“E Rawa ni Vukei Keda na Kalou ena Veigauna Dredre,” Me iSakisaki ni iTabagone Maji 2022.
E Rawa ni Vukei Keda na Kalou ena Veigauna Dredre
E kila tu o Jisu Karisito na sala me vukei keda yadua kina, se cava ga na noda vakatovolei.
A Taubale e Dela ni Wai na iVakabula, mai vei Walter Rane
Au nanuma na veika au vakila niu se yabaki tinivakacaca, ka bula voli ena veigauna dredre. A katakata tiko e dua na ivalu levu. O ira na cauravou era qase cake vakalailai maivei au era a vakamatei ena veivaluvaluti. A yaco tiko na veivala vakailawalawa ena veiyasana voleka. Ka se bera tiko ni oti e dua na leqa vakailavo e vuravura raraba, ka vuqa na tamata era sa dravudravua. Keitou duadua ga vakamatavuvale e lewe ni Yalododonu Edaidai ena taoni keitou vakaitikotiko kina.
Ia, au a marau ka nuidei tiko. Au a vakavulici, me vakataki kemuni, ni noda vakatovolei e rawa ni veivakalougatataki kevaka me ra vagolei keda vua na Tamada Vakalomalagi kei na iVakabula meda vukei.
Na Cava na iNaki ni Veivakatovolei?
Na veivakatovolei ena solia vei keda na madigi talei meda digitaka meda cakacaka ena vakabauta. E rawa ni da kerea ena masu meda vukei maivei Jisu Karisito, o koya e kila na sala me vukei keda kina. A sotava o Koya na veivakatovolei kece eda na sotava. Sa kila vinaka tu o Koya na sala me vukei keda kina vakayadua. Ka sa lomani keda o Koya.
Na inaki ni bolebole ena bula oqo sai koya me da raica na veika eda na digitaka me da cakava. Eda na cakacaka beka ena vakabauta meda muria na ivunau sa solia vei keda o Koya ena veivakatovolei cava ga eda sotava? Na Kalou dauloloma e dau cakava tikoga na veika e vinaka duadua vei keda. E rawa ni kauta tani se vakalailaitaka na noda vakatovolei kevaka ena vaqaqacotaka na noda vakabauta. Ena so tale na gauna, ena sega ni cakava.
Ni o vulica na nodra bula taumada na parofita ena Veiyalayalati Makawa o sa raica na sala e vukei keda kina na Turaga ena veikalawa yadua me da tucake mai na veivakatovolei dredre. Me vakataka, na sala ni veivuke ni Turaga vei Josefa kei Mosese e vakavulica vei au na sala meu kerea ka ciqoma kina na veivuke ena gauna dredre.
Veivakatovolei nei Josefa
O Josefa, na luvei Jekope daulomani, a biriki ena dua na qara mai vei iratou na tuakana ka qai volitaki yani vakatamata bobula ki Ijipita. A tukuna o iratou na tacina vei tamana ni sa mate o koya. Ena gauna sa tamata dauveiqaravi tiko kina o Josefa, a solia vua na Turaga na kaukauwa me vakadewataka na tadra nei Fero. A vakaraitaka vei Josefa na sala me vakarautaki koya kina o Ijipita mai na dua na lauqa levu sa roro tiko mai. A solia vei Josefa na kaukauwa savasava me vorata na veitemaki, me sereki mai valeniveivesu, ka ni sa yabaki 32 a vakaturi cake ki na itutu cecere mai vei Fero. A kaya o Fero me baleti Josefa, “Eda na kunea li e dua vakaoqo, a tamata sa tiko vua na Yalo ni Kalou?”1
E dua na lesoni au sa vulica ena sala a vukei Josefa kina na Turaga sai koya na sala e rawa ni vukei keda kina o Koya ena veigauna dredre. Ni vakayacora tiko o Josefa na digidigi dodonu, a vaqaqacotaki Josefa na Turaga, solia vua na kaukauwa vakayalo, ka vakamalumalumutaka na lomadra na tamata era tiko maliwai koya.
Sa Raici Jiova o Mosese, maivei Joseph Brickley
Vakatovolei nei Mosese
Sa vakakina, na veivuke ni Turaga vei Mosese ena nona vakatovolei a tautauvata kei na Nona veivuke vei Josefa. Na veivakatovolei i Mosese a tekivu talega ena nona gauna ni itabagone. Sa mai veitawasei o Mosese mai vei rau na nona itubutubu. Na nona vakatovolei taumada me na susugi koya cake na luvei Fero yalewa. Ena nona taqomaka e dua na kai Isireli, a vakamatea e dua na kai Ijipita ka dro ki na vanua dravuisiga.
A rairai vei Mosese na Turaga ka kacivi koya me sereki ira na luvei Isireli mai na veivakabobulataki e Ijipita. Na ilesilesi o ya e vaka me sega ni rawati rawa a dua na veivakatovolei a vakila o Mosese ni sa uabaleti koya. Na veivakatovolei dredre duadua kei na veika dredre ni nomu bula e rawa ni yaco mai ni soli vei iko e dua na itavi mai vua na Turaga ka vaka me dredre ka o vakila ni o gadreva na veivuke ni Kalou.
A tekivu na Turaga ena nona solia vei Mosese na veivuke o na gadreva. A tukuna vei Mosese ni sai Koya ga ena vakaukauwataki koya ena veivakatovolei sa tu mai liu.
“Sa Bula Koi Au Vakai Au: ia … ko na vosa vakaoqo vei ira na Isireli, O koya sa yacana Sa Bula Koi Au sa talai au vei kemuni.”2 Ena veivakadeitaki oya, a rawata kina o Mosese na vakabauta kei na kaukauwa me baleta na veivakatovolei eso sa tu e matana ena nona ilesilesi. A sega walega ni kacivi koya na Turaga ia ena liu na Turaga e matana ena sala veivakurabuitaki eso.
Na Rarama kei Vuravura, maivei Walter Rane
Nomu Vakatovolei
Na veigauna dredre e daru sotava ena duatani sara. E sega ni tautauvata e rua na bula ni tamata. Na veivakatovolei ena ganiti keda yadua mai vua na Tamada Vakalomalagi dauloloma kei na Luvena Daulomani, o Jisu Karisito. Na sala Rau a sauma kina na noda masu ni kere veivuke ena vinaka sara vei keda. Ena so beka ena rawa ni vaqaqacotaki keda, kei na so tale me na solia vei keda na reki ni da sasaga tiko ena vakabauta.
Vei keda kece, na veivuke eda gadreva vakalevu duadua ena noda vakatovolei, ena sala cava ga se cava sara na kena balavu, sai koya na vakabauti Jisu Karisito vakaukauwa. Sai koya o ya na vakabauta a rawa kina vei Josefa me vakadewataka na tadra eso mai Ijipita. O ya e dua na vakabauti Jisu Karisito dina ka a cokonaki ka vakaukauwataki Mosese ena nona ilesilesi dredre me vukea na Turaga me sereki ira na Nona tamata.
Ena gauna ni nomu itabagone, o sa vakatovolei oti ena veigauna dredre, me vakataki au. Ia me vakataki au, o sa vakavulici mo nuitaki Jisu Karisito. Au sa qai kila oqo na vuna au vakila kina e dua na rai vinaka kei na reki ena gauna au se gone kina. A sega ni kena au namaka me vinaka cake se rawarawa na gauna. Ia au sa yalonuidei ni kevaka meu na vakararavi ka qaravi Koya, ena vinaka na veika kece.
A kerei tamaqu o buqu me rau lagasere vata ena ilakolako lesu ki vale ni sa tukuni oti vei buqu ni sa voleka me mate ena kenisa: “Eda na bula tawamudu tu, … Mai kea! Marau ga!”3 Au wasea vei kemuni na noqu ivakadinadina ni sa kila tu o Jisu Karisito ka sa tucake tale na sala me vukei keda yadua kina, se cava ga na noda vakatovolei. Eda gadreva walega na kerekere ena vakabauti Koya.
E lomani iko o Jisu Karisito ka na vukei iko, ena veigauna kecega, ka vakatau ena veika e vinaka duadua vei iko. Au sa vakadinadinataka oqo ena noqu lomani kemuni, vakakina o Koya, ena yaca i Jisu Karisito, emeni.