Taro kei na Kena iSau

“Na cava meu cakava niu vakila ni noqu sasaga meu wasea na kosipeli e sega ni vakayaco veisau?”

“Nuitaka na Turaga ni na cakava na Nona cakamana. … Kakua ni yalolailai kevaka e dua e sega ni ciqoma vakatotolo na itukutuku ni kosipeli. E sega ni nomu druka. Oqori e nodrau ga na tamata oya kei na Tamada Vakalomalagi. E nomu itavi ga mo lomana na Kalou ka lomani ira na wekamu, o ira na Luvena.”

Elder Dieter F. Uchtdorf ena Kuoramu ni iApositolo Le Tinikarua, Epe. 2019 koniferedi raraba (Ensign se Liaona, Me 2019, 17).

Muria na iVakaraitaki i Karisito

“Ena dua na gauna a kaya o noqu qasenivuli ni sega ni tiko na Kalou. Au sa wilika tiko na iVola i Momani ena veisiga kau kila na ka e tukuna tiko o koya e sega ni dina. Au a tovolea meu wasea na noqu ivakadinadina, ia a sega ni vakarorogo. Au sa vulica ni noqu itovo e rogo vakalevu cake mai na noqu vosa. Era veitokoni sara vakalevu na noqu itokani ki na noqu ivakatagedegede. Era dau wanonovi au tu ga baleta niu lewe ni Lotu.”

Valeria F., 18, Honduras

Kerea na Veivuke.

“Sa vuqa tale tu na sala me wasei kina na kosipeli. Ena so na gauna na nomu sasaga vinaka duadua ena sega ni vakadeitaka ni ra na taleitaki iko na nomu itokani. O sega ni tiko ga vakataki iko. Kerea na veivuke vua na Tamamu Vakalomalagi kei na iVakabula. O na rawa ni kunea e dua na ka vou.”

Banri O., 15, Japani

Mo iVakaraitaki Vinaka

“Au dau nanuma tu ga na nodra ivakasala na noqu iliuliu: ‘Na nomu ivakaraitaki sa dua na sala uasivi duadua ni wasei ni kosipeli.’ Kevaka eda segata me da ivakaraitaki vinaka ka me rarama vei ira na tani, ena rawarawa cake vei keda me da wasea na kosipeli vei ira e vuqa na tamata. Ni da matataki Jisu Karisito e rawa ni kauta mai na veivakalougatataki cecere ki na noda bula kei ira era tu wavoliti keda.”

Bonnie Q., 16, Bolivia

E Nodra na Digidigi

“Au sa dau besetaki vakavuqa niu dau wasea yani na kosipeli. Na ka dina, ena so na gauna au dau rarawa baleta niu sega ni raica me yaco e dua na ka. Au sa vulica ni sega ni noqu cala ni ra sega ni ciqoma na kosipeli na tamata. Sa nodra digidigi, ka dodonu meu dau vosota. E muri ena rawa ni vakayaco veisau na noqu sasaga. Au rawa ni dau masulaki ira na tamata au sureti ira.”

Cristina B., 18, Romania

Veivakavulici ka iTovo Vakataki Karisito

“Eda rawa ni vakasamataka na sala vou, ka lasa ni kena wasei na kosipeli. Me kena ivakaraitaki, e rawa ni da vuli mai na sala a vunau kina o Jisu Karisito ena vosa vakatautauvata kei na itovo. Na noda itovo e vakaraitaka o cei o keda kei na noda ivakatagedegede.”

Johann S., 16, Bolivia

Mo Dauvosota

“Au sa dau besetaki vakavuqa niu dau wasea yani na kosipeli. Na ka dina, ena so na gauna au dau rarawa baleta niu sega ni raica me yaco e dua na ka. Au sa vulica ni sega ni noqu cala ni ra sega ni ciqoma na kosipeli na tamata. Sa nodra digidigi, ka dodonu meu dau vosota. E muri ena rawa ni vakayaco veisau na noqu sasaga. Au rawa ni dau masulaki ira na tamata au sureti ira.”

Cristina B., 18, Romania

Tovolea Tikoga!

“Ena vuqa na gauna au dau sureti ira na noqu itokani me ra lako mai ki lotu ena Sigatabu, ia era vakasuka na veisureti. E dredre me da besetaki, ia niu wilika na ivolanikalou, au kila ni veika kece eda cakava vei ira na tamata, eda cakava tiko vei Jisu Karisito. Au vakabauta ni noda dau vosota sa idola. Eda sega ni kila na gauna e rawa ni vakalougatataki ira kina na tamata na vosa eda wasea.”

Valeria V., 14, Bolivia

Mo Masulaki Ira

“E dua na sala rawarawa mo wasea kina na kosipeli sai koya na nomu vakaraitaka nomu loloma vei ira na nomu itokani. E rawa ni o masuta mo yaloqaqa mo wasea na kosipeli. E rawa talega ni o masulaki ira me ra kila vakavinaka cake na itukutuku ni kosipeli.”

Yuria K., 18, Japani

Na veivosa e nakiti me veivuke ka vagolea na rai, e sega ni kakaburaki vakaivola ni vunau ni Lotu.

Na Cava Nomu Nanuma?

“Meu na vukei ira vakacava na noqu itokani era luluqa tu ena Lotu me vaqaqacotaki na nodra ivakadinadina?”

Vakauta mai na nomu isaunitaro kei na itaba ni bera nai ka 15 ni Epereli, 2022.

Lako ki na ftsoy. ChurchofJesusChrist.org ka kilikitaka na “Submit Your Work.” Curu ena nomu Akaude ni Lotu ka digitaka na “For the Strength of the Youth” ena ruku ni “Choose Magazine.” Kiliki ena “Add File” mo digitaka na nomu faile kei na itaba, ka qai kilikitaka na “Submit” mo vakavodoka ka vakauta mai na nomu faile. Se imeli mai ena [e-mail]

Ena rawa ni moici na nomuni itukutuku me baleta na kena balavu se kena matata.