“Ko Kanga n Ongo Irouna?,” Ibukin Kakorakoraia Kairake, Maati. 2022.
Kabanea n Taeka
Ko Kanga n Ongo Irouna?
Te kamataata n te tamnei iroun Oksana Grivina
Ni kairaki ma te kawai ae rau are ti karekea mairoun te Tamnei ae Raoiroi, man te tai teuana ma teuana, e kakoaua te Atua ni mwaakana ao ni bon nakoira n tatabemaniira bwa E kinaira ao e tangiriira. Imwiina, n taai aika ti kaitara iai ma te kangaanga, te Tia Kamaiu e kauringiira iaon taneiai aikai.
Iangoa oin maium. A kona taneiai aikai n roko n taai aika kakawaki ni maiura ke n taai aika a taraa ni kabotu. Taai aika a kakukurei n te maiu n tamnei aikai a roko n taai aika a kakaokoro ao ni kawai aika kakaokoro, ni kaonotaki ibukira n tatabemaniira nako.
Iotebwa Timiti e kabwarabwara bwa n tabetai ti karekei “iango aika a karina” ao n tabetai reken te wanawana ae itiaki.1
Beretitenti Dallin H. Oaks, n ana kaeka nakon te mwaane are e taekinna bwa e tuai man karekea te taneiai ae aron anne, e reirei, “Tao am tataro a kaman tia ni kaekaki ao a okioki man okioki, ma e a bon tia am kantaninga n tiku n taningaa te kanikina ae korakora ke te bwana ae nene n te aro are koa iangoia bwa ko tuai man karekea te kaeka.”2
Ti a tibwa tia n ongo iroun ara Beretitenti Russell M. Nelson ae kangai: “I kaoi ngkami bwa kam na iangoia raoi ao n tainako te titiraki ae kakaawaki aei: Ko kanga n ongo Irouna? I kaoi naba ngkami bwa kam na keerake n ongo raoi Irouna ao ni kamwaitia riki.”3