“Kaukauwa ni Matabete ena Matedewa Levu,” Me iSakisaki ni iTabagone, Maji 2022.
Na iToko kei Au
Era wasea na itabagone na sala era bulataka tiko kina na vosa ni iToko ni Goneyalewa kei na Kuoramu ni Matabete i Eroni
Kaukauwa ni Matabete ena Matedewa Levu
“Au na lomana na Kalou … ka vakayagataka na Nona matabete meu qaravi ira na tamata, tekivu mai na noqu itikotiko.”
iTaba mai na Getty Images
Ni keitou sa tekivu lotu e vale baleta na matedewa levu na COVID-19, au a veivuke ena kena soli na sakaramede ki na noqu matavuvale. Sa dua na ka totoka meu rawa ni cakava oqo ena noqu vale, ka vakavuna meu vakila na noqu vakavinavinakataka na sakaramede. Au vakavinavinaka ni rawa meu bula tiko ena gauna oqo ni lotu tiko e vale.
E dua a tiko tikivi keitou a gadreva e dua me kauta vua na sakaramede. E sega ni dua ena nona vale a rawa ni vakarautaka se vakalougatataka na sakaramede baleta ni sa mai takali na turaga watina ena vica na yabaki sa oti. A qarauni koya tale tikoga maivei ira na veisiko mai ena vuku ni matedewa levu. O au kei tamaqu a nona dauveiqaravi, ka keirau sa mani laki solia vua na sakaramede ena neirau dara tiko na iubi ni mata kei na qaqarauni tale eso me baleta na nona taqomaki.
Sa dua na ka na nona vakavinavinakataka na neirau a lako vua. Au a yalo rarawa vakalailai ni tu duadua tu ga o koya, me vaka ni o koya ga e tiko ena nona vale ena gauna ni matedewa levu. Ia au sa vakavinavinaka talega niu rawa ni solia vua e dua na ka bibi sara me vakamarautaki koya. Sa dua na ka totoka niu rawa ni qaravi koya. A vakamarautaki au ni keirau rawa ni lako kei tamaqu ka laki qarava na neirau neiba.
Au vakavinavinaka ni tiko vei au na matabete baleta ni sega walega ni yaga vei au ia o ira talega na tamata tale eso. E vukei au meu tamata vinaka cake ka vukea meu raica na sala au rawa ni qaravi ira kina eso. Na votai ni sakaramede ena noqu vale kei na noqu neiba a dolava na mataqu. Au gadreva meu vakayagataka na madigi meu vota kina na sakaramede ka qaravi ira na tamata era sega ni cakava rawa vakataki ira. Au vakavinavinaka niu rawa ni vakayagataka na matabete me vakalougatataki ira na tamata eso kei na noqu matavuvale.
E vakaitikotiko o koya e vola mai Utah, Amerika.