“Tingog ni Linahei,” Alang sa Kalig-on sa mga Kabatan-onan, Mar. 2022.
Tingog ni Linahei
Gikan sa musika ngadto sa family history, si Linahei naggamit sa iyang tingog alang sa maayo.
Gilitratohan ni Stephane Sayeb; mga paghulagway pinaagi ni Claire Lock
Si Linahei D. gikan sa Tahiti nakahibalo unsaon sa paggamit sa iyang tingog aron mopanalangin sa uban—sa mas daghang paagi kay sa usa. Pananglitan, nag-eskwela siya aron mahimong speech therapist sa umaabot. “Gusto kong motabang sa mga bata sa ilang panitik [spelling] o sa paagi nga sila mosulti,” siya miingon.
Hinoon, mao lamang kadto ang sinugdanan. Natawo sa usa ka pamilya nga hanas nga mga musikero, ang 14 anyos nga si Linahei adunay daghang kahigayonan sa paggamit sa iyang tingog alang sa pagkanta. “Ang akong igsoong lalaki ug ako ganahan manganta. Sa kasagaran siya ang mohimo sa taas nga tono, ug ako sa ubos nga tono!”
Ug anaa usab ang tibuok pamilya nga orkestra. “Ang akong mama motukar sa piyano aron motabang sa pagtudlo namo sa mga kanta, ug ang akong papa motukar sa sista ug ukulele.” Ug unsay kapuslanan sa orkestra sa pamilya kon walay gamay nga duyog? “Ang akong papa ug ako ganahan nga motukar sa to‘ere, nga mao ang tradisyonal nga tambol sa taga-Polynesia.”
Uban sa iyang tibuok pamilya nga nagsuporta kaniya, ang iyang pamilya nagtabang kaniya dili lamang sa musika. “Ang akong mga ginikanan kanunay nga moawhag nako sa akong mga pagtuon, ug ang akong papa naghatag nako og mga panalangin sa pagkapari.” Kon moabot ang malisod nga mga panahon, nasayod siya nga siya makaduol ngadto sa iyang Langitnong Amahan. “Nasayod ko unsa ko ka mahal sa Ginoo ug nga Siya anaa kanunay alang sa Iyang mga anak.”
Si Linahei wala lang mogamit sa iyang tingog alang sa musika ug pag-ampo, apan naghisgot usab siya mahitungod sa pagtabang sa mga sakop sa pamilya sa pikas bahin sa tabil.
Usa ka Tingog sa Gugma alang sa Pamilya sa pikas Tabil
“Nagdamgo ko usa ka gabii diin akong nakita ang gatosan ka tawo, apan walay usa nila ang makaistorya sa usag usa,” siya miingon. “Nagtuo ko nga ako nakaila nila, apan dili ko sigurado.”
Si Linahei wala masayod unsay buhaton sa damgo sa sinugdanan. Dayon siya adunay makadasig nga hunahuna: “Sa wala pa ang lockdown tungod sa COVID-19, nakapahigayon ko og labaw sa 100 ka bunyag alang sa akong mga katigulangan—kining mga tawo sa akong damgo mahimong nagrepresentar niadto nga mga sakop sa pamilya!”
Gibati nga mas nadasig mahitungod sa family history kay sa sauna, si Linahei mihimo kutob sa iyang mahimo sa pagtabang nga makompleto ang mga ordinansa sa templo alang kanila. Sa wala madugay, si Linahei ug ang iyang mama gitawag isip mga consultant sa family history sa ilang ward.
“Gitabangan namo ang usa ka babaye sa among ward nga makasulod sa iyang account sa FamilySearch. Sa dihang nakita niya ang iyang family tree, nalipay kaayo siya—mao kadto ang unang higayon nga siya nakakita sa iyang tanang katigulangan!”
“Kulbaan ko nga moduol sa mga tawo sa akong ward,” angkon ni Linahei. “Apan karon nga kauban nako ang akong mama, gibati nako nga mas masaligon sa pagtudlo sa mga tawo mahitungod sa family history.”
Ipataas ang Inyong Tingog
Karon si Linahei mahinamon nga motabang sa mga tawo nga makat-on mahitungod sa ilang mga katigulangan. “Ganahan ko nga magtan-aw unsa ka malipayon ang mga tawo kon sila mohimo sa ilang family history. Ug ako nagtuo nga ang atong mga katigulangan malipayon nga kita interesado kanila ug sa pagpahigayon sa ilang mga ordinansa.”
Sa iyang calling isip usa ka consultant sa family history, bag-ohay lang siyang nag-organisar og kalihokan alang sa mga batan-ong babaye sa iyang ward. Wala lamang niya tabangi sila nga makakaplag og mga ngalan sa pamilya nga dad-on sa templo, apan mitabang usab siya sa mga bata sa Primary nga maghimo og mga account aron sila makaapil.
“Mangadto kita sa templo sa dili madugay,” miingon siya.
Gusto ka ba nga mahimong talagsaon sama ni Linahei? Ayaw kabalaka, posible gayod kana. “Ang mga batan-on makatabang gayod sa buhat sa Dios pinaagi sa paggamit sa teknolohiya,” miingon si Linahei. “Ang bisan unsa nga makatabang nato sa paghunahuna sa atong mga katigulangan talagsaon. Nasayod ko nga ang paghimo sa family history makahatag sa tanan og hingpit nga kalipay sa ilang mga kinabuhi. Ang family history nakapaduol nako ngadto sa akong mga katigulangan ug ngadto ni Kristo sa samang higayon.”
Uban sa tanang buhat nga iyang gihimo alang sa iyang mga katigulangan, usa ka butang nga sigurado: ang pamilya ni Linahei dili lang usa ka kasaysayan!