“Unsaon sa Pag-atubang ang Tulo ka Matang sa mga Pagsulay,” Alang sa Kalig-on sa mga Kabatan-onan, Mar. 2022.

Dali, Sunod Kanako

Unsaon sa Pag-atubang ang Tulo ka Matang sa mga Pagsulay

Ni David Dickson

Mga Magasin sa Simbahan

Ang kinabuhi adunay daghang nagkalain-laing mga hagit, apan ang pagdangop ngadto sa Dios mao ang kanunay nga tubag.

Tungod sa kasina, ang mga igsoong lalaki ni Jose mibaligya kaniya ngadto sa pagkaulipon ug dayon gisultihan ang ilang amahan nga siya napatay sa mga mananap.

Si Jose sa Ehipto mahimo untang mangutana og daghan nga pangutana mahitungod sa paagi nga nahiagoman sa iyang kinabuhi. Kamo magtuon mahitungod sa iyang kinabuhi niining bulana, apan aniay laktod nga katingbanan sa unsay nahitabo kaniya:

Ang iyang mga igsoong lalaki mibaligya kaniya ngadto sa pagkaulipon.
Isip usa ka ulipon, gipasanginlan siya nga misulay sa pagpahimulos sa asawa sa iyang agalon.
Siya nahimong binilanggo sulod sa duha ka tuig.

Hunahunaa unsa kahay inyong bation kon kamo mao si Jose. Sa labing minos, kamo tingali matintal sa pagpangutana: “Nganong ako?” “Unsay akong nahimo nga silotan sa ingon?”

Bisan og siya wala makahimo og krimen, si Jose gibalhog sa bilanggoan sulod sa duha ka tuig.

Tulo ka Matang sa mga Pagsulay

Si Elder Neal A. Maxwell (1926–2004) sa Korum sa Napulog Duha ka Apostoles sa makausa mitudlo mahitungod sa tulo ka lain-laing matang sa mga pagsulay nga atong atubangon niini nga kinabuhi:

Matang 1: Ang mga pagsulay nga nagagikan sa atong kaugalingong mga sala o mga sayop.
Matang 2: Ang mga pagsulay nga mahitabo tungod kay kini usa ka napukan nga kalibotan, puno sa sakit, balatian, ug napukan nga katawhan.
Matang 3: Ang mga pagsulay nga gusto sa Dios nga atong masinati tungod kay Siya gusto nga kita molambo.

Sa taliwala sa usa ka pagsulay, kita tingali matintal sa pagpangutana, “Nganong ako?” Apan kana nga pangutana dili mahimong mapuslanon sama sa atong gilaoman. Si Elder Maxwell misulat nga dili igsapayan kon ngano nga kita adunay pagsulay, “ang sangpotanan klaro nga pareha ra, ang Dios gusto nga kita moagi niana nga hagit. Apan Siya misaad kanato nga ang Iyang grasya igo alang kanato.”¹ Sa laing mga pulong, ang Langitnong Amahan dili motugot kanato nga moagi sa mga pagsulay nga wala maghatag nato og tabang nga atong gikinahanglan pinaagi sa Pag-ula ni Jesukristo.

Ehemplo ni Jose

Atong tan-awon kadali ang unang dakong pagsulay ni Jose: Ang mga igsoong lalaki mibaligya kaniya ngadto sa pagkaulipon.

Kini ba usa ka “Matang 1” nga pagsulay? Si Jose ba ang naghimo niini sa iyang kaugalingon? Dili. Siya mipaambit sa inosenting paagi sa iyang duha ka mapanagnaong damgo kabahin sa iyang magulang nga mga igsoong lalaki. Kadto nga mga damgo nagpadayag nga siya mahimo nilang lider sa umaabot. Siyempre, ang iyang magulang nga mga igsoong lalaki dili ganahan nga maminaw niana. Gani, “misamot ang ilang pagdumot kaniya tungod sa iyang damgo” (Genesis 37:8).

Kon kamo pa ang anaa sa dapit ni Jose, tingali kamo maghanduraw sa inyong kaugalingon nga maghunahuna, “Kon wala pa lang unta nako sila sultihi mahitungod sa akong mga damgo!”

O dili ba kini usa ka “Matang 2” nga pagsulay? Ang pagsulay ba ni Jose tungod sa pagpakabuhi diha sa usa ka napukan nga kalibotan, nga naglakip sa ubang mga tawo nga naggamit sa ilang kabubut-on sa dili sakto nga paagi? Tingali. Sa pagsubli, sayon ra unta alang ni Jose sa paglingo-lingo ug paghunahuna kon sa unsang paagiha nga ang tanan niyang mga problema tungod sa kasaypanan sa iyang mga igsoong lalaki. O maghunahuna sa pagpamakak sa asawa ni Potifar. O maghunahuna nga bisan ang tigtagay sa bino kinsa sulod sa duha ka tuig nakalimot sa pagsulti ni Paraon mahitungod ni Jose, bisan human misaad nga siya mosulti (tan-awa sa Genesis 40:23).

O kini bang tanan sa kataposan usa ka “Matang 3” nga pagsulay? Sa laing mga pulong, kini bang mga butanga gitugot sa Dios nga masinati ni Jose aron pagtabang kaniya nga molambo? Niini nga pangutana, si Jose mismo mibati nga ang tubag tingali morag oo. Sa dihang sa kataposan iyang nahimamat ang iyang mga igsoong lalaki pag-usab, siya miingon, “Apan ayaw ikaguol o pakasad-a ang inyong kaugalingon tungod sa inyong pagbaligya kanako: kay ang Dios maoy nagpaanhi kanako una kaninyo aron maluwas ang kinabuhi sa katawhan” (Genesis 45:5).

Karon, hinumdomi, si Jose gibaligya ngadto sa pagkaulipon sa edad nga 17. Siya nag-edad og 30 sa dihang siya mibarog atubangan ni Paraon aron hubaron ang mga damgo nga maoy nakapahimo niyang gawasnon. Kana moabot og 13 ka tuig, o hapit katunga sa iyang kinabuhi hangtod nianang puntoha, diin si Jose nawad-an sa iyang kagawasan tungod sa dili iyang kasaypanan. Apan siya adunay hugot nga pagtuo nga ang “Dios mipadala [kaniya]” aron sa pagluwas og kinabuhi. Dili igsapayan kon diin nagagikan ang pagsulay, si Jose nakahibalo gayod nga ang Dios adunay katuyoan.

Igo na kadto alang kaniya. Mahimong igo kana kanato.

Si Jose mipasaylo sa iyang mga igsoong lalaki ug gani miluwas sa ilang kinabuhi gikan sa kagutom. Si Jose nasayod nga ang Dios migiya ug mipanalipod sa iyang kinabuhi.

Ang Inyong mga Pagsulay

Kita makagahin og dakong bahin sa atong kusog nga maghunahuna kanunay sa nangagi. Kita maghunahuna, “Nganong gibuhat ko man kadto?” o “Kon wala lang unta ako tikasi ni bisan kinsa.”

Apan ang pagsige og hunahuna sa unsa-kaha-kon ug sa unta-ingon-niini dili makahatag og dugang kaayohan kay sa pagkabalaka ngano o sa unsa nga paagi nga ang pagsulay miabot sa inyong kinabuhi. Sa kataposan, ang kalinaw ug kalig-on makaplagan pinaagi sa pagduol ngadto ni Kristo ug pagsalig diha Kaniya, sama sa gibuhat ni Jose sa Ehipto. Kon kita mobuhat niini, ang atong tanang pagsulay mahimong matang sa mga pagsulay nga motabang kanato nga mas mahiduol ngadto sa Dios ug mahimong mas mahisama Kaniya.

Si Presidente Henry B. Eyring sa Unang Kapangulohan mitudlo, “Kamo tingali makapangutana nganong ang usa ka mahigugmaon ug labing gamhanan nga Dios motugot sa atong mortal nga pagsulay nga mahimong lis[o]d kaayo. Kini tungod kay nasay[o]d Siya nga kinahanglan gay[o]d natong molambo diha sa espirituhanong kalimpyo ug kalig-on aron makahimo sa pagpuyo isip mga pamilya diha sa Iyang presensya sa kahangt[o]ran.”²

Mahangturong mga Ganti

Kon kita nakasala, kita kinahanglang maghinulsol. Kon ang usa ka pagsulay masulbad ra nato, kita makahimo ug kinahanglang mohimo sa ingon. Apan kadaghanan sa kalisod nga atong atubangon dinhi sa pagka-mortal ingon og magpabilin og dugay-dugay kay sa atong gilaoman—usahay molungtad sa tibuok kinabuhi. Dinhi, usab, ang tubag mao ang pagdangop ngadto sa Dios.

Kini nga kinabuhi aduna gayoy pagsulay ug mga oportunidad sa paglambo. Ug ang Dios magauban kanato kon kita magtinguha Kaniya! Si Elder Dale G. Renlund sa Korum sa Napulog Duha ka Apostoles mitudlo, “Ang inyong hugot nga pagtuo diha sa Langitnong Amahan ug ni Jesukristo pagagantihan labaw kay sa inyong mahunahuna. Ang tanang pagkadili makiangayon—labi na ang makapungot nga pagkadili makiangayon—igapahinungod alang sa inyong kaayohan.”³

“Makiangayon” ba nga si Jose miagi sa unsay iyang naagian? Dili. Apan tungod kay siya miagi sa unsay iyang naagian, siya nakahimo sa pagluwas og mga kinabuhi sa mga nasod, lakip na sa iyang kaugalingong pamilya.

Tingali kamo anaa sa tunga-tunga sa samang mga pagsulay ni Jose. Tingali dili kamo makasabot sa punto. O sa kataposan.

Hinumdomi lang, ang grasya sa Dios igo. Dangop ngadto Kaniya, ug Siya mohimo og mga katingalahan sa inyong kinabuhi.