“Olsem Wanem blong Fesem Trifala Kaen Tes,” Blong Ol Yut Oli Kam Strong, Maj 2022.
Kam Folem Mi
Olsem Wanem blong Fesem Trifala Kaen Tes
Laef i gat plante defren kaen jalenj, be blong tanem yumi i go long God, oltaem hem i stret ansa.
Ol pikja droing oli kam long Simini Blocker
From fasin blong jalus, ol brata blong Josef oli bin salem hem olsem wan slef, mo afta, oli talem long papa blong olgeta se sam animol oli kilim Josef i ded.
Josef ia blong Ijip, i save askem plante kwestin abaot wei we laef blong hem i stap go. Bambae yufala i stadi long laef blong hem long manis ia, be hemia wan kwik sot toktok abaot wanem i bin hapen long hem:
-
Ol brata blong hem oli salem hem olsem wan slef.
-
Olsem wan slef, oli poenem fingga long hem, we hem i no rong, se hem i bin traem blong silip wetem waef blong masta blong hem.
-
Afta, hem i kam wan prisena blong tu longfala yia.
Traem tingting se, yu bae yu harem olsem wanem, sapos yu yu Josef. Maet bae yu gat temtesen blong askem: “?From wanem mi?” “?Wanem nao mi mekem blong kasem ol samting ia?”
Nomata we hem i no mekem wan rong samting, Josef i go long kalabus blong tu longfala yia.
Ol Trifala Kaen Tes
Elda Neal A. Maxwell (1926–2004) blong Kworom blong Olgeta Twelef Aposol, wan taem, i bin tijim ol trifala kaen tes we yumi save fesem long laef ia:
-
1: Ol tes we oli kam from ol sin o ol mistek blong yumiwan nomo.
-
2: Ol tes we oli hapen from wol ia we i foldaon, we i fulap long sik, ol bigfala sik, mo ol pipol we oli foldaon.
-
3: Ol tes we God i glad blong yumi gotru long olgeta from se Hem i wantem yumi blong groap.
Long medel blong wan tes, maet bae yu gat temtesen blong askem, “?From wanem mi?” Be kwestin ia, i no wan gudfala kwestin olsem we yumi stap hop long hem. Elda Maxwell i raetem se, nomata from wanem yumi gat wan tes, “risal blong hem bae i semmak long eni wei; God i glad blong yumi gotru long jalenj ia. Yet, Hem i promesem se gladhat blong Hem bae i bigwan inaf blong yumi.”1 Long nara toktok, Papa long Heven i no save letem yumi gotru long ol tes sapos Hem i no givim yumi, help ia we yumi nidim, tru long Atonmen blong Jisas Kraes.
Eksampol blong Josef
Bae yumi lukluk kwiktaem long fas bigfala tes blong Josef: ol brata blong hem oli salem hem olsem wan slef.
?Hemia i wijwan tes, namba 1? ?Josef i mekem se tes ia i kam long hemwan? No, i no hem. Wetem gud tingting, hem i bin serem sam long ol profesi drim blong hem long saed blong ol bigfala brata blong hem. Olgeta drim ia oli bin soemaot se bambae hem i kam lida blong olgeta sam dei. I tru, ol bigfala brata blong hem oli no bin laekem blong harem samting ia. Wanem i hapen, i we, “nao oli stap agens long hem moa yet from ol drim blong hem, mo from ol tok we hem i stap talem” (Jenesis 37:8).
Sapos yu yu stap long ples blong Josef, maet bae yu stap tingting se: “!Sapos mi no talem olgeta nomo abaot ol drim blong mi!”
?O, ating hem i wan tes olsem hemia blong poen namba 2? ?Tes blong Josef ia i bin kam from hem i bin stap laef long wan wol we i foldaon, we insaed i gat ol nara pipol we oli no yusum gud fridom blong olgeta blong mekem joes? Maet i olsem. Bakegen, bae i isi moa long Josef blong seksekem hed blong hem, mo tingabaot evri problem blong hem, se hemia i rong blong ol brata blong hem. O, wei we waef blong Potifa i giaman. O iven, wokman ia we, blong tu yia, i foget blong talem long Fero abaot Josef, iven afta we hem i promes se bae hem i talem (luk long Jenesis 40:23).
O, ?ating hem i wan tes olsem hemia blong poen namba 3? Long nara toktok, ?ol samting, God i letem blong Josef i gotru long olgeta blong helpem hem blong hem i groap? Long kwestin ia, Josef hemwan i filim se haf blong ansa ia i yes. Taem we, long en, hem i mitim ol brata blong hem bakegen, hem i talem: “Be i nogud yufala i stap harem nogud, mo i nogud yufala i stap jajem yufala from we yufala i salemaot mi olsem. Hemia i no wok blong yufala, i wok blong God ya, we hem i sanem mi mi kam fastaem long yufala long ples ya, blong mi save sevem laef blong ol man” (Jenesis 45:5, oli ademap italik).
Nao, tingbaot, Josef, oli salem hem olsem wan slef taem hem i gat 17 yia nomo. Hem i gat 30 yia taem hem i stanap long fes blong Fero blong talem mining blong ol drim ia we bae oli mekem hem i kam fri. Hemia i tekem 13 yia, o kolosap haf blong laef blong hem go kasem poen ia, we Josef i bin lusum fridom blong hem, we hem i no mekem wan rong. Be hem i gat fet se “God i bin sendem hem i kam” blong sevem laef blong ol man. I nomata weaples nao tes ia i kam long hem, long en, Josef i bin save se God i gat wan stamba tingting.
Hemia i bin inaf long hem. Hemia i save inaf long yumi.
Josef i fogivim ol brata blong hem, mo iven, i sevem laef blong olgeta from hadtaem ia blong kasem kaekae. Josef i bin save se God i bin lidim mo protektem laef blong hem.
Ol Tes blong Yu
Yumi save spendem bigfala paoa blong stastap wetem ol samting we oli blong bifo. Maet bae yumi tingting: “?From wanem mi mekem hemia?” o, “Sapos hem i no pas biaen long mi nomo.”
Be, blong stastap long ol, sapos nomo, mo sapos i bin olsem, bae i no mekem eni samting i gud moa, be bae yu stap ded wari long from wanem mo olsem wanem wan tes ia i bin kam long laef blong yu. Long en, pis mo paoa, yumi faenem taem yumi go long Kraes mo taem yumi gat tras long Hem, semmak olsem Josef blong Ijip. Sapos yumi mekem hemia, evri tes blong yumi bae oli kam kaen tes ia we bae i helpem yumi blong groap i go kolosap moa long God, mo bae yumi kam moa olsem Hem.
Presiden Henri B. Eyring blong Fas Presidensi i tijim: “Maet bae i stret blong yu askem yuwan se from wanem wan God we i gat lav mo i gat olgeta paoa, bae i letem ol tes blong yumi long wol ia oli had tumas. Hem i from se Hem i save se yumi mas kam antap long saed blong spirit blong kam klin mo gat paoa long bodi, blong save laef wetem Hem insaed long ol famli blong oltaem.”2
Ol Praes we Oli No Save Finis
Sapos yumi stap sin, yumi mas sakem sin. Sapos wan tes i stap mo yumi save kam antap, yumi mas mekem olsem. Be plante long ol hadtaem we yumi fesem long laef long wol ia, oli stap mekem yumi stastap longtaem moa bitim we yumi wantem—samtaem, i stap blong wan ful laef. Long ples ia tu, ansa i blong tanem yu i go long God.
Laef ia, i blong mekem yumi kasem fulap moa samting mo blong yumi pruvum yumiwan. Mo God bae wokbaot wetem yumi !sapos yumi stap lukaotem Hem! Elda Dale G. Renlund blong Kworom blong Olgeta Twelef Aposol, i tijim se: “Fet blong yu long Papa long Heven mo Jisas Kraes bae i kasem moa praes bitim we yu stap tingting long hem. Evri samting we i no stret long man—speseli samting we i no stret we i mekem man i kros—bae Hem i konsekretem i kam gud blong yu.”3
?Hem i bin “stret” se Josef i go tru long wanem hem i gotru long hem? No. Be from se hem i bin gotru long wanem we hem i bin gotru long hem, hem i bin save sevem laef blong ol nesen, wetem famli blong hem tu.
Maet bae yu stap long medel blong ol tes blong Josef, be blong yu. Maet yu no save luk poen. O yu no luk en.
Jes tingbaot, gladhat blong God, hem i inaf. Tanem yu i go long Hem, mo bae Hem i wokem ol sapraes samting insaed long laef blong yu.