“Na Sala me Vorati Kina e Tolu na Mataqali Veivakatovolei,” Me iSakisaki ni iTabagone Maji 2022.

Lako Mai, Mo Muri Au

Na Sala me Vorati Kina e Tolu na Mataqali Veivakatovolei

Mai vei David Dickson

Mekasini ni Lotu

E vuqa tu na ibolebole duidui ni bula, ia na gole vua na Kalou e dau kena isau.

Ena vuvu, e ratou a volitaki Josefa vakabobula na tuakana ka qai laki tukuna vei tamadratou ni sa vakamatei mai vei ira na manumanu kila.

A rawa vei Josefa mai Ijipita me taroga e levu na taro me baleta na sala sa tasereki tiko kina na nona bula. O na vulica tiko na nona bula ena vula oqo, ia oqo e dua na ivakaleka totolo ni veika a yaco vua:

Eratou a volitaki koya vakabobula na tuakana.
Ni tiko vakabobula, a beitaki cala ena nona tovolea me mocera na wati nona turaga.
Sa qai yaco me kaivesu tu ena rua taucoko na yabaki.

Raitayalotaka mada na veika a rawa ni yaco ke o iko o Josefa. Sa rawa mada ga, o na temaki beka mo taroga: “Cava na vuna me au kina?” “Na cava au a cakava me yaco kina vei au oqo?”

Dina ga ni a sega ni cakava e dua na cala, a bala ki vale ni veivesu o Josefa me rua taucoko na yabaki.

Tolu na Mataqali Veivakatovolei

A vakavulica o Elder Neal A. Maxwell (1926–2004) ena Kuoramu ni iApositolo Le Tinikarua me baleta e tolu na veimataqali veivakatovolei eda rawa ni vorata ena bula oqo:

Mataqali 1: Na veivakatovolei e basika mai na noda ivalavala ca se caka cala.
Mataqali 2: Na veivakatovolei e yaco baleta ni oqo e dua na vuravura lutu, vakasinaiti ena tauvimate, veimataqali mate, kei na tamata lutu tani.
Mataqali 3: Na veivakatovolei sa tuvakarau na Kalou meda sotava baleta ni vinakata o Koya meda tubu.

Ena loma ni veivakatovolei, eda na temaki beka meda taroga, “Na cava me caka kina vei au?” Ia na taro oqori ena sega beka ni yaga vakalevu ni da nuitaka. A vola o Elder Maxwell se cava ga na vuna eda sotava kina na veivakatovolei, “na vuana e tautauvata ga na kena icavacava ena sala vata ga; sa loma ni Kalou meda lako curuma na bolebole o ya. Ia sa yalataka vei keda o Koya ni Nona loloma soliwale sa rauti keda.”¹ Ena dua tale na kena itukutukuni, e sega ni vakatara na Tamada Vakalomalagi meda lako curuma na veivakatovolei ka sega ni solia vei keda na veivuke eda gadreva mai na Veisorovaki i Jisu Karisito.

iVakaraitaki nei Josefa

Meda raica mada vakatotolo na imatai ni veivakatovolei levu i Josefa: Eratou a volitaki koya vakabobula na tuakana.

E a veivakatovolei “Mataqali 1” beka oqo? A vakavuna beka o Josefa me yaco oqo vua? Ia, e sega. A wasea vakadodonu o koya e vica na nona tatadra vakaparofita me baleti iratou na tuakana. Na veitadra oqori e vakatakila mai ni na yaco me nodratou iliuliu ena dua na siga. E dina sara, eratou a sega ni taleitaka na tuakana na rogoca na ka o ya. Na ka dina, “a ra sa cati koya vakalevu sara ena vuku ni nona tadra” (iVakatekivu 37:8).

Kevaka o iko beka o Josefa, o na raitayalotaka beka ni o vakasamataka tiko, “Kevaka walega meu a sega ni tukuna vei iratou na noqu tadra!”

Se a koya beka na “Mataqali 2” ni veivakatovolei? A lako beka mai na veivakatovolei nei Josefa ni a tiko ena dua na vuravura lutu tani, ka okati kina eso tale na tamata era vakayagataka tiko vakaca na nodra galala ni digidigi? E Rairai Beka. Vakadua tale, ena rawarawa sara vei Josefa me kureulu ka vakasamataka ni nona leqa kece sara a bale ga vei iratou na tuakana. Se na lasu nei wati Potifa. Se o koya mada ga na dauqaravi gunu a rua na yabaki nona guilecava tu me tukuni Josefa vei Fero, ni oti mada ga nona yalataka ni na cakava (raica na iVakatekivu 40:23).

Se o koya taucoko sa “Mataqali 3” ni veivakatovolei? Ena dua tale na kena itukutukuni, a vakatara beka na Kalou me yaco oqo vei Josefa me vukei koya me tubu cake kina? Ena taro oqo, e vakila o Josefa vakataki koya ni kena isau vakatikina talega na io. Ni sa qai sotavi iratou tale na tacina, a kaya, “Ia oqo oqo mo dou kakua ni rarawa, se veicudruvi vakai kemudou, ni dou a volitaki au ki ke: ni sa talai au na Kalou meu liutaki kemudou, me ia na veivakabulai” ( iVakatekivu45:5, vakamatatataki).

Ia oqo, me nanumi tiko, ni a volitaki vakabobula o Josefa ni se yabaki 17. Sa yabaki 30 tiko o koya ena gauna a tu kina ena matai Fero me vakadewataka na tadra ka a vakavuna me sereki mai kina o koya. Oqori e 13 taucoko na yabaki, se voleka ni veimama ni nona bula me yacova na gauna oya, a vakayalia kina o Josefa na nona galala a sega ni vakavuna o koya. Ia a vakabauta ni “Sa talai [koya] mai na Kalou” me ia na veivakabulai. Veitalia na vanua e lako mai kina na veivakatovolei, sa kila vinaka tu o Josefa ni tiko kina na inaki ni Kalou.

Sa rauti koya vinaka oya. Sa rawa ni rauti keda vinaka oqo.

A vosoti iratou na tuakana o Josefa ka vakabula sara mada ga na nodratou bula mai na dausiga. A kila tu o Josefa ni a tubera ka taqomaka tiko na nona bula na Kalou.

Nomu Vakatovolei

E rawa ni da vakayalia vakalevu sara na noda kaukauwa meda taleva tale tiko na veika sa sivi. Eda na nanuma beka, “Na cava na vuna au a cakava kina oya?” se “Kevaka ga me ratou a sega ni lawakitaki au.”

Ia ni da taleva tale tiko na vakacava beka kei na ka rawa sara ga ena sega ni vinaka cake mai na noda lolositaka voli na vuna se na vakacava beka na sala e yaco kina vei iko na veivakatovolei ki na nomu bula. Ena kena itinitini, ena kune ga na vakacegu kei na kaukauwa ni da lako mai vei Karisito ka vakararavi Vua, me vaka a vakayacora o Josefa mai Ijipita. Kevaka eda cakava oqo, na noda vakatovolei kece e rawa ni yaco me kena mataqali ka na vukei keda me da toro voleka vua na Kalou ka yaco me vakataki Koya vakalevu cake.

E vakavuvulitaka o Peresitedi Henry B. Eyring ena Mataveiliutaki Taumada, “E rawa ni o vakataroga vakaidina se cava na vuna e vakatara kina na Kalou dauloloma ka kaukauwa taucoko me dredre na noda vakatovolei ena bula oqo. E baleta ni kila o Koya ni dodonu meda tubu ena savasava kei na ituvaki vakayalo me rawa ni da bula vakavuvale ena Nona i serau me tawamudu.”²

iSau Tawamudu

Kevaka eda sa ivalavala ca, sa dodonu me da veivutuni. Kevaka e tiko e lomada e dua na veivakatovolei meda vinaka cake kina, sa rawa ka dodonu meda cakava vakakina. Ia e vuqa na dredre eda sotava ena bula oqo sa vaka me dau kabiti keda tu vakabalavu cake ka sega ni namaka—ena so na gauna e dua na bula taucoko. Eke talega, na kena isau me da gole ga vua na Kalou.

Na bula oqo e kena inaki me da vakaukauwataki ka vakadinadinataki keda. Ka na lako vata kei keda na Kalou kevaka eda vakasaqarai Koya! E vakavulica o Elder Dale G. Renlund ena Kuoramu ni iApositolo Le Tinikarua, “Ena saumi vakalevu cake na nomu vakabauta na Tamada Vakalomalagi kei Jisu Karisito mai na kena o vakasamataka rawa. Na veika tawadodonu kecega—vakabibi na ka tawadodonu veivakacudrui—ena vakatabui me baleta mo rawa-ka kina.”³

E a “dodonu” beka ni a lako curuma o Josefa na ka a cakava? Sega. Ia baleta ni a lako curuma na veika a cakava, a rawa kina vua me vakabula na veimatanitu, oka kina na nona matavuvale.

O na rairai tiko beka ena loma ni nomu veivakatovolei me vakataki Josefa. O na sega beka ni raica na kena usutu. Se na icavacava.

Me nanumi tiko, ni sa veirauti dina na loloma soliwale ni Kalou. Mo gole Vua, ka na cakacaka veivakurabuitaki o Koya ena nomu bula.