“Long Kagayan, Filipin,” Blong Ol Yut Oli Kam Strong Maj 2022.
Olsem Wanem Mifala I Stap Wosip
Long Kagayan, Filipin
Foto i kam long Getty Images
Magandang araw! Kamusta?
(Hemia i minim “!Gud dei! ?Yu oraet?” long lanwis Tagalog.
Nem blong mi, Agravaine L.
Mi blong wan smol taon long Kagayan long Filipin. Mi stap laef wetem bigfala bubuwoman blong mi, mo bigfala bubuman blong mi, bubuwoman blong mi, mama blong mi, mo tufala sista blong mi. !Yes i tru. Mifala i wan big famli! Plante famli oli bigwan olsem long Filipin. Ol Filipino, oli save olgeta from oli gat ol strong famli rilesen. Hemia fevret pat blong mi blong stap laef long ples ia. !Naes wod weta i jes wan nara gud samting!
Ol fevret samting we mi laekem blong mekem, i blong ridim ol magasin, mo stap lisin long ol podkas mo miusik we i leftemap tingting. Mo tu, !mi laekem blong raetem ol leta we mi stap sendem i go long fiuja mi, fiuja hasban mo fiuja pikinini blong mi!
Stap Stadi mo Stap Serem
Pat ia we mi laekem moa blong stap olsem wan memba blong Jos Ia blong Jisas Kraes blong Ol Lata-dei Sent, hem i save ia se mi mi stap insaed long tru jos ia blong Kraes. Mi laekem blong visitim tempol, stap serem gospel, mo stap go long seminari wetem ol fren blong mi. Mi lanem plante aot long evri eksperiens ia.
Mi gat hadtaem samtaem blong stap strong kasem en. Be mi traem blong stadi long ol skripja blong mi evri naet. Kam Folem Mi i !helpem mi plante blong gat stadi blong miwan! Mo tu, mi lavem blong ridim ol stori we oli kam long ol nara magasin blong Jos. Mi yusum Gospel Laebri ap blong mekem se mi save gat ol mesej we oli leftemap tingting blong mi; mi putum long poket, hemia nomata weaples mi stap long hem.
Plante long ol fren blong mi long skul oli ol memba blong Jos. Mi stap tingting se hemia i minim se mi no gat janis blong serem gospel. Be mi lanem se, blong stap serem gospel, i no blong hapen nomo wetem ol pipol we oli gat defren bilif. Mi laekem tumas blong serem testemoni blong mi wetem bes fren blong mi long skul, !mo gel ia i wan memba tu!
Sabat
Haos blong mifala i stap longwe long bilding blong Jos, mekem se sista blong mi, mo mi, i mas mekem plan longtaem bifo, blong mekem se mitufala i save kasem ol miting long stret taem (!o bifo taem!)
Mitufala i stap wekap long 4 klok moning, mo wokbaot i go long haos blong anti blong mitufala, we i stap long rod i go long bilding blong Jos. Mitufala i tekemaot klos we mitufala i wokbaot wetem, mo werem dres blong mitufala. Afta, mitufala i wokbaot bakegen wan nara 30 minit blong kasem bilding blong Jos (o samtaem mitufala i wokbaot 25 minit sapos mitufala i wokbaot hariap). From se mitufala i stap rere from Sandei longtaem bifo, !mitufala i neva let! Okei. Plante taem, mitufala i no let. Rod ia, i gat plante sofmad taem we ren i ren. Wan taem, i ren tumas, mekem se mi fas long sofmad i stap mo !mi no save muv!
Be, i gud inaf blong go tru long hemia taem mitufala i kasem jos. Mi filim pis mo glad blong stap tokbaot gospel, mo taltalemaot gud nius abaot Sevya blong yumi. !Mi laekem blong stap serem testemoni blong mi evri fast mo testemoni miting! Ol Sandei Skul klas blong mi oli wan gudfala ples blong serem ol niu lukluk blong mi abaot gospel blong Jisas Kraes, mo blong stap lanem samting aot long ol narawan tu.