Ki na Utona

Na cava na vuna a veisautaka kina na Kalou na yaca i Jekope ki na Isireli?

Droini mai vei Keith Larson

O Jekope na luvei Aisake tagane ka makubui Eparaama tagane. Me vakataki rau, e dau gagadre savasava o Jekope ka vakasaqara na veivakalougatataki ni Turaga.

Ena dua na gauna bibi ena nona bula, “a sasaga bula o Jekope mai na dua na bolebole kaukauwa. A vakatovolei na nona galala ni digidigi. Ena sasaga bula oqori, a vakadinadinataka kina o Jekope na cava e bibi duadua vua. A vakaraitaka ni sa tu vakarau me laiva na Kalou me qaqa duadua ga ena nona bula. Me kena isau, a veisautaka na Kalou na yaca i Jekope ki na Isireli,, e kena ibalebale ‘me qaqa duadua ga na Kalou.’ Sa qai yalataka na Kalou kivei Isireli ni veivakalougatataki kece a cavuti ena ului Eparaama ena nona talega” (Russell M. Nelson, “Me Qaqa Duadua Ga na Kalou,” Koniferedi Raraba Okot. 2020 [Ensign se Liaona, Nove. 2020, 92]). Na tauri ni yaca vou oqo sa ivakatakilakila ni kena ciqomi na veiyalayalati erau sa ciqoma na tamana kei tukana.

Ni da sa papitaiso, eda sa cakava na veiyalayalati. Eda sa vakaraitaka talega ni sa lomada me da taura kivei keda e dua na yaca vou—na yaca i Jisu Karisito. Me kena ikuri, eda sa yaco meda tiki ni yavusa o Isireli—o ira era sa veiyalayalati vata kei na Kalou ka yalataka me “qaqa duadua ga na Kalou” ena nodra bula. Sa qai yalataka vei keda na Kalou na veivakalougatataki vata ga a yalataka o Koya kivei Eparaama, Aisake, kei Jekope.