“Ko na Kanga Ni Kaitarai Aekan Kataaki Aika Teniua,” Ibukin Kakorakoraia Kairake, Maati 2022.
Nakomai, Iriirai
Ko Na Kanga ni Kaitarai Aekan Kataaki Aika Teniua
A mwaiti aekan kataaki n te maiu aei, ma te rairaki nakon te Atua bon te kaeka n tainako.
Kamataata n te tamnei iroun Simini Blocker
Ibukin aia bakantang, tarin Iotebwa a kaboanako bwa te toro ao a tuanga aia karo bwa e a tia n tiringaki irouia maan ni kakang.
E na tia Iotebwa mai i Aikubita n titiraki titiraki aika mwaiti ibukin bwaai aika a tia n riki ni maiuna. Kam na kamatebwaia aron maiuna n te namwakaina aei, ma aio kakimototoan rongorongon te bwai ae riki nakoina:
-
Tarina a kaboa nako bwa te toro.
-
Ngke riki bwa te toro, e bukinaki n ae kewe bwa aongkoa e kataia ni wenenibure ma buun ana mataniwi.
-
Imwiina e riki bwa te bure inanon te maan ae uoua te ririki.
Iangoa te bwai ae ko na namakinna ngke arona bwa ngkoe Iotebwa. Ibukin aei, e na bae n anaaki nanom bwa ko na titiraki: “Bukin tera e riki aei nakoiu?” “Tera ae I karaoia ni karekean te bwai aei?”
E ngae ngke e tuai ni karaoa te bure, e kabureaki Iotebwa n temaan ae uoua te ririki.
Teniua Aekan Kataaki
Unimwaane Neal A. Maxwell (1926–2004) man te Kooram n Abotoro n te Tengaun ma Uoman n te taina e reirei taekan teniua kataaki aika ti kona ni kaitara mangaai n te maiu aei:
-
Kataaki 1: Kataaki aika reke man oin ara bure ke ara kairua.
-
Kataaki 2: Kataaki aika riki ibukina bwa aio te aonaaba ae onrake n te bure, e onrake n te aoraki, man n aoraki, ao aomata aika aki kororaoi.
-
Kataaki 3: Kataaki aika e tangiria te Atua bwa ti na rinanoi ibukina bwa E tangiriira bwa ti na rikirake.
Inanon te kataaki, e na bae n anaaki nanora n titiraki, “Bukin tera e riki aei ni maiu?” Ma e na aki rangi ni kakawaki te titiraki anne nakon are ti kantaningaia. E koroia Unimwaane Maxwell bwa ngkana ti aki tabe bwa bukin tera ti na karekea te kataaki, “mwiina e na bon titebo; e tangiriira te Atua bwa ti na rinanon te kakaewenako anne. E ngae n anne ao e berita nakoira bwa e tau Ana akoi ibukira.”1 N taekana teuana, e aki kariaia Tamara are i Karawa bwa ti na rinanon kataaki n aki anganiira te ibuobuoki ae ti kainnanoia rinanon ana Mwakuri ni kamaiu Iesu Kristo.
Ana Banna ni Katooto Iotebwa
Ti a rinanon riki te karaki ni moan katakin Iotebwa: Tarina a kaboa nako bwa te toro.
Aio are te “Kataaki 1”? E karaoa te kataaki aei Iotebwa ibon irouna? Ngaia anne, e aki. E ti tibwauai miina ni burabeti tabeua ni kaineti ma tarina ake a ikawai riki. A kaotia miina aikanne bwa e na riki bwa aia tia kairiiri n te tai teuana. Eng, tarina ake a ikawai riki aki tangiria n kan ongo te bwai anne. Ni koauana, “a manga ribaia riki i bukini miina nako” (Karikani Bwai 37:8).
Ngke arona bwa ko mena n ana kangaanga Iotebwa, ko na kona n iangoia ibon iroum, “Ngke arona bwa I aki tuangiia taekan miiu!”
Ke ibukin te kataaki ae “Kataaki 2”? E roko katakin Iotebwa man te aonaaba ae iai te bure iai, are e raonaki ma aomata ake a kabongana buaka inaomataia? Tao eng. Teuana riki, e na bon tia ni bebete ibukin Iotebwa bwa e na kaota aki kukureina ao n iangoia bwa a kanga ana kangaanga ni kabane n riki bwa aia kairua tarina. Ke e kanga ni kewe buun Botiba. Ke e aera mataniwiia taan uouota niman te uea inanon uoua te ririki , ni mwaninga n tuanga Baraoimwiin are e berita bwa e na karaoia (taraa Karikani Bwaai 40:23).
Ke bwaai ni kabane aikai ibukin te kataaki ae “Kataaki 3”? N taekana teuana, tao bwaai aikai aika e kariaia te Atua bwa e na rinanoi Iotebwa ni buokia n rikirake? N te titiraki aei, e namakina mwakoron te kaeka Iotebwa bwa eng. N tokina ngke e a manga kaitibo ma tarina, e taku, “Ao ngkai kam na tai raraoma, ao tai un i roumi, ngke kam kaboai ngkoa nako ikai: ba E kanakomaiai te Atua i maimi ba N na kamaiua te aba” (Karikani Bwai 45:5, e kairaki ma katuruturuana).
Ngkai, uringnga, e kaboaki nako Iotebwa bwa te toro ngke te 17 ana ririki. Bon 30 ana ririki ngke e tei imatan Barao bwa e na kabwarabwarai mii are e na kona ni kainaomataki iai. Anne e karika 13 te ririki, ke e kania iteran maiuna nakon te tai anne, te tai are e kabua iai inaomatana Iotebwa rinanon ae akea oin ana bure. Ma iai ana onimaki bwa “te Atua e [kanakoa]” bwa e na kamaiu maiuia aomata. E aki tabe bwa e nako maia te kataaki, Iotebwa e ataia bwa iai bukina iroun te Atua.
E tau anne ibukina. E kona n tau anne ibukira.
E kabwarai aia bure tarina Iotebwa ao e kamaeu naba maiuia man te rongo. E ataia Iotebwa bwa e a tia te Atua ni kairiia ao ni kawakina maiuna.
Katakim
Ti kona ni kabanei korakorara aika mwaiti n teimatoa n iangoi kanoan taai aika nako. Ti kona n iangoia, “Bukin tera I karaoa anne?” ke “Ngke arona bwa te aomata arei e aki mwamwanaai.”
Ma te teimatoa n iangoan ngke tao arona ao e na bon riki aei ngkei e bon aki raoiroi ibukira riki nakon karikan am raraoma bwa bukin tera ke e kanga te kataaki n roko ni maium. N tokina, te rau ao te korakora a kuneaki man te nakon Kristo ao n Onimakinna, n aron ae karaoia Iotebwa ae kaain Aikubita. Ngkana ti karaoa aei, a kona kataakira n riki bwa aeka ni kataaki aika a buokiira n rikirake ni kaan riki nakon te Atua ao n riki n ai Arona.
Beretitenti Henry B. Eyring man te Moan Beretitentii e a tia n reirei, “Ko na bae ni iangoia ao ni miimi bwa e aera te Atua ae tatangira ao n rangi ni mwaaka ni kariaia bwa kataakira n te maiu ae mamate e na rangi ni matoatoa. Bon ibukina bwa E ataia ae ti riai n rikirake n te itiaki n tamnei ao n arora bwa ti aonga ni maeka ma Ngaia n utu aika akea tokiia.”2
Kaniwanga Aika Akea Tokiia
Ngkana iai ara bure, ti riai n rairinanora. Ngkana ti kona ni kanakoraoira ke ni buoka te kangaanga, ao ti riai ni karaoia. Ma angiin kangaanga aika ti kaitarai n te maiu aei a taraa n reitinako n aron are ti na kantaningaia—n tabetai e reitinako n te roro teuana ma teuana. Ikai, naba, te kaeka bwa ti na rairaki nakon te Atua.
Bukin raoi te maiu aei bwa e na kataira ao e na karekea ara tai n rikirake. Ao e na raoniira te Atua ngkana ti Ukoukoria! Unimwaane Dale G. Renlund man te Kooram n Abotoro n te Tengaun ma Uoman e reirei, “Am onimaki iroun Tamara are i Karawa ao Iesu Kristo e na raka riki kaniwangana nakon are ko kona n iangoia. Babaire aika katanginano—riki te babaire ae aki boraoi ae rangi ni kaun—e na katabuaki ibukin rakam.”3
E “boraoi” te bwai are e rinanona Iotebwa ma te bwai ae karaoia? E aki. Ma ibukina bwa e rinanon te bwai ae karaoia, e kona ni kamaiui maiuia kaain abana, n raonaki ma ana utu.
Ko na bae ni mena i nukan kataakim n aron are e rinanona Iotebwa. Ko na bae n aki ataa bukin te kataaki aei. Ke tokina.
Ti uringnga, bwa e bon tau ana akoi te Atua. Rairaki nako Ina, ao E na karaoi bwaai aika kamimi ni maium.