“Voes blong Linahei,” Blong Ol Yut Oli Kam Strong Maj 2022.
Voes blong Linahei
Stat long miusik i go kasem famli histri, Linahei i stap yusum voes blong hem blong wan gud samting.
Ol foto oli kam long Stephane Sayeb; ol pikja droing oli kam long Claire Lock
Linahei D. blong Tahiti i save olsem wanem blong yusum voes blong hem blong blesem ol nara man—long plante wei. Eksampol. Hem i stap stadi blong kam wan dokta blong helpem olgeta we oli no save toktok gud, wan dei. “Mi wantem helpem ol pikinini wetem speling blong olgeta, o wei we oli stap toktok,” hem i talem.
Hemia i stat nomo. Hem i bon insaed long wan famli blong ol miusik man we oli gat talen; Linahei, we i gat 14 yia, i kasem plante janis blong yusum voes blong hem blong singsing. “Brata blong mi, mo mi, i lavem blong singsing tugeta. !Plante taem, hem i yusum hae ki, mo mi tekem lo ki!”
Mo i gat ful famli okestra tu. “Mama blong mi i plei piano blong helpem mifala blong tijim ol singsing, mo papa blong mi i plei gita mo yukalele.” Mo i gud blong gat smol dram tu, sapos no, i no wan okestra. “Papa blong mi mo mi, i laekem blong plei long to’ere, we i kastom dram blong Ol Man Polinesi.
Wetem wan ful bakap blong hem, famli blong hem i helpem hem wetem moa samting, be i no miusik nomo. “Papa mo mama blong mi, oltaem tufala i leftemap tingting blong mi long stadi blong mi, mo papa blong mi i stap givim prishud blesing long mi.” Taem we taem i had, hem i save se hem i save tanem hem i go long Papa blong hem we i stap long Heven. “Mi save hamas Lod i lavem mi, mo we Hem i stap oltaem blong ol pikinini blong Hem.”
Linahei i no stap yusum voes blong hem long saed blong miusik mo prea nomo, be tu, hem i stap toktok plante abaot fasin blong helpem ol memba blong famli long narasaed blong vel.
Wan Voes blong Lav blong Famli long Narasaed blong Vel
“Mi bin gat wan drim wan naet, we mi luk plante handred blong ol pipol, be i no gat wan long olgeta we i save toktok long olgeta,” hem i talem. “Mi ting se mi luksave olgeta, be mi no save gud.”
Linahei i no save wanem blong mekem wetem drim ia, long fas ples. Afta, hem i gat wan gudfala tingting: “Bifo long KOVID-19 lokdaon, mi bin mekem ova long 100 baptaes blong ol bubu blong mi—ol pipol ia long drim blong mi, maet oli ol memba blong famli blong mi!”
Naoia, hem i filim glad tumas abaot famli histri bitim bifo, nao Linahei i bin mekem evri samting we hem i save mekem blong help blong muvum ol nem ia i go long tempol blong oli kasem moa odinens. I no longtaem afta, oli singaotem Linahei mo mama blong hem blong tufala i kam famli histri speselis insaed long wod blong olgeta.
“Mitufala i bin helpem wan woman long wod blong i save go insaed long FamilySearch akaon blong hem. Taem hem i luk famli tri blong hem, hem i bin hapi tumas—hem i fas taem we hem i bin luk evri bubu blong hem!”
“Plante taem, mi harem se i had lelebet blong go luk ol pipol insaed long wod blong mi,” Linahei i talem. “Be naoia we mi gat mama blong mi wetem mi, mi filim se mi gat moa tras blong stap tijim ol pipol abaot famli histri.”
Leftemap Voes blong Yu
Naoia Linahei i luk fored blong stap helpem ol pipol blong oli lanem moa abaot ol bubu blong olgeta. “Mi laekem blong luk olsem wanem ol pipol oli hapi taem oli stap mekem famli histri wok blong olgeta. Mo mi ting se ol bubu blong yumi oli hapi se yumi gat intres long olgeta mo blong oli go mekem ol odinens.”
Long koling blong hem olsem wan famli histri speselis, hem i oganaesem wan aktiviti blong ol yang woman long wod blong hem. Hem i helpem olgeta blong oli faenem ol nem blong famli blong tekem i go long tempol, be tu, hem i bin helpem ol pikinini blong Praemeri blong oli gat akaon blong olgeta blong mekem se oli save tekpat.
“Yumi stap go long tempol i no longtaem,” hem i talem.
?Yu wantem kam wan fit man o woman olsem Linahei? No wari, hemia i posibol. “Ol yang pipol oli save muvum wok blong God taem oli yusum teknoloji,” Linahei i talem. “Eni samting we i helpem yumi blong tingting long ol bubu blong yumi, bae i gud tumas. Mi save se blong mekem famli histri, bae i mekem evriwan i gat moa glad long laef blong olgeta. Famli histri i tekem mi, mi go kolosap moa long ol bubu blong mi, mo moa kolosap long Kraes long semtaem.”
Wetem evri wok we hem i stap mekem blong ol bubu blong hem, yes i gat wan samting i sua: !famli blong Linahei i no wan histri nomo!