Stamba Toktok Ia mo Mi

Ol yut oli serem olsem wanem oli stap laef folem ol toktok we oli stap long Stamba Toktok blong Ol Yang Woman, mo hemia blong Aronik Prishud Kworom

Spirit I Save Helpem Mi Save Wei blong Givim Seves

I Kam long Alicia Tjahyono

“Olsem wan disaepol blong Jisas Kraes, mi traehad blong kam olsem Hem. Mi lukaot mo tekem aksen folem revelesen we mi kasem blong miwan, mo givhan long ol narawan long tabu nem blong Hem.”

wan yang woman

Long taem blong KOVID-19 wol sik ia, plante pipol oli no stap winim tumas mane, mo tu, oli lusum wok blong olgeta. Mi bin wantem mekem hadtaem blong olgeta i no hevi tumas. Wetem sapot blong mama mo papa blong mi, mo mi yusum mane blong miwan, mi stat blong givim kaekae long olgeta we oli bin stap long nid. Plante taem, bae mi putum oda blong ol kaekae blong ol narawan tru long wan ap blong moto taksi. Samtaem, mi go putum kaekae long samfala ples we oli putum i stap blong olgeta we oli stap gat hadtaem.

Long Indonesia, i gat plante moto taksi draeva. Mifala i stap yusum wan ap long mobaelfon blong bukum seves blong olgeta. Long taem blong wol sik ia, ol draeva tu oli bin gat hadtaem blong gat sam oda.

Wan dei, mi folem wan kwaet toktok blong Spirit blong helpem wan draeva we mi no save hem. Mi oda kaekae tru long moto taksi ap ia. Be taem hem i go long restrong blong pikimap kaekae ia, mi sendem wan jat mesej long hem, mo talem hem se kaekae ia, hem i blong hem. Hem i sapraes tumas mo i no bilivim se, kaekae ia, i blong hem. Taem mi talem se kaekae ia i blong hem, kwiktaem hem i talem tangkyu long mi, mo i bin prea from mi. Hem i talem se bae i tekem kaekae ia i gohom, mo bae i givim long pikinini blong hem. Hem i saon olsem se hem i hapi tumas. !Hemia i bin mekem mi mi filim hapi tu!

I nomata se famli blong mi mo mi i bin fesem sam jalenj tu, mi bin lisin long Spirit mo mi jusum blong givim seves. Mifala i bin gat janis blong filim glad mo hapines, we i bin helpem mifala blong winim ol jalenj blong mifala.

Mi glad tumas from Tabu Spirit. Eksperiens ia i mekem mi mi tingbaot wan skripja we i stap long Niu Testeman, long Jon 13:34: “Wan niufala komanmen mi givim long yufala, blong yufala i lavlavem yufala; olsem we mi mi lavem yufala, blong yufala i lavem ol narafala man tu.” Mi save se taem yumi stap folem Spirit, bambae yumi kasem ol gudfala blesing we oli kam long Papa long Heven.

Hem we i raet i stap laef long Wes Java, Indonesia.