“God I Save Helpem Yumi long Taem blong Ol Hadtaem,” Blong Ol Yut Oli Kam Strong, Maj 2022.
God I Save Helpem Yumi long Taem blong Ol Hadtaem
Jisas Kraes i save olsem wanem blong helpem wanwan long yumi, nomata wanem tes yumi gat.
Sevya I Bin Wokbaot Antap long Wota, i kam long Walter Rane
Mi tingbaot hao mi bin filim taem mi wan yangfala, we i luk se mi stap laef long ol hadtaem. I gat wan wol wo i stap gohed. Ol yang man, we oli bigwan smol long mi, oli ded long ples blong faet. I gat ol wo blong ol gang long ol ples raonabaot. Wan hadtaem blong mane i stap raon long wol, mo i no finis yet, mo plante pipol oli pua i stap. Famli blong mi mo mi, mifala nomo i ol Ol Lata-dei Sent long taon ia we mifala i bin stap laef long hem.
Be yet, mi bin hapi mo mi bin gat hop. Oli bin tijim mi, semmak olsem we oli bin tijim yu, se ol tes blong yumi oli wan fiuja blesing sapos yumi tanem yumi i go long Papa long Heven mo Sevya blong kasem help.
?From Wanem Ol Tes?
Ol tes oli givim yumi wan impoten janis blong jusum blong praktisim bilif blong yumi. Yumi save askem blong kasem help long Jisas Kraes tru long prea; Hemwan i save olsem wanem blong helpem yumi. Hem i bin gotru long evri tes we bambae yumi save fesem. Mo Hem i save stret wei blong helpem wanwan long yumi. Mo Hem i lavem yumi.
Stamba tingting blong ol jalenj long laef, hem i blong luk wanem nao bambae yumi jusum blong mekem. ?Bambae yumi praktisim bilif ia blong obei ol komanmen we Hem i bin givim long yumi tru long eni tes we bae yumi fesem? Wan God we i gat lav i mekem wanem we i bes blong yumi. Hem i save karemaot, o Hem i save daonem ol tes blong yumi sapos hemia bae i save mekem bilif blong yumi i kam strong moa. Long sam nara taem, bambae Hem i no karemaot.
Taem yufala i bin stap stadi laef blong ol fasfala profet long OlTesteman, yufala i bin luk wei ia we Lod i stap helpem yumi, step folem step, blong girap tru long ol tes we oli had tumas. Eksampol. Wei blong Lod blong helpem Josef mo Moses, i bin tijim mi wei blong askem help mo kasem help long taem blong ol hadtaem.
Ol Tes blong Josef
Josef, pikinini boe blong Jekob, oli sakem hem i go long wan hol; afta, oli salem hem blong hem i kam wan slef long Ijip. Ol brata blong hem oli go talem long papa blong hem se oli bin kilim hem i ded. Taem we Josef i stap wok olsem slef, Lod i givim hem paoa blong talem mining blong ol drim blong Fero. Hem i soem Josef olsem wanem bae Ijip i save fesem wan hadtaem blong kasem kaekae, we bambae i kam yet. Hem i givim, long Josef, paoa long maen mo tingting blong stanap agensem temtesen, blong hem i kamaot long kalabus, mo taem hem i kasem 32 yia, blong hem i kam antap i go long wan hae ofis long saed blong Fero. Fero i talem long Josef: ““!Olgeta! Man ya Josef, paoa blong God i stap long hem. Bambae yumi no save faenem wan narafala man we i waes moa, i winim hem?”1
Wan lesen we mi lanem aot long wei we Lod i bin helpem Josef, i wei we Hem i save helpem yumi long ol hadtaem. Taem we Josef i gohed blong mekem ol joes we oli raet, Lod i mekem Josef i kam strong moa, i givim hem ol paoa long saed blong spirit, mo i mekem hat blong ol pipol raon long hem i sofsof.
Moses I Stap Luk Jehova, i kam long Joseph Brickey
Ol Tes blong Moses
Semmak, help blong Lod i go long Moses long taem blong ol hadtaem blong hem, i bin semmak long help blong Hem i go long Josef. Ol tes blong Moses oli bin stat taem hem i yangfala nomo. Moses i seperet long papa mo mama blong hem. Fas tes blong hem i blong gel blong Fero nao i lukaotem hem. Blong difendem wan Man Isrel, hem i kilimded wan Man Ijip, mo i mas ronwe i aot i go long wan draeples.
Lod i kamkamaot long Moses, mo i singaotem hem blong mekem ol pikinini blong Isrel oli kam fri long fasin blong stap slef long Ijip. Hemia i luk se, wok ia, i wan tes we bae i no posibol blong mekem, mo Moses i filim se i bitim paoa blong hem. Ol tes we oli had moa long laef blong yu, bae oli kam taem yu kasem wan wok we i kam long Lod, we i luk se i had tumas, mo yu filim se yu nidim help blong God.
Lod i stat blong givim long Moses help ia we bae yu nidim. Hem i talem long Moses se, Hem nao, bae i givim paoa long Moses blong gotru long ol tes we bambae oli stap kam.
“Nem blong mi, ‘Mi Stap We Mi Stap’ Yu mas talem long olgeta se, ‘God we i sanem mi mi kam long yufala, nem blong hem ‘Mi Stap We Mi Stap’”.2 Wetem stret toktok ia we i mekem hat blong hem i kwaet, Moses i kasem fet mo paoa blong gotru long ol tes we oli folfolem olgeta long fes blong hem, long wok ia we hem i bin kasem. I no se Lod i singaotem hem nomo, be Lod bambae i go fastaem long hem long sam merikel wei.
Laet blong Wol, long Walter Rane
Ol Tes blong Yu
Ol hadtaem we yu mo mi bae i fesem, i spesel. I no gat tu laef we i semsemmak. Ol tes oli stret long wanwan long yumi, mo oli kam long Papa long Heven mo Pikinini blong Hem we Hem I Lavem Tumas, Jisas Kraes. Wei we Tufala i ansa long prea blong yumi blong kasem help, bae i beswan long yumi. Long sam, bae i mekem yumi kam strong moa, mo long sam narawan, i blong oli givim glad long yumi taem we yumi stap gat hadtaem mo gotru wetem fet.
Long yumi evriwan, help we yumi nidim moa taem yumi kasem ol tes ia, long eni wei we oli kam, mo long hamas taem we bae oli stap, i blong gat wan fet we i strong mo i laef, long Jisas Kraes. Kaen fet ia nao i letem Josef blong talem mining blong ol drim long Ijip. Hem i bin wan sua fet long Jisas Kraes, we i mekem Moses i mekem samting stret mo i mekem hem i kam strong moa long had wok ia we hem i bin kasem blong helpem Lod blong mekem ol pipol blong Hem oli kam fri.
Long yangfala taem blong yu, yu bin kasem tes blong fet blong yu finis tru long ol hadtaem, semmak olsem mi. Be semmak olsem mi, oli bin tijim yu blong gat tras long Jisas Kraes. Naoia, mi luksave from wanem mi bin filim hop, mo mi bin gat glad taem mi bin yangfala. I no se mi ting se taem bae i kam gud moa, o bae i isi moa. Hem i we mi filim tras long miwan se, sapos mi gat tras long Hem mo wok blong Hem, evri samting bae oli oraet.
Bubuwoman blong mi i bin askem papa blong mi blong singsing wetem hem long rod blong gobak hom, afta we oli talem long hem se, bae i no longtaem, bae hem i ded from kansa: “Mo sapos mi ded bifo wokbaot i finis, … Evri samting i gud! !Evri samting i gud!”3 Mi talem witnes blong mi se wan Jisas Kraes we i bin laef bakegen long ded i save olsem wanem blong helpem wanwan long yumi, nomata wanem tes yumi gat. Yumi nid nomo blong askem, wetem fet long Hem.
Jisas Kraes i lavem yu mo bambae i helpem yu, long evri taem, mo folem wanem we i bes blong yu. Mi testifae olsem, wetem lav we mi gat long yu mo long Hem, long nem blong Jisas Kraes, amen.