់បានចែកចាយថា កូនៗរបស់លោកបានរអ៊ូរទាំថា « ម៉ាក់ គាត់កំពុងដកដង្ហើមពីខ្យល់របស់កូន ! »^១

វាជារឿងធម្មតាទេ ដែលគ្រួសារមួយមានការទាស់ទែងគ្នានោះ ។ តាមពិតទៅ មានមនុស្សម្នាក់ដែលខំធ្វើការយ៉ាងខ្លាំង ដើម្បីធ្វើឲ្យមានរឿងនោះកើតឡើង ។ ព្រះអង្គសង្គ្រោះបានបង្រៀនថា « ដ្បិតប្រាកដមែន យើងប្រាប់អ្នករាល់គ្នាជាប្រាកដថា អស់អ្នកណាដែលមានវិញ្ញាណនៃការទាស់ទែងគ្នា គឺពុំមែនជារបស់ផងយើងទេ ប៉ុន្តែជារបស់ផងអារក្សវិញ ដែលជាបិតានៃការទាស់ទែងគ្នា ហើយវាចាក់រុកចិត្តមនុស្ស ឲ្យមានកំហឹងទាស់ទែងនឹងគ្នាទៅវិញទៅមក » ( នីហ្វៃទី៣ ១១:២៩ ) ។

ប៉ុន្ដែ សូមកុំភ័យឡើយ ! ដំណឹងល្អបង្រៀនយើងថា មានអ្វីៗជាច្រើនដែលយើងអាចធ្វើបាន ដើម្បីកាត់បន្ថយការទាស់ទែងគ្នានៅក្នុងក្រុមគ្រួសាររបស់យើង—ហើយដកពិសោធន៍នៃអំណរដ៏មហិមា !

គន្លឹះទី ១ ៖ ដកយកសាំងចេញ

ភ្លើងត្រូវការសាំងដើម្បីឆេះ ។ ការទាស់ទែងគ្នាក៏ដូចគ្នាដែរ ។ ហើយគ្មានអ្វីបញ្ឆេះការឈ្លោះប្រកែកគ្នាបាន ដូចជាការប្រកែកគ្នាកាន់តែខ្លាំងនោះទេ ។ ដូច្នេះ តើអ្នកអាចធ្វើអ្វីបាន ប្រសិនបើនរណាម្នាក់ចាប់ផ្ដើមប្រកែកជាមួយនឹងអ្នកនោះ ?

មែនហើយ សាមញ្ញណាស់ អ្នកអាចបដិសេធមិនប្រកែកតបតវិញបាន ។ ព្រះអង្គសង្គ្រោះគឺជាគំរូដ៏ល្អឥតខ្ចោះរបស់យើងអំពីការណ៍នេះ ។ ពេញមួយការងារបម្រើរបស់ទ្រង់ ទ្រង់ត្រូវបានគេស្អប់ ធ្វើបាប ក្បត់ និងទីបញ្ចប់ត្រូវបានគេឆ្កាង ។ ប៉ុន្ដែ ទោះបីជាចម្លើយរបស់ទ្រង់មានបន្ទូលហាក់ដូចជាធ្ងន់ និងចំៗក្ដី ក៏ទ្រង់មិនដែលមានវិញ្ញាណនៃការទាស់ទែងគ្នាដែរ ។ ហើយនៅទីបញ្ចប់ ទ្រង់មិនតបតវិញទេ ទោះបីជាទ្រង់អាចហៅ « ពួកទេវតា ១២ កងមក » ជាជំនួយដល់ទ្រង់ក៏ដោយ ( ម៉ាថាយ ២៦:៥៣ ) ។ ផ្ទុយទៅវិញ ទ្រង់បានអធិស្ឋានសម្រាប់ពួកមារសត្រូវរបស់ទ្រង់ ទោះបីជាទ្រង់ជាប់នៅលើឈើឆ្កាងក្ដី ( សូមមើល លូកា ២៣:៣៤ ) ។

ការបដិសេធមិនប្រកែកតបត អនុញ្ញាតឲ្យអ្នកក្លាយជាអ្នកស្ដាប់ដ៏ប្រសើរម្នាក់ ។ ហើយនៅពេលយើងស្ដាប់បានច្រើន នោះយើងអាចប្រាស្រ័យទាក់ទងគ្នាបានកាន់តែប្រសើរ ហើយក្លាយជាអ្នកផ្សះផ្សាម្នាក់ ។ ការបដិសេធមិនប្រកែកគ្នា ក៏រួមមានទាំងការឆ្លើយតបដោយសំឡេងតូចស្ងប់ ហើយធ្វើអ្វីដែលយើងអាចធ្វើបាន ដើម្បីគ្រប់គ្រងអារម្មណ៍របស់យើងឲ្យបានផងដែរ ។

ពេលគ្មានសាំងចាក់បន្ថែម នោះការប្រកែកគ្នា និងការទាស់ទែងគ្នាភាគច្រើននឹងរសាយបន្ដិចម្ដងៗ ។ ដូចព្រះគម្ពីរបង្រៀនថា« ពាក្យតបឆ្លើយដោយស្រទន់ នោះរមែងរំងាប់សេចក្តីក្រោធទៅ » ( សុភាសិត ១៥:១ ) ។

គន្លឹះទី ២ ៖ បង្ហាញសេចក្ដីស្រឡាញ់

ការបង្ហាញសេចក្ដីស្រឡាញ់ដល់សមាជិកគ្រួសាររបស់អ្នក គឺជារបៀបដ៏ល្អបំផុតមួយ ដើម្បីរក្សាជម្លោះឲ្យនៅក្រៅគេហដ្ឋាន ។ ការធ្វើដូច្នោះអាចថែមទាំងបញ្ឈប់ការទាស់ទែងគ្នាកុំឲ្យកើតមានពីដំបូងទៀតផង !

ប៉ុន្ដែ ទោះជានៅពេលការទាស់ទែងគ្នា បាន កើតឡើងដោយមិនដឹងខ្លួនក្ដី ក៏សេចក្ដីស្រឡាញ់ និងការមានសណ្ដានចិត្តល្អ នៅតែអាចស្ដាររឿងជាច្រើនឡើងវិញបានដែរ ។

សូមពិចារណាពីដំណើររឿងព្រះគម្ពីរប៊ីប ដែលស្ដ្រីម្នាក់បានប្រព្រឹត្តអំពើសហាយស្មន់ ។ យោងទៅតាមក្រឹត្យវិន័យរបស់ម៉ូសេ នោះនាងគួរតែត្រូវបានគេចោលនឹងថ្ម ។ ហ្វូងមនុស្សដ៏ខឹងសម្បារបានទាមទារថា ព្រះយេស៊ូវត្រូវតែដាក់ទោសនាង ។

ប៉ុន្ដែ តើព្រះអង្គសង្គ្រោះបានឆ្លើយតបយ៉ាងដូចម្ដេច ? ទីមួយ ទ្រង់មិនបានឆ្លើយតបនឹងការទាមទាររបស់ពួកគេភ្លាមៗនោះទេ ។ ទ្រង់បានលុតជង្គង់ចុះ ហើយបានគូរនៅលើដីមួយសន្ទុះ មុនពេលទ្រង់មានបន្ទូល ។ ( តម្រុយ ៖ ពេលខ្លះ វាល្អបំផុតដែល មិន ឆ្លើយតបភ្លាមៗ ពេលអារម្មណ៍កំពុងតែខឹងខ្លាំង ) ។

បន្ទាប់មក ទ្រង់បានបង្ហាញសេចក្ដីស្រឡាញ់ និងសេចក្ដីមេតា្តករុណាដល់ស្ដ្រីរូបនោះ នៅពេលទ្រង់បានប្រាប់ហ្វូងមនុស្សថា « អ្នកណាដែលគ្មានបាបសោះ ចូរឲ្យអ្នកនោះចោលនាងនឹងថ្មជាមុនគេចុះ » ( យ៉ូហាន ៨:៧ ) ។

ព្រះយេស៊ូវបានប្រព្រឹត្តចំពោះស្ដ្រីនោះដោយសេចក្ដីស្រឡាញ់ មិនមែនដាក់ទោសនោះទេ ។ ទ្រង់បានបង្ហាញព្រះទ័យអភ័យទោសរបស់ទ្រង់ដល់នាង នៅពេលទ្រង់បានអញ្ជើញនាងឲ្យ « អញ្ជើញទៅចុះ តែកុំធ្វើបាបទៀតឡើយ » ( យ៉ូហាន ៨:១១ ) ។

សូមប្រាប់សមាជិកគ្រួសាររបស់អ្នកថា អ្នកស្រឡាញ់ពួកគេ ។ សូមបង្ហាញសេចក្ដីស្រឡាញ់នោះ តាមរយៈការអភ័យទោសឲ្យពួកគេ និងការអនុញ្ញាតឲ្យពួកគេកែខ្លួន—ទោះបីជាពួកគេកំពុងខឹងនឹងអ្នកក្ដី ។ សេចក្ដីស្រឡាញ់អាចធ្វើឲ្យមានភាពខុសគ្នាទាំងស្រុង ។

គន្លឹះទី ៣ ៖ អធិស្ឋាន

ការអធិស្ឋាននាំមកនូវពរជ័យរបស់ព្រះនៅក្នុងជីវិតរបស់យើង ។ នៅក្នុងព្រះគម្ពីរមរមន អាមូលេកបានបង្រៀនថា « អ្នករាល់គ្នាត្រូវបញ្ជាក់បញ្ចេញព្រលឹងរបស់ខ្លួននៅក្នុងបន្ទប់របស់អ្នក និងនៅក្នុងទីសម្ងាត់របស់អ្នក និងនៅក្នុងទីរហោស្ថានរបស់អ្នក ។

« មែនហើយ … ចូរអ្នករាល់គ្នាមានចិត្តពោរពេញដោយការអធិស្ឋានដល់ទ្រង់ជានិច្ច ដើម្បីសុខុមាលភាពរបស់អ្នក និងដើម្បីសុខុមាលភាពដល់ជនទាំងឡាយ ដែលនៅជុំវិញអ្នកផង » ( អាលម៉ា ៣៤:២៦–២៧ ) ។

ប្រាកដណាស់ « ជនទាំងឡាយដែលនៅជុំវិញអ្នក » រួមមានគ្រួសាររបស់អ្នក—ព្រមទាំងអ្នកដែលមិនរស់នៅជាមួយអ្នកនាពេលនេះផងដែរ ។ ដូច្នេះ សូមអធិស្ឋានសម្រាប់គ្រួសាររបស់អ្នក ។ សូមអធិស្ឋាន សម្រាប់ គ្រួសាររបស់អ្នក ។ សូមអធិស្ឋានថា អ្នកអាចគ្រប់គ្រងអារម្មណ៍របស់ខ្លួនឯងបាន នៅពេលនរណាម្នាក់ធ្វើឲ្យអ្នកអាក់អន់ចិត្ត ។ សូមអធិស្ឋានថា អ្នកនឹងដឹងពីរបៀបឆ្លើយតបទៅនឹងស្ថានភាពដ៏តានតឹងនោះ ដែលកើតឡើងនៅក្នុងគ្រួសាររបស់អ្នក ។ សូមអធិស្ឋានរកជំនួយពីសួគ៌ា ។ សូមអធិស្ឋានរកសំណើច និងក្ដីស្រឡាញ់បន្ថែមទៀតឲ្យចូលមកក្នុងគេហដ្ឋានរបស់អ្នក ។ ហើយបន្ទាប់មក សូមធ្វើអ្វីៗទាំងអស់ដែលអ្នកអាចធ្វើបាន ដើម្បីធ្វើឲ្យការណ៍នោះអាចកើតឡើងបាន ។

នៅពេលអ្នកខិតខំរស់នៅតាមដំណឹងល្អរបស់ព្រះយេស៊ូវគ្រីស្ទឲ្យបានកាន់តែពេញលេញ នោះអ្នកនឹងឃើញថា គ្រួសាររបស់អ្នកនឹងមានពរជ័យផងដែរ ។ ការទាស់ទែងគ្នានឹងថយចុះ ហើយអំណររបស់អ្នកនឹងកើនឡើង ។