“E Kona ni Buokiira te Atua n Taai ni Kangaanga,” Ibukin Kakorakoraia Kairake, Maati 2022.
E Kona ni Buokiira te Atua n Taai ni Kangaanga
Iesu Kristo e ataia bwa ti kona ni buokiira n tatabemaniira, ni katakira nako.
E nakonako te Tia Kamaiu Iaon Taari, iroun Walter Rane
I uringa bwa e kanga aron au namakin ngke te ataeinimwaane ngai, ni maiu n taai aika a taraa ni kangaanga. Iai te buaka n te aonaaba ae reitinako. Ataeinimwaane aika a ikawai teutana nakoiu a tiringaki n te buaka. Iai aia buaka taian kaeng aika maeka iraririkira. Kerikakin kaubwain te aba ni kabuta te aonaaba e tuai toki, ao a mwaiti aomata aika a rarikin. Ti ngai ma au utu Aika Itiaki ni Boong aika Kaitira n te taun are ti maeka iai.
E ngae n anne, I kukurei ao ni kakoaua bwa a na nakoraoi bwaai ni kabane. I a tia n reireinaki, n aron are ko a tia n reiakinaki iai, ae bon kakabwaia aika a na koro bukiia ngkana a rairiira nakon Tamara are i Karawa ao te Tia Kamaiu ibukin te ibuobuoki.
Bukin Tera Te Kataaki?
A anganiira kataaki te tai ae kakawaki n rineia ni kamwakura te onimaki. Ti kona n tataro ni bubuti ibukin te ibuobuoki mairoun Iesu Kristo, ae ataia bwa e na kanga ni kamaiura. E rinanon kataaki ni kabane aika ti na kona ni kaitarai. E ataia raoi bwa e na kanga ni kamaiura n tatabemanira nako. Ao E tangiriira.
Te kantaninga n taian kakaewenako ni maiura bon norakina bwa tera ae ti na rineia ni karaoia. Ti na kamwakura te onimaki ni kawakin tuua aika E anganiira ni katakira aika ti kaitara mangaai? Te Atua ae tangira e karaoa te bwai ae moan te tamaroa n tainako ibukira. E kona ni kanakoi ke ni kauarerekei katakira ngkana te bwai anne e na kakorakorai ara onimaki. N taai tabeua, E na aki kona.
Ngkana ko kamatebwai maiuia burabeti ake ngkoa n te O Tetemanti ko a tia n nora te kawai ae buokiira iai te Uea n te mwaneka teuana ma teuana n tokanikai iaon kataaki aika kangaanga. Te katooto, ana kawai te Uea ni buoka Iotebwa ao Mote e reireinai bwa n na kanga ni bubuti ibukin ao ni karekea te ibuobuoki n taai aika matoatoa.
Katakin Iotebwa
Iotebwa, natin Iakobwa ae tangiraki, e karenakoaki inanon te bwangabwanga irouia tarina ao ni kabonakoaki bwa te bure nako Aikubita. E tuangaki ana karo irouia tarina bwa e a tia n tiringaki. Ngkai e a riki Iotebwa bwa te toro, e anganaki te mwaaka iroun te Uea bwa e na kabwarabwaraa miin Barao. E kaotia nakon Iotebwa bwa e na kanga Aikubita n tabe ma te rongo nakon taai aika a na roko. E angan Iotebwa te korakora n totokoa te kaririaki, ni kainaomataki man te karabuti, ao ni karikirakeaki nakon te nakoa ae rietaata riki n rorona ae 32 iroun Barao. E taku Barao nakon Iotebwa, “Ti kona ni kunea temanna ae ai aron teuaei, ae te aomata ae e mena i nanona tamnein te Atua?”1
Te reirei ibukiu man te kawai are e buoka iai te Uea Iotebwa bon Arona ni kona ni buokiira n taai aika kangaanga. Ngke e teimatoa Iotebwa ni karaoi rinerine aika eti, te Uea e kakorakora Iotebwa, e anganna te mwaaka n tamnei, ao E kamarau nanoia aomata ake irarikina.
Mote e Noora Iehova, iroun Joseph Brickey
Kataakin Mote
N aron anne, a na ibuobuoki te Uea nakon Mote ni katakina ti tebo ma Ana ibuobuoki nakon Iotebwa. Katakin Mote e moanaki naba ngke te kairake ngaia. E maenako Mote mairouia ana karo. Moan katakina e na kaikawaaki iroun natin Barao te aine. Ibukin kamanoakin te I-Iteraera, e tiringa te I-Aikubita ao e birinako nakon te rereua.
E kaoti te Uea nakon Mote ao e weteia bwa e na kainaomataia natin Iteraera man te tautoronaki i Aikubita. Te mwakuri ae moan te kakawaki anne bon te kataaki ae namakinna Mote ae riaon ana kona. Kataaki ao tuoakin maium a kona n roko ngkana ko anganaki te mwakuri mairoun te Uea ae taraa n rangi ni matoatoa ao ko namakinna bwa ko kainnanoa ana ibuobuoki te Atua.
E moanna te Uea man anganakin Mote te ibuobuoki ae ko na kainnanoia. E tuanga Mote bwa boni Ngaia ae e na kakorakora rinanon te kakatai ae imwaina.
“Ao Ngai ae Bon Ngai, ao … Ko na kangai nakoia tibun Iteraera, E kanakomaiai nako imi AE NGAI.”2 Ma te koaua anne, Mote e karekea te onimaki ao te korakora ibukin kakatai aikana imwaina n ana mwakuri are e anganaki. Tiaki n ae e ti weteia te Uea ma te Uea e na rimoana ni kawai aika kamiimi.
Otan te Aonaba,, iroun Howard Lyon
Katakim
Taai aika a kangaanga aika ko na kaitarai ao Ngai a na rangi n onoti. Aki kona maiu aika uoua n titebo aroia. A katauaki kataaki nakoira n tatabemanira nako iiroun te Tama are i Karawa ao Ana Rikitemanna ae tangiraki, Iesu Kristo. Te kawai ae A kaekai iai ara tataro ibukin te ibuobuoki bon are te kabanea n tamaroa ibukira. Ibukiia tabeman e kona n ae e na kakorakoraira, ao ibukiia tabeman e na kona n anganiira te kimwareirei ngkana ti reitinako ni kekeiaki n te onimaki.
Ibukira ni kabane, te ibuobuoki ae ti kainnanoia riki ngkana ti kataaki, ni kawai raa ao a na maanra, bon te onimaki ae korakora iroun Iesu Kristo. Bon te onimaki anne are e kona iai Iotebwa n rairi taian mii i Aikubita. Bon te onimaki ni koaua iroun Iesu Kristo are e kaunga ao e kakorakora Mote n ana mwakuri ae matoatoa ni buoka te Uea ni kainaomataia Ana aomata.
Ngke ko kairake, ao ko a tia ni kataaki n taai aika a kangaanga n Arou. Ma ko a tia n reireinaki n arou bwa ko na onimakina Iesu Kristo. I ataia ngkai bwa bukin tera I namakina te aeka n nano anne ao riki te kimwareirei ngke I kairake. Tiaki ibukina bwa I kantaningai taai n nakoraoi ke ni bebete riki. Bon ngaia are I namakina te koaua are ngkana N na onimakinna ao ni beku Ibukina, ao bwaai ni kabane a na nakoraoi.
Tinan tamau e tuanga tamau bwa e na anene mangaia iaon kawaia nakon mwengaia mai imwiin are e tuangaki bwa e na waekoa ni mate man aorakina ae te kaentia: “Ao ti riai ni mate imwain mwanangara rinanon, … A raraoi ni bane! A raraoi ni bane!”3 I kaota au koaua nakoimi bwa Iesu Kristo e ataia bwa ti kona ni buokiira n tatabemaniira, ni katakira nako. Ti na ti kainnanoia ni bubutiia ma te onimaki Irouna.
E tangiriko Iesu Kristo ao e na bon buokiko, n taai nako, ao ni kaineti nakon ae te kabanea n tamaroa ibukim. I kakoaua, ma te tangira ibukim, ao Ibukina, n aran Iesu Kristo, amen.