“E Rawa ni Vukei Au na Yalo meu Kila na Sala meu Veiqaravi Kina,” Me iSakisaki ni iTabagone, Maji 2022.
Na iToko kei Au
Era wasea na itabagone na sala era bulataka tiko kina na vosa ni iToko ni Goneyalewa kei na Kuoramu ni Matabete i Eroni
E Rawa ni Vukei au na Yalo meu Kila na Sala meu Veiqaravi Kina
“Me vaka niu dua na tisaipeli i Jisu Karisito, au segata meu na vakataki Koya. Au dau vakasaqara ka cakacakataka na ivakatakila e yaco kivei au ka veiqaravi vei ira na tamata ena Yacana tabu.”
Ena gauna ni matedewa ni COVID-19, e vuqa na tamata a musu na kedra isau se vakayalia na nodra cakacaka. Au a via vakamamadataka vakalailai na nodra icolacola. Ena veitokoni mai vei tinaqu kei tamaqu, ka vakayagataka ga na noqu ilavo, au a tekivu soli kakana vei ira era vakaleqai tu. Au dau cakava oqo ena noqu otataka na kakana baleti ira na tamata ena dua na app ni tekisi basikeli. Ena so na gauna au dau kauta na kakana ki na vanua era tiko kina na vakaleqai tu.
E Indonesia e vuqa tu na draiva ni tekisi motopai. Keimami dau vakayagataka e dua na app ena neimami talevoni me qiriti kina na nodra veiqaravi. Ena gauna ni matedewa, era a sotava na draiva e dua na gauna dredre me ra taura na ota.
Dua na siga, au a vakamuria na veivakauqeti ni Yalo meu vukea e dua na draiva. Au a otataka na kakana mai na app ni tekisi basikeli. Ia ni yaco ki na vale ni kana me taura na kakana, au a vakauta vua e dua na itukutuku, ka kaya ni kakana o ya sa baleti koya. A kurabui o koya ka sega ni vakabauta ni sa baleti koya sara ga. Niu kaya ni sa baleti koya, a vakavinavinakataki au sara mai ka masulaki au. A kaya ni na kauta i vale na kakana o ya ka solia vei luvena. E rogo mamarau na domona. Oqo a vakavuna meu marau talega vakalevu!
E dina ni keitou sotava tale tikoga vakamatavuvale eso na ibolebole, au a vakarorogo ki na Yalo ka digitaka meu veiqaravi. Keitou a rawa ni sotava na reki kei na marau, ka a vukea me keitou uabaleta rawa na neitou ibolebole.
Au sa vakavinavinaka vakalevu vua na Yalo Tabu. Na ka oqo e vakavotuya vei au e dua na ivolanikalou mai na Veiyalayalati Vou, na Joni 13:34: “E dua na vunau vou kau sa solia vei kemudou, Mo dou veilomani; me vaka kau sa lomani kemudou, mo dou veilomani talega vakakina.” Au kila ni da muria na Yalo, eda na ciqoma na veivakalougatataki totoka mai vua na Tamada Vakalomalagi.
E vakaitikotiko o koya a vola e West Java, Indonesia.