“Prishud Paoa long Taem blong Wol Sik Ia,” Blong Ol Yut Oli Kam Strong, Maj 2022.
Stamba Toktok Ia mo Mi
Ol yut oli serem olsem wanem oli stap laef folem ol toktok we oli stap long Stamba Toktok blong Ol Yang Woman, mo hemia blong Aronik Prishud
Prishud Paoa long Taem blong Wol Sik Ia
“Bae mi lavem God, … mo yusum prishud blong Hem blong givim seves long ol narawan, statem long hom blong miwan.”
Foto i kam long Getty Images
Taem yumi stat blong gat jos long hom from KOVID-19 wol sik ia, mi bin help blong givim sakramen i go long famli blong mi. I bin naes tumas blong save mekem hemia insaed long hom blong miwan, mo i mekem mi luksave olsem wanem mi talem tangkyu from sakramen. Mi talem tangkyu we mi bin save laef tru long taem ia blong gat jos long hom.
Wan long ol neba blong mifala i nidim wan blong tekem sakramen i go long hem. I no gat wan insaed long hom blong hem we i save rere o blesem sakramen from se hasban blong mi i bin ded finis sam yia i pas. Sista ia i stap lukaotgud tu long huia i stap go visitim hem, from wol sik ia. Papa blong mi mo mi, mitufala i givhan brata blong hem, mekem se mifala i talem se mifala i save pasem sakramen long hem mo semtaem werem ol mask, mo lukaotgud blong folem sefti rul blong hem i stap sef.
Hem i bin glad tumas se mitufala i bin save go. Hemia i bin mekem mi mi harem nogud smol se hem i stap hemwan, from se hem i stastap hemwan nomo long taem blong wol sik ia. Be tu, mi mi talem tangkyu se mi save givim hem wan samting we i impoten, we i mekem hem i hapi. I bin naes blong save gat janis ia blong givim seves long hem. I bin mekem mi tu mi hapi se papa blong mi, mo mi, i bin save go mo givim seves long neba blong mifala.
Mi talem tangkyu se mi gat prishud from se i givim gud samting long mi, be tu, long ol nara pipol. I helpem mi blong kam wan moa gud man, mo i helpem mi blong luk olsem wanem mi save givim seves long ol narawan. Blong stap pasem sakramen long hom blong mi mo long hom blong neba blong mi, i bin openem ae blong mi. Mi nidim blong tekem spesel janis ia blong pasem sakramen mo givim seves long ol pipol we oli no save mekem samting olgetawan. Mi talem tangkyu se mi bin save yusum prishud ia blong blesem ol nara pipol mo famli blong mi.
Hem we i raet i stap long Yuta, YSA.