« ព្រះអាចជួយយើងនៅក្នុងគ្រាលំបាកបាន » ដើម្បីកម្លាំងនៃយុវជន ខែ មីនា ឆ្នាំ ២០២២ ។
ព្រះអាចជួយយើងនៅក្នុង គ្រាលំបាកបាន
ព្រះយេស៊ូវគ្រីស្ទជ្រាបពីរបៀបដើម្បីជួយយើងម្នាក់ៗ មិនថាយើងមានការសាកល្បងអ្វីខ្លះនោះទេ ។
ព្រះអង្គសង្គ្រោះបានយាងនៅលើទឹក ដោយ វ៉លធើរ រេន
ខ្ញុំនៅចាំពីអារម្មណ៍ពេលខ្ញុំនៅវ័យជំទង់ ពេលរស់នៅក្នុងគ្រាមួយ ដែលហាក់ដូចជាគ្រាដ៏លំបាក ។ មានសង្គ្រាមលោករាលដាលយ៉ាងរហ័ស ។ ពួកយុវជនដែលអាយុបងខ្ញុំតែបន្ដិចប៉ុណ្ណោះបានស្លាប់នៅក្នុងសឹកសង្គ្រាម ។ មានពួកបងធំវាយដំគ្នានៅតំបន់ជិតៗនោះ ។ ហើយវិបត្តិសេដ្ឋកិច្ចនៅទូទាំងពិភពលោកក៏មិនទាន់ចប់នៅឡើយ ហើយមានមនុស្សក្រីក្រយ៉ាងច្រើន ។ គ្រួសារខ្ញុំ និងខ្ញុំគឺជាពួកបរិសុទ្ធថ្ងៃចុងក្រោយតែឯងនៅក្នុងទីក្រុង ដែលយើងបានរស់នៅ ។
ប៉ុន្តែខ្ញុំបានរីករាយ និងមានសុទិដ្ឋិនិយម ។ ខ្ញុំត្រូវបានបង្រៀន ដូចដែលក្មួយៗត្រូវបានបង្រៀនដែរថា ការសាកល្បងរបស់យើងអាចជាពរជ័យ ប្រសិនបើការសាកល្បងទាំងនោះបង្វែរយើងឲ្យទៅរកជំនួយពីព្រះវរបិតាសួគ៌ និងព្រះអង្គសង្គ្រោះនោះ ។
ហេតុអ្វីមានការសាកល្បង ?
ការសាកល្បងនានាផ្ដល់ឱកាសដ៏មានតម្លៃ ឲ្យយើងជ្រើសរើសដើម្បីអនុវត្តសេចក្ដីជំនឿ ។ យើងអាចសូមជំនួយមកពីព្រះយេស៊ូវគ្រីស្ទនៅក្នុងការអធិស្ឋានបាន ទ្រង់ជ្រាបពីរបៀបដើម្បីជួយដល់យើង ។ ទ្រង់បានដកពិសោធន៍គ្រប់ការសាកល្បងទាំងអស់ ដែលយើងនឹងជួបប្រទះ ។ ទ្រង់ជ្រាបពីរបៀបដើម្បីជួយពួកយើងម្នាក់ៗយ៉ាងឥតខ្ចោះ ។ ហើយទ្រង់ស្រឡាញ់ពួកយើង ។
គោលបំណងនៃឧបសគ្គទាំំងឡាយនៅក្នុងជីវិត គឺដើម្បីមើលឃើញអ្វីដែលយើងនឹងជ្រើសរើសធ្វើ ។ តើយើងនឹងអនុវត្តសេចក្ដីជំនឿ ដើម្បីកាន់តាមបទបញ្ញត្តិទាំងឡាយដែលទ្រង់បានប្រទានដល់យើង មិនថាយើងជួបនឹងការសាកល្បងអ្វីដែរឬទេ ? ព្រះដែលពេញដោយក្ដីស្រឡាញ់ ទ្រង់តែងតែធ្វើអ្វីដែលល្អបំផុតសម្រាប់យើងជានិច្ច ។ ទ្រង់អាចដកយក ឬបន្ថយការសាកល្បងរបស់យើងបាន ប្រសិនបើការណ៍នោះនឹងពង្រឹងសេចក្ដីជំនឿរបស់យើង ។ នៅគ្រាផ្សេងទៀត ទ្រង់មិនអាចនោះទេ ។
នៅពេលក្មួយៗបានសិក្សាពីជីវិតរបស់ពួកព្យាការីពីដើមនៅក្នុងព្រះគម្ពីរសញ្ញាចាស់ ក្មួយៗនឹងឃើញពីរបៀបដែលព្រះអម្ចាស់ជួយយើងមួយជំហានម្ដងៗ ឲ្យក្រោកឈរឡើងចេញពីគ្រាលំបាកទាំងឡាយ ។ ឧទាហរណ៍ របៀបរបស់ព្រះអម្ចាស់ក្នុងការជួយដល់ យ៉ូសែប និង ម៉ូសេ បានបង្រៀនខ្ញុំពីរបៀបដើម្បីសូមជំនួយ និងទទួលបានជំនួយនៅក្នុងគ្រាលំបាកនានា ។
ការសាកល្បងរបស់យ៉ូសែប
យ៉ូសែប ដែលជាកូនប្រុសសំណព្វរបស់យ៉ាកុប ត្រូវបានបោះចូលទៅក្នុងរណ្ដៅមួយដោយពួកបងប្រុសរបស់លោក រួចហើយត្រូវបានលក់ជាទាសករនៅស្រុកអេស៊ីព្ទ ។ ពួកបងប្រុសរបស់លោកបានប្រាប់ទៅឪពុករបស់លោកថា លោកបានស្លាប់ហើយ ។ ខណៈពេលដែលយ៉ូសែបជាអ្នកបម្រើទាសករ នោះព្រះអម្ចាស់បានប្រទានដល់លោកនូវអំណាច ដើម្បីបកស្រាយសុបិនរបស់ស្ដេចផារ៉ោន ។ ទ្រង់បានបង្ហាញដល់យ៉ូសែបពីរបៀប ដែលស្រុកអេស៊ីព្ទអាចដោះស្រាយវិបត្តិគ្រោះទុរភិក្សនាពេលអនាគតមួយ ។ ទ្រង់បានប្រទានដល់យ៉ូសែបនូវកម្លាំងខាងសីលធម៌ ដើម្បីប្រឆាំងនឹងការល្បួង ដើម្បីបានដោះលែងចេញពីគុក ហើយនៅអាយុ ៣២ ឆ្នាំ បានឡើងធ្វើជាមន្ដ្រីជាន់ខ្ពស់របស់ស្ដេចផារ៉ោន ។ ស្ដេចផារ៉ោនបានមានបន្ទូលអំពីយ៉ូសែបថា « តើយើងនឹងរកមនុស្សឯណាឲ្យដូចមនុស្សនេះ ដែលមានព្រះវិញ្ញាណរបស់ព្រះសណ្ឋិតនឹងគាត់បាន ? »១
មេរៀនមួយសម្រាប់ខ្ញុំចេញពីរបៀប ដែលព្រះអម្ចាស់បានជួយដល់យ៉ូសែប គឺជារបៀបដែលទ្រង់អាចជួយយើងនៅក្នុងគ្រាលំបាកនានាបាន ។ នៅពេលយ៉ូសែបបានបន្ដជ្រើសរើសត្រឹមត្រូវ នោះព្រះអម្ចាស់បានពង្រឹងយ៉ូសែប បានប្រទានអំណាចខាងវិញ្ញាណដល់លោក និងបានបន្ទន់ដួងចិត្តរបស់មនុស្សនៅជុំវិញខ្លួនលោក ។
ម៉ូសេឃើញព្រះយេហូវ៉ា ដោយ យ៉ូសែប ប្រ៊ីកឃី
ការសាកល្បងរបស់ម៉ូសេ
ដូចគ្នានេះដែរ ជំនួយរបស់ព្រះអម្ចាស់ទៅកាន់ម៉ូសេនៅក្នុងការសាកល្បងរបស់លោក គឺស្រដៀងគ្នាទៅនឹងជំនួយរបស់ទ្រង់ទៅកាន់យ៉ូសែបដែរ ។ ការសាកល្បងរបស់ម៉ូសេក៏បានចាប់ផ្ដើមនៅក្នុងយុវវ័យរបស់លោកផងដែរ ។ ម៉ូសេបានបែកចេញពីឪពុកម្ដាយរបស់លោក ។ ការសាកល្បងដំបូងគេរបស់លោកគឺ ការត្រូវបានបុត្រីរបស់ស្ដេចផារ៉ោនយកមកចិញ្ចឹម ។ ដើម្បីការពារសាសន៍អ៊ីស្រាអែលម្នាក់ នោះលោកបានសម្លាប់សាសន៍អេស៊ីព្ទម្នាក់ ហើយត្រូវគេចខ្លួនទៅកាន់ទីរហោស្ថាន ។
ព្រះអម្ចាស់បានបង្ហាញព្រះកាយដល់ម៉ូសេ ហើយបានហៅលោកឲ្យដោះលែងកូនចៅអ៊ីស្រាអែលចេញពីសេវកភាពនៅស្រុកអេស៊ីព្ទ ។ កិច្ចការដែលមើលទៅហាក់ដូចជាមិនអាចទៅរួចនោះ គឺជាការសាកល្បងមួយ ដែលម៉ូសេមានអារម្មណ៍ថាហួសពីសមត្ថភាពរបស់លោក ។ ការសាកល្បង និងឧបសគ្គដ៏លំបាកបំផុតនៅក្នុងជីវិតរបស់ក្មួយៗ អាចកើតមាន នៅពេលក្មួយៗទទួលបានកិច្ចការមួយមកពីព្រះអម្ចាស់ ដែលមើលទៅហាក់ដូចជាពិបាកខ្លាំងពេក ហើយក្មួយៗមានអារម្មណ៍ថា ក្មួយៗត្រូវការជំនួយពីព្រះ ។
ព្រះអម្ចាស់បានចាប់ផ្ដើមដោយការប្រទានជំនួយដល់ម៉ូសេ ជាជំនួយដែលក្មួយនឹងត្រូវការ ។ ទ្រង់បានមានបន្ទូលទៅម៉ូសេថា គឺជាទ្រង់ដែលបានពង្រឹងលោកឲ្យឆ្លងកាត់ការសាកល្បងដែលនៅខាងមុខលោក ។
« យើងជាព្រះដ៏ជាព្រះ … ឯងត្រូវឆ្លើយប្រាប់ដល់ពួកកូនចៅអ៊ីស្រាអែលដូច្នេះថា ព្រះដ៏ជាព្រះទ្រង់បានចាត់ឲ្យខ្ញុំមកឯអ្នករាល់គ្នា » ។២ ដោយមានការធានាអះអាងនោះ ម៉ូសេទទួលបានសេចក្ដីជំនឿ និងកម្លាំងសម្រាប់ការសាកល្បងជាបន្ដបន្ទាប់នៅចំពោះមុខលោក នៅក្នុងកិច្ចការដែលបានចាត់តាំងរបស់លោក ។ ព្រះអម្ចាស់មិនត្រឹមតែបានហៅលោកនោះទេ ប៉ុន្ដែព្រះអម្ចាស់ក៏បានយាងទៅចំពោះមុខលោកតាមរបៀប ដែលប្រកបដោយអព្ភូតហេតុជាច្រើនផងដែរ ។
ពន្លឺនៃលោកិយ ដោយ វ៉លធើរ រេន
ការសាកល្បងរបស់ក្មួយៗ
គ្រាលំបាកនានាដែលក្មួយៗ និងខ្ញុំប្រឈមមុខនឹងមានលក្ខណៈខុសៗគ្នា ។ គ្មានជីវិតពីរណាដែលដូចគ្នាទាំងស្រុងនោះទេ ។ ការសាកល្បងទាំងឡាយគឺដាក់ឲ្យត្រូវនឹងយើងម្នាក់ៗ ដោយព្រះវរបិតាសួគ៌ជាទីស្រឡាញ់ និងព្រះរាជបុត្រាសំណព្វរបស់ទ្រង់ គឺព្រះយេស៊ូវគ្រីស្ទ ។ របៀបដែលទ្រង់ទាំងទ្វេឆ្លើយតបទៅនឹងការអធិស្ឋានសូមជំនួយរបស់យើង នឹងជាអ្វីដែលល្អបំផុតសម្រាប់យើង ។ សម្រាប់មនុស្សមួយចំនួន វាអាចជាការពង្រឹងដល់យើង ហើយសម្រាប់អ្នកខ្លះទៀត វាអាចជាការផ្ដល់អំណរដល់យើង នៅពេលយើងពុះពារដោយសេចក្ដីជំនឿ ។
សម្រាប់ពួកយើងទាំងអស់គ្នា ជំនួយដែលយើងត្រូវការខ្លាំងបំផុត នៅពេលយើងជួបនឹងការសាកល្បង មិនថាតាមរបៀបណា និងរយៈពេលយូរប៉ុណ្ណានោះទេ ជំនួយនោះគឺជាសេចក្ដីជំនឿដ៏រស់រវើកទៅលើព្រះយេស៊ូវគ្រីស្ទ ។ វាគឺជាសេចក្ដីជំនឿនោះឯង ដែលបានធ្វើឲ្យយ៉ូសែបបកស្រាយសុបិននៅស្រុកអេស៊ីព្ទបាន ។ វាគឺជាសេចក្ដីជំនឿដ៏រឹងមាំទៅលើព្រះយេស៊ូវគ្រីស្ទនោះឯង ដែលបានធ្វើឲ្យម៉ូសេក្លាហាន និងពង្រឹងដល់លោកនៅក្នុងកិច្ចការដ៏លំបាករបស់លោក ដើម្បីជួយព្រះអម្ចាស់ដោះលែងរាស្ដ្ររបស់ទ្រង់ ។
នៅក្នុងយុវវ័យរបស់ក្មួយៗ ក្មួយៗបានជួបនឹងការសាកល្បងក្នុងគ្រាលំបាកនានារួចហើយ ដូចជាខ្ញុំបានជួបដែរ ។ ប៉ុន្ដែ ក្មួយៗត្រូវបានបង្រៀនឲ្យទុកចិត្តលើព្រះយេស៊ូវគ្រីស្ទដូចជាខ្ញុំដែរ ។ ខ្ញុំដឹងនៅពេលនេះថា ហេតុអ្វីខ្ញុំមានអារម្មណ៍សុទិដ្ឋិនិយមបែបនោះ ក៏ដូចជាមានសេចក្ដីអំណរនោះនៅពេលខ្ញុំនៅក្មេង ។ វាមិនមែនមានន័យថា ខ្ញុំរំពឹងឲ្យគ្រាទាំងនោះបានប្រសើរឡើង ឬងាយស្រួលជាងមុននោះទេ ។ វាគឺថា ខ្ញុំមានទំនុកចិត្តថា ប្រសិនបើខ្ញុំទុកចិត្តលើទ្រង់ និងបម្រើទ្រង់ នោះអ្វីៗទាំងអស់នឹងហាក់ដូចជាងាយស្រួល ។
ជីដូនរបស់ខ្ញុំបានសុំឲ្យឪពុករបស់ខ្ញុំច្រៀងជាមួយនឹងគាត់នៅតាមផ្លូវទៅផ្ទះវិញ បន្ទាប់ពីពេទ្យបានប្រាប់គាត់ថា គាត់នឹងស្លាប់ដោយសារជំងឺមហារីកក្នុងពេលឆាប់ៗនេះ ៖ « ហើយបើយើងស្លាប់មុនពេលដំណើរយើងចប់ … ស្រួលទាំងអស់ ! ស្រួលទាំងអស់ ! »៣ ខ្ញុំថ្លែងជាសាក្សីដល់ក្មួយៗថា ព្រះយេស៊ូវគ្រីស្ទដែលបានមានព្រះជន្មរស់ឡើងវិញ ជ្រាបពីរបៀបដើម្បីជួយយើងម្នាក់ៗ មិនថាយើងមានការសាកល្បងអ្វីខ្លះនោះទេ ។ យើងគ្រាន់តែត្រូវទូលសូមដល់ទ្រង់ដោយសេចក្ដីជំនឿប៉ុណ្ណោះ ។
ព្រះយេស៊ូវគ្រីស្ទស្រឡាញ់ក្មួយៗ ហើយនឹងជួយក្មួយៗ នៅគ្រប់ពេលទាំងអស់ ហើយស្របទៅតាមអ្វីដែលល្អបំផុតសម្រាប់ក្មួយៗ ។ ខ្ញុំសូមថ្លែងទីបន្ទាល់ដូច្នេះ ដោយក្ដីស្រឡាញ់ចំពោះក្មួយៗ និងចំពោះទ្រង់ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។