“Tolu na iVakasala me Lailai Kina na Veileti ena Nomu Matavuvale,” Me iSakisaki ni iTabagone, Maji 2022.
Veivuke ni Bula
Tolu na iVakasala me Lailai kina na Veileti ena Nomu Matavuvale
E dau veiba beka ena so na gauna na nomu matavuvale? O sega ni tiko duadua.
Droini mai vei Alyssa M. Gonzalez
-
“E sega ni dodonu! Sa noqu gauna!”
-
“Ei, o a sega ni kerea qori!”
-
“Ta! A darayame mai vei au o Anita!”
Kevaka e dua vei ira na vakasama oqori e rogorogo matalia, o na rairai lewe beka ni dua na matavuvale. Ka sega ni dua na matavuvale e vakuwai mai na kena veisaqasaqa. A wasea o Elder David A. Bednar ena Kuoramu ni iApositolo Le Tinikarua ni ra a vosakudrukudru na luvena, “Na, e sa ceguva tiko o koya na noqu cagi!”1
Sa ivakarau ni bula me curu na veileti ena dua na matavuvale. Na ka dina, ni dua a cakacaka vakaukauwa sara me yaco o ya. A vakavulica vakamatata na iVakabula, “Ko koya sa tiko vua na yalo ni veileti, sa sega ni noqu; ia sa nona ga na tevoro, ni sai koya na tama ni veileti, ka sa dau vakauqeta na yalodra na tamata me ra veileti ka veicudruvi.” (3 Nifai 11:29).
Ia kakua ni rere! E vakavulica vei keda na kosipeli ni levu na ka e rawa ni da cakava me vakalailaitaki kina na veileti ena noda matavuvale—ka sotava vakalevu na reki!
iVakasala 1: Kauta tani na Waiwai
Na bukawaqa e gadreva na waiwai me kama kina. E tautauvata na veileti. Ka sega ni dua na ka e vakawaiwaitaka vakalevu cake na veiba me vakataka na vakalevutaki ni veiba. Ia, na cava o rawa ni cakava kevaka e dua e tekivu me veiba vata kei iko?
Ia, sa rawa mo bese ga ni veiba. Na iVakabula sa noda ivakaraitaki uasivi ena ka oqo. Ena gauna taucoko ni Nona cakacaka vakalotu a cati, vakalolomataki, lawakitaki, ka lauvako sara ki na kauveilatai. Ia, ena gauna mada ga e kaukauwa ka dodonu kina na nona isaunitaro, e sega vakadua ni dau tiko vua na yalo ni veileti. Ia e muri a sega ni vala lesu o Koya, ena gauna mada ga a rawa kina vua me kacivi ira sobu “na agilosi e tinikarua nai vavakoso ka mani vakacaca” me ra vukei Koya (Maciu 26:53). Ia, a masulaki ira ga na Nona meca, ena gauna mada ga ni rube toka ena kauveilatai (raica na Luke 23:34).
Na nomu sega ni via veiba ena rawa kina vei iko mo dau vakarorogo vinaka cake. Ia ni da vakarorogo vakavinaka cake, e rawa ni da veivosaki vakavinaka cake ka yaco meda dautataro vinaka cake. Ni da sega ni via veiba e oka talega kina na vosalesu ena domo malumu ka cakava na veika e rawa ni da tarova kina na lomada.
Ni sega ni kuri na waiwai, e vuqa na veiba kei na veileti era malumalumu mai. Me vaka e vakavulica na ivolanikalou, “A vosa vakayalovinaka sai vakamalumu ni cudru” (Vakaibalebale 15:1).
iVakasala 2: Vakaraitaka na Loloma
Ni ko vakaraitaka na loloma vei ira na lewe ni nomu matavuvale sa dua vei ira na sala vinaka duadua mo kauta tani tiko na veileti mai na nomu itikotiko. Ni caka oqori ena rawa sara mada ga ni tarovi na veileti ena kena yaco mai ena imatai ni gauna!
Ia kevaka sara mada ga e yaco me curu rawa mai na veileti ena noda itataqomaki, na loloma kei na yalovinaka ena rawa tikoga ni moica donu na veika kece.
Vakasamataka mada na italanoa ni iVolatabu me baleta na marama a dautagane. Me vaka na lawa i Mosese, a dodonu me vakaviriki ena vatu. Era a vakaroti Jisu e dua na ilawalawa vakatani me cudruvi koya o Jisu.
Ia na cava a cakava na iVakabula? Taumada, a sega ni sauma vakatotolo na veika era a vakarota mai. A tekiduru o koya ka droini ena qele ni bera ni vosa. (Vakasama: ena so na gauna e vinaka cake me kakua na vosalesu vakatotolo ena gauna ni yalokatakata.)
A qai vakaraitaka o Koya na loloma kei na yalololoma vua na yalewa ena Nona tukuna vei ira na lewevuqa, “O koya vei kemudou sa sega ni valavala ca, me viriki koya mada e liu ena vatu” (Joni 8:7).
A vakayaco loloma o Jisu vua na yalewa, sega ni cudruvi koya. A vakaraitaka nona lomasoli me vosoti koya ni sureti koya me “mo lako, ka mo kakua ni valavala ca tale” (Joni 8:11).
Tukuna vei ira na lewe ni nomu matavuvale ni o lomani ira. Vakaraitaka na loloma oya ena nomu vosoti ira ka vakatara me ra veisau—kevaka sara mada ga era cudruvi iko tiko. Na loloma e rawa ni vakayaco veisau kece sara.
iVakasala 3: Masu
Na masu e kauta mai ki na noda bula na veivakalougatataki ni Kalou. Ena iVola i Momani, e vakavulica o Amuleki, “Mo ni sovaraka yani na yalomuni ni ko ni tiko e nomuni loqi, kei na nomuni tikina vuni, kei na nomuni lekutu.
“Io, … me vakasinaiti na yalomuni, ni ko ni masuti koya tikoga me baleta na nomuni tiko vinaka, kei na nodra tiko vinaka talega ko ira ka tiko wavoliti kemuni” (Alama 34:26–27).
E dina sara “ko ira ka tiko wavoliti kemuni” era oka kina na nomu matavuvale—o ira sara mada ga era sega ni tiko vata kei iko ena gauna oqo. O koya gona, mo masu vata kei na nomu matavuvale. Masulaka na nomu matavuvale. Masulaka mo dau kakua ni dau yalokatakata ena gauna e vakararawataki iko kina e dua. Masulaka mo kila na sala mo dau vinaka vakacava ena veituvaki dredre e dau yaco mai ena nomu matavuvale. Masu mo vukei vakalou. Masulaka na veidredrevaki kei na loloma me curuma na nomu vale. Qai cakava na veika kece o rawata mo cakava me yaco oqo.
Ni ko saga mo bulataka vakataucoko cake na kosipeli i Jisu Karisito, ko na raica ni na vakalougatataki talega na nomu matavuvale. Ena vakalailaitaki sara na veileti, ka na levu cake na nomu reki.