“Teniua Kawai ni Kauarerekea te Itabaraaraa inanon Am Utu,” Ibukin Kakorakoraia Kairake, Maati 2022.
Maiu n Ibuobuoki
Teniua Kawai ni Kauarerekea te Itabaraaraa Inanon Am Utu
Am utu n tabetai a kauntaeka? Tiaki ti ngkoe ae ko kaitara ma te aekaki ni kangaanga anne.
Kamataata n te tamnei iroun Alyssa M. Gonzalez
-
“E aki eti anne! Bon au tai!”
-
“Eei, ko aki bubuti ibukin tangoan te bwai anne!”
-
“Dad! E kaenaenaai Anita!”
Ngkana ko taneiai ma tangin marooro aikanne, ao bon ngkoe naba kaain te utu. Ao akea te utu ae kona ni kamanoaki man tibwauakin te kangaanga. Unimwaane David A. Bednar man te Kooram n Abotoro n te Tengaun ma Uoman n te taina ao e tibwauaia bwa a tia aia ataei ni ngurengure, “Mom, e ikeikena au eea!”1
Te itabaraara bon te bwai ae ririki inanon te utu. Ni koauana, temanna e na mwakuri korakora bwa e aonga ni kona n riki. Te Tia Kamaiu e kamataata, “Bwa ane iai irouna tamnein te kakauntaeka ao bon tiaki mairou, ma bon mai iroun te riaboro, are taman te kakauntaeka, ao e kakiriweei nanoia aomata bwa ana itabaraara ma te un imarenaia” (3 Nephi 11:29).
Ma tai maaku! Te euangkerio e reireiniira bwa e mwaiti riki ae ti kona n karaoia ni kauarerekea te itabaraara inanon ara utu—ao n rinanon te kukurei ae bati!
Kawai 1: Kanakoa te Bwaa
Te ai e kainnanoa te bwaa bwa e na ura. Ti tebo ma te itabaraaraa. Ao akea te bwai ae kakorakora te kauntaeka ma tii teimatoan te kakauntaeka. Ngaia, tera ae ko kona ni karaoia ngkana temanna e kan kauntaeka ma ngkoe?
Eng, ko kona ni kabebetea ni kakea te kauntaeka. Te Tia Kamaiu bon ara banna ni katooto ae kororaoi n te mwakuri aei. Inanon Ana mwakuri E ribaaki, e bwainikirinaki, e kamwaneaki, ao e tauraki iaon te kaibangaki. Ma, riki ngkana a matoatoa ao ni kainetiko ana kaeka, bon akea Irouna te nano ni kakauntaeka. Ao n tokina E aki un ni kaitara, e ngae ngke e kona n tia ni weteia “taanga n anera aika mwaiti” bwa a na Buokia (Mataio 26:53). Irarikina, E tataro ibukiia Ana kairiribai, e ngae ngke e katineaki iaon te kaibangaki (taraa Ruka 23:34).
Te rawa n kakauntaeka e kona ni karikiira bwa taan kakauongo aika nakoraoi riki. Ao ngkana e tamaroa ara kakauongo, ti kona n reitaki n ae tamaroa riki ao ni kona n riki bwa taan raoi. Te aki kakauntaeka e kona naba n irekereke ma te kaeka n te bwana ae marau ao karaoan ae ti kona ni kakaraua nanora.
Akean karinakin te bwaa, angiin te kauntaeka ao te itabaraaraa a na akea n te tai ae waekoa. N aron are a reirei booki aika tabu, “E raira nako te un te taeka ae nimamanei” (Taeka n Rabakau 15:1).
Kawai 2: Kaota te Tangira
Kaotan te tangira nakoia kaain am utu bon te kawai ae moan te tamaroa ni kaakea te itabararaa inanon te mweenga. Karaoan aei e kona ni katoka naba te itabararaa man moan karaoakina n te moan n tai!
E ngae ngke te itabaraaraa e riki bwa kanga otangara, te tangira ao te akoi a kona n teimatoa ni kanakoraoi bwaai.
Iangoa karakinan te aine man te Baibara are e bukinaki ni bure. Ni kaineti ma ana tua Mote, ao e riai ni kaman tia ni karebanaaki n te atibu. Te koraki ake a un a kairoroa Iesu bwa e na motika taekan neiei.
Ma tera ana kaeka te Tia Kamaiu? Te moanibwai, e aki waekoa ni kaeka nakon te bwai ae kairoroaki iai. E katorobubua ao e koroboki iaon tano tabeua te tai imwain ae taetae. (Buokana: n taai tabetai ao e raoiroi riki te aki kaeka n te tai ae waekoa ngkana e koburake te nano.)
Ngkanne E kaota te tangira ao te nanoanga ibukin te aine ngke E tuangiia aomata aika bobotaki, “Ane tuai meni bure i buakomi ao e na karea moa neiei n te atibu” (Ioane 8:7).
Iesu e kaota te tangira nakon te aine, tiaki te motikitaeka. E kaota nanona ni kan kabwara ana bure ngke E tuangnga bwa “e na nako, tai manga bure” (Ioane 8:11).
Tuangiia kain am utu bwa ko tangiriia. Kaota te tangira anne man kabwaraan aia bure ao ni kariaia bwa a na bitaki—e ngae ngke a kaota te un nakoim. E kona te tangira ni kanakoraoi bwaai ni kabane.
Kawai 3: Tataro
Te tataro e uoti ana kakabwaia te Atua rinanoni maiura. Inanon Ana Boki Moomon, e reirei Amureka, “Kam riai ni kaota nanomi i nanon ami ruu ni bwai, ao n ami tabo aika a raba, ao n ami rereua.
“Eng, … kaona nanomi, ma ni kakorakorai ngkami n tataro nakoina n aki toki ibukin mweraoimi, ao mweraoia ake a mena i rarikimi” (Aramwa 34:26–27).
Ni koauana “aomata ake irarikim” n raonaki ma am utu—ai moara riki naake aki maeka ma ngkami n te tai aei. Ngaia, ae tataro ma am utu. Tataro ibukin am utu. Tataro bwa ko na kona n teimatoa n tararua unim ngkana a kauniko tabeman. Tataro bwa ko na konaa n ataa arom n kaitarai taai ni kangaanga aika na roko n am utu. Tataro ibukin te buoka mai ieta. Tataro bwa e na korakora te kukurei ao te tangira inanon mweengam. Ao imwiina karaoa ae ko kona ni karaoia bwa e na riki.
Ngkai ko teimatoa n maiuakina ana euangkerio Iesu Kristo ni kabane, ko na kunea ae am utu e na bon kakabwaiaaki. E na kerikaaki te itabaraaraa, ao kimwareireimi a na rikirake.