“Mwaakan te Nakoanibonga ni Butinakon te Aoraki,” Ibukin Kakorakoraia Kairake, Maati 2022.
Te Boto n Iango ao Ngai
Kairake a tibwaia bwa a kanga ni maiuakin taeka ake n aia Boto n Iango Ataeinaine ao te Kooram n te Nakoanibonga ae te Aaron
Mwaakan te Nakoanibonga ni Butinakon te Aoraki
“N na tangira te Atua … ao ni kabongana Ana nakoanibonga ni buokiia tabeman, ni moanaki man mweengau.”
Tamnei iroun Getty Images
Ngke ti moana karaoakin te taromauri ni mweengara ibukin butinakon te aoraki ae te COVID-19, I ibuobuoki n anga te toa nakoia au utu. E tikiraoi karaoan aei inanon oin mweengau, ao I namakina te kakaitau ibukin karaoan te toa. I kakaitau bwa I kona ni maiu ni karokoa te tai aei ni karaoa te taromauri ni mweengau.
Temanna kaain rarikira e kainnanoa temanna bwa e na uota te toa nakoina. Akea mai irouia kaain mweengana ae kona ni katauraoa ke ni kakabwaia te toa bukina bwa e a tia ni mate kainabana tabeua te ririki n nako. E rang n tararuaia naba mai irouia aika roko ibukin te butinaoraki aei. Tamau ao ngai bon taari n te mwakuri n ibuobuoki ibukina, ngaia are ti anga nanora bwa ti na anganna te toa ni kabonganai nangoan te ubu ao ni karaoi kamanomano riki ake tabeua ibukin kamanoana naba.
E bon rangi ni kakaitau ngkai ti kona ni kawaria ni mweengana. I namakina teutana te nanokawaki ngkai e tiku n ti ngaia, riki ngkai ti ngaia ni mweengana n tain te butinaoraki aei. Ma I kakaitau naba bwa I kona n anganna te bwai ae rangi ni kakawaki ae e na kakukureia. E rangi n tikiraoi ngkai ti kona ni buokia. E kakukureiai ngkai ti kona ngai ma tamau n nako ao ni buokiia kaain rarikira.
I rangi ni kakaitau ngkai ti karekea te nakoanibonga bukina bwa e aki ti kakabwaiai ma aomata naba ake tabeman. E buokai ni karikai bwa te aomata ae nakoraoi riki ao e buokai bwa N na kanga ni kona ni beku ibukiia tabeman. Kabutan te toa ni mweengau ao nakoia kaain rarikiu e kauka au iango. I kainnanoia n ana te tai ni kabuta te toa ao ni buokiia aomata aika a kona ni karaoia ibon ibukiia. I kakaitau bwa I kona ni kabongana te nakoanibonga ni kakabwaiaia tabeman aomata ao bon au utu.
E maeka te tia korokaraki i Utah, USA.