“Tulo ka Sugyot aron Wala Kaayoy Panagbingkil sa Inyong Pamilya,” Alang sa Kalig-on sa mga Kabatan-onan, Mar. 2022.
Tabang sa Kinabuhi
Tulo ka Sugyot aron Wala Kaayoy Panagbingkil sa Inyong Pamilya
Ang inyong pamilya maglalis ba usahay? Kamo wala mag-inusara.
Mga paghulagway pinaagi ni Alyssa M. Gonzales
-
“Dili kana patas! Turno na nako!”
-
“Hoy, wala ka mananghid nga manghulam ka niana!”
-
“Pa! Si Anita nanghiwi nako!”
Kon ang bisan unsa nga mga komentaryo ingon og pamilyar, kamo tingali kabahin ka sa usa ka pamilya. Ug walay pamilya nga dili makasinati og panagbangi. Si Elder David A. Bednar sa Korum sa Napulog Duha ka Apostoles sa makausa mipaambit nga ang iyang mga anak mireklamo, “Ma, iya kong gisunod-sunod!”1
Normal ra nga ang panagbingkil mahitabo sa usa ka pamilya. Gani, dunay usa ka tawo nga naningkamot pag-ayo nga mahitabo kana. Ang Manluluwas klaro nga mitudlo, “Siya nga may espiritu sa panagbingkil dili gikan kanako, apan gikan sa yawa, kinsa mao ang amahan sa panagbingkil, ug siya nagkutaw sa mga kasingkasing sa mga tawo sa panagbangi uban ang kasuko, sa usag usa” (3 Nephi 11:29).
Apan ayaw kahadlok! Ang ebanghelyo nagtudlo kanato nga adunay daghan nga atong mabuhat aron maminosan ang panagbingkil diha sa atong mga pamilya—ug makasinati og tumang hingpit nga kalipay!
Sugyot 1: Ipalayo ang Sugnod
Ang mga kalayo magkinahanglan og sugnod aron mosilaob. Ang panagbingkil pareho. Ug walay makasugnod sa usa ka panaglalis sama sa pagsige pa og panaglalis. Mao nga, unsay inyong mahimo kon adunay tawo nga mosugod sa pagpakiglalis kaninyo?
Hinoon, kamo mahimong magdumili sa pagpakiglalis. Ang Manluluwas maoy atong hingpit nga ehemplo niini. Sa kinatibuk-an sa Iyang pangalagad Siya gidumtan, gitagad og dili maayo, gibudhian, ug sa kataposan gilansang sa krus. Apan, bisan kon ang iyang mga tubag kusganon ug direkta, Siya wala gayoy espiritu sa panagbingkil. Ug sa kataposan Siya wala mobalos sa pagpakig-away, bisan kon mahimo unta niyang tawagon ang “kapin sa napulog-duha ka panon sa mga anghel” aron sa pagtabang Kaniya (Mateo 26:53). Hinoon, Siya nag-ampo alang sa Iyang mga kaaway, bisan samtang nagbitay Siya sa krus (tan-awa sa Lucas 23:34).
Ang pagdumili sa pagpakiglalis makapahimo ninyo nga mas maayo nga tigpaminaw. Ug kon kita maminaw og maayo, kita makaistorya og mas maayo ug mahimong usa ka tigpasiugda og kalinaw. Ang pagdumili sa pagpakiglalis naglakip usab sa pagtubag uban sa kalma nga tingog ug paghimo kutob sa atong mahimo sa pagkontrolar sa atong mga emosyon.
Kon wala ang dugang nga sugnod, kadaghanan sa mga panaglalis ug panagbingkil hinay-hinay nga mawala. Sama sa gitudlo sa mga kasulatan, “Ang malumong tubag mohupay sa kasuko” (Mga Panultihon 15:1).
Sugyot 2: Pagpakita og Gugma
Ang pagpakita og gugma sa mga sakop sa inyong pamilya mao ang usa sa labing maayong paagi nga walay panagbangi sa panimalay. Ang pagbuhat sa ingon makapahunong gani nga mahitabo ang panagbingkil!
Apan bisan kon ang panagbingkil moabot nga dili nato mabantayan, ang gugma ug pagkamabination makapausab gihapon sa mga panghitabo.
Hunahunaa ang istorya sa Biblia mahitungod sa babaye nga nahisakpan nga nanapaw. Sumala sa balaod ni Moises, siya kinahanglan unta nga batoon. Ang masuk-anon nga pundok sa mga tawo gusto nga si Jesus mosilot kaniya.
Apan unsa ang tubag sa Manluluwas? Una sa tanan, Siya wala dayon motubag sa ilang mga demanda. Siya mitikubo ug misulat sa yuta sa makadiyot sa wala pa mosulti. (Pasabot: usahay mas labing maayo nga dili motubag dayon kon dili maayo ang mga emosyon.)
Dayon Siya mipakita og gugma ug kapuangod alang sa babaye sa dihang Iyang gisultihan ang pundok sa mga tawo, “Bisag kinsa kaninyo nga wala makasala maoy paunaha pagbato kaniya” (Juan 8:7).
Gitratar ni Jesus ang babaye uban sa gugma, dili ang pagsilot. Gipakita Niya ang Iyang pagkaandam sa pagpasaylo kaniya sa dihang gidapit Niya siya nga nag-ingon “lakaw ug ayaw na pagpakasala” (Juan 8:11).
Sultihi ang mga sakop sa inyong pamilya nga kamo nahigugma kanila. Ipakita kana nga gugma pinaagi sa pagpasaylo kanila ug pagtugot kanila nga mag-usab—bisan kon sila nagpakita og kasuko kaninyo. Ang gugma makahimo sa tanang kalainan.
Sugyot 3: Pag-ampo
Ang pag-ampo makadala sa mga panalangin sa Dios diha sa atong mga kinabuhi. Sa Basahon ni Mormon, si Amulek mitudlo, “Kamo kinahanglan mobu-b[o] sa inyong mga kalag diha sa inyong mga lawak alampoan, ug diha sa inyong wala hibaloi nga mga dapit, ug diha sa inyong kamingawan.
“Oo, … himoa nga ang inyong mga kasingkasing puno, magpadayon sa pag-ampo ngadto kaniya sa kanunay alang sa inyong kaayohan, ug usab alang sa kaayohan niadto kinsa naglib[o]t kaninyo” (Alma 34:26–27).
Sigurado “kadtong naglibot kaninyo” naglakip sa inyong pamilya—bisan kadtong kinsa nga wala magpuyo uban kaninyo karon. Mao nga, pag-ampo uban sa inyong pamilya. Pag-ampo alang sa inyong pamilya. Pag-ampo nga inyong makontrolar ang inyong kasuko kon dunay mopalagot kaninyo. Pag-ampo aron kamo makahibalo unsaon sa pagtubag sa lisod nga mga sitwasyon nga moabot sa inyong pamilya. Pag-ampo alang sa balaan nga panabang. Pag-ampo alang sa dugang katawa ug gugma nga mosulod sa inyong panimalay. Ug dayon buhata ang tanan nga inyong mahimo nga mahitabo kana.
Samtang maningkamot kamo nga mas hingpit nga masunod ang ebanghelyo ni Jesukristo, inyong makaplagan nga ang inyong pamilya mapanalanginan usab. Ang panagbingkil mokunhod, ug ang inyong hingpit nga kalipay madugangan.