“Domoi Linahei,” Me iSakisaki ni iTabagone, Maji 2022.
Na Domoi Linahei
Mai na sereivakatagi ki na tuva kawa, sa vakayagataka tiko kina o Linahei na domona ena caka vinaka.
Veitaba o Stephane Sayeb; droini mai vei Claire Lock
E kila tu o Linahei D. mai Taiti na sala me vakayagataka kina na domona me vakalougatataki ira kina na eso—ena levu cake na sala. Me kena ivakaraitaki, ni sa vulica tiko o koya me dua na dauveiqaravi ni vosa ena dua na siga. “Au vinakata meu vukei ira na gone ena nodra sipeli se na ivakarau ni nodra vosa,” e kaya o koya.
Oqori ga na kena itekitekivu. A sucu ki na dua na matavuvale vakataledi ena sereivakatagi, ka levu sara na madigi nei Linahei me vakayagataka na domona ena lagasere. “Keirau dau taleitaka vakaveiganeni me keirau lagasere vata. E dau domo icake toka o koya, kau dau domo ira!”
Ka sa tiko talega na mataivakatagi ni vuvale taucoko. “E dau vakatagitaka o tinaqu na piano me veivuke ena vakavulici keitou ena sere, ka dau qiri qita kei na ukalele o tamaqu.” Me qai vakacava tu na mataivakatagi ni vuvale ke sega eso na tamela lalai? “Keirau dau taleitaka kei tamaqu na qirita na to‘ere, o ya e dua na dramu vaka-Polinisia.”
Ni sa tokoni koya taucoko na mataivakatagi, a vukei koya na nona vuvale sega walega ena sereivakatagi. “Rau dau vakayaloqaqataki au na noqu itubutubu ena vuli, ka dau solia vei au o tamaqu na veivakalougatataki ni matabete.” Ni yaco mai na veigauna dredre, e kila o koya ni rawa talega ni gole vua na Tamana Vakalomalagi. “Au kila na levu ni nona lomani au na Turaga ka sa dau tu ga e kea o Koya me baleti ira na Luvena.”
E sega walega ni vakayagataka o Linahei na domona me baleta na ivakatagi kei na masu, ia a vosa talega me baleta na nodra vukei na lewe ni matavuvale ena yasa kadua ni ilati.
Na Domo ni Loloma ki na Matavuvale ena daku ni iLati
“Au a tadra ena dua na bogi kau a raica kina e drau na tamata, ia e sega ni dua vei ira e rawa ni veitaratara vakai ira,” e kaya o koya. “Au nanuma niu sa kilai ira, ia au sega ni vakadeitaka.”
A sega ni kila taumada o Linahei na ibalebale ni tadra o ya. Oti a qai vakasamataka sara: “Ni bera na vakatatabu ni COVID-19, au a vakayacora e sivia ni 100 na papitaiso ena vukudra na noqu qase e liu—o ira na tamata oqo ena noqu tadra e rawa ni matataki ira na lewe ni matavuvale oya!”
Ni sa marautaka vakalevu cake na tuva kawa mai na kena e liu, a cakava o Linahei na veika kece e rawata me vukea na kau ni veiyaca oqori ena valetabu me ciqomi kina na ikuri ni nodra cakacaka vakalotu. Ni oti ga vakalailai, erau sa kacivi o Linahei kei tinana me rau daunivakasala ni tuva kawa ena nodratou tabanalevu.
“Keirau a vukea e dua na marama ena neitou tabanalevu me curu ki na nona akaude ni FamilySearch. Ni raica na nona vunikau ni matavuvale, sa marau vakalevu o koya—oqori na imatai ni gauna me raici ira kece kina na nona qase e liu!”
“Au dau ririko na gole vei ira na tamata ena noqu tabanalevu,” a vakadinadinataka o Linahei. “Ia oqo ni keirau sa mai tiko vata kei tinaqu, au yalonuidei vakalevu cake niu vakavulici ira na tamata me baleta na tuva kawa.”
Laveta na Domomu
Sa nanamaki tiko oqo o Linahei me vukei ira na tamata mera vulica na veika baleti ira na nodra qase e liu. “Au taleitaka niu raica na nodra marau na tamata ni ra cakava na nodra tuva kawa. Kau nanuma ni ra sa marau na neimami qase e liu ni da kauwaitaki ira ka vakayacora na nodra cakacaka vakalotu.”
Ena nona veikacivi vakadaunivakasala ni tuva kawa, a tauyavutaka wale toka ga e dua na itaviqaravi me baleti ira na goneyalewa ni nona tabanalevu. E sega walega ni vukei ira me ra kunea na yaca ni matavuvale me ra kauta ki valetabu, ia a vukei ira talega na gone ena Lalai me ra tuva na akaude me rawa ni ra vakaitavi kina.
“Keirau sa na gole tiko vakatotolo ki na valetabu,” a kaya.
Vinakata mo caka totoka vakataki Linahei? Kakua ni lomaleqa, e rawa vakaidina. “Sa rawa vei ira na itabagone mera toroya cake na itavi ni Kalou ena vakayagataki ni tekinolaji,” e kaya o Linahei. “Na veika cava ga ena vukei keda meda vakasamataki ira na noda qase e liu sa totoka dina. Au kila ni cakava na tuva kawa ena kauta mai na reki ki na nodra bula na tamata kecega. Na tuva kawa sa kauti au vakavoleka sara vei ira na noqu qase e liu vakakina vei Karisito ena dua vata ga na gauna.”
Ena cakacaka kece e cakava tiko vei ira na nona qase e liu, e dua na ka e dina: na matavuvale nei Linahei e sega ni itukutuku makawa walega!