“Tri Smol Tingting blong No Gat Tumas Agens Insaed long Famli blong Yu,” Blong Ol Yut Oli long Famli, Maj 2022.
Help blong Laef
Tri Smol Tingting blong No Gat Tumas Agens Insaed long Famli blong Yu
?Weswe? ?Famli blong yu i raorao samtaem? Yu no stap yuwan.
Pikja droing i kam long Alyssa M. Gonzalez
-
“!Hem i no stret! !Hem i taem blong mi nao!”
-
“!Ei! !Yu no askem blong yusum hemia!”
-
“!Papa! !Anita i soem tang blong hem long mi!”
Sapos yu haremsave eniwan long ol toktok ia, maet yu yu pat blong wan famli. Mo i no gat wan famli we i no gat sam kaen smol raorao olsem. Elda David A. Bednar blong Kworom blong Olgeta Twelef Aposol, wan taem, i bin serem se ol pikinini blong hem oli bin stap komplen: “Mama, !hem i stap hambak tumas long mi!”1
Hem i nomol blong i gat smol agens insaed long wan famli. I tru we, i gat wan i stap wok had tumas blong mekem evri samting ia i hapen. Sevya i bin tijim hemia i klia: “Hem we i gat spirit blong raorao i no blong mi, be hem i blong devel, we i papa blong raorao, mo hem i tantanem hat blong ol man blong raorao wetem kros, wan wetem narawan.” (3 Nifae 11:29).
!Be yu no fraet! Gospel i stap tijim yumi se i gat plante samting we yumi save mekem blong daonem fasin blong agens insaed long ol famli blong yumi—!mo save stap filim plante glad!
Tingting 1: Karemaot Faeawud
Faea i nidim faeawud blong i laet. Fasin blong agens i semmak. Mo i no gat wan samting i save laetem wan raorao bitim fasin blong gohed blong raorao. So,?Wanem nao yumi save mekem sapos wan i stat blong raorao wetem yu?
Okei. Yu no akseptem blong yu raorao. Sevya i stret eksampol ia blong yumi long saed ia. Truaot long seves blong Hem, oli no laekem Hem nating, oli no tritim gud Hem, oli salem Hem, mo long en, oli hangem Hem antap long kros. Yet, iven taem ol ansa blong hem oli strong mo oli tok stret long man, Hem i neva gat wan spirit blong agens o raorao. Mo long en, Hem i no faetbak, iven taem Hem i bin save singaotem “ol enjel, we oli moa long twelef kampani blong ol soldia” blong kam helpem Hem (Matiu 26:53). Be Hem i no mekem; Hem i prea from ol enemi blong Hem, iven taem Hem i hang long kros (luk long Luk 23:34).
Fasin blong no akseptem blong raorao bae i letem yu yu kam wan we i save lisin gud moa. Mo taem yumi lisin gud moa, yumi save toktok gud moa, mo kam wan we i mekem pis. Fasin blong no akseptem blong raorao, i tekem tu blong ansa wetem wan voes we i kwaet, mo mekem wanem yumi save mekem blong holemtaet ol filing blong yumi insaed.
Sapos yumi no ademap faeawud i go, bae plante fasin blong no agri mo stap agens bae oli go lus. Olsem we skripja i stap tijim: “Sapos yu toktok gud long man we i kros, bambae yu save mekem tingting blong hem i kam kwaet” (Proveb 15:1).
Tingting 2: Soem Lav
Blong stap soem lav long ol memba blong famli blong yu, i wan long ol wei we i gud moa blong kipim raorao i stap aotsaed long hom. !Taem yu mekem olsem, yu save stopem fasin blong agens o raorao blong i kamkamaot long fas ples!
Be yet, iven taem fasin blong agens o raorao i kam, i faenem rod blong kamtru long fanis, bae lav mo fasin we i kaen bae i stil save tantanem ol samting.
Tingting long Baebol stori blong woman we i bin mekem adaltri. Folem loa blong Moses, oli mas stonem hem. Wan grup blong ol pipol we oli kros i stap, oli bin askem Jisas blong i panisim hem.
?Be wanem nao ansa blong Sevya? Faswan, Hem i no ansa kwik long wanem we oli bin stap askem. Hem i nildaon mo Hem i dro long das blong wan smol taem bifo Hem i toktok. (Tingting: samtaem i gud moa blong no ansa kwik taem ol filing oli nogud tumas.)
Afta, Hem i soem lav mo sore long woman ia taem Hem i talem long grup blong ol pipol se: “Wan long yufala we i no mekem sin samtaem, i gud hem i faswan blong stonem woman ya” (Jon 8:7).
Jisas i bin tritim woman ia wetem lav, mo i no panisim hem. Hem i soem se Hem i wantem blong fogivim hem, mo Hem i invaetem hem blong “gohom, mo yu nomo mekem sin bakegen” (Jon 8:11).
Talem long ol memba blong famli blong yu se yu lavem olgeta. Soem lav ia taem yu fogivim olgeta mo yu letem olgeta blong oli jenis—iven sapos oli stap mekem se oli kros long yu. Lav i save mekem evri samting ia i kam defren.
Tingting 3: Prea
Fasin blong stap prea i tekem ol blesing blong God i kam insaed long laef blong yumi. Insaed long Buk blong Momon, Amulek i tijim: “Yufala i mas kapsaetem sol blong yufala long prea taem yufala i stap insaed long rum blong yufala, mo insaed long ol sikret ples blong yufala, mo long waelples blong yufala.
Yes, … letem hat blong yufala i stap fulap, we oltaem i stap prea long hem from gudlaef blong yufala, mo tu, from gudlaef blong olgeta we oli stap raon long yufala” (Alma 34:26–27).
I tru, “olgeta we oli stap raon long yufala” i tekem famli blong yu tu—iven olgeta we oli no stap laef wetem yufala naoia i stap. So, prea wetem famli blong yu. Prea from famli blong yu. Prea se bae yu save kipim maen blong yu long kontrol taem wan i mekem yu yu harem nogud. Prea se bae yu save olsem wanem blong fesem ol situesen we oli strong, we oli save kam antap insaed long famli blong yu. Prea from help we i kam long heven. Prea blong i gat moa laflaf mo lav i kam insaed long hom blong yu. Mo afta, mekem evri samting we yu save mekem blong hemia i hapen.
Taem yu stap traehad blong laef folem gospel blong Jisas Kraes moa fulwan, bambae yu faenem se, famli blong yu tu, i kasem blesing. Fasin blong agens o raorao, bae i kamdaon, mo ol glad blong yufala bae oli kam antap moa.