Te Boto n Iango ao Ngai

Kairake a tibwauaia bwa a kanga ni maiuakin taeka n aia Boto n Iango Ataeinaine ao te Kooram n te Nakoanibonga ae te Aaron

E Kona te Tamnei ni Buokai n Ataa Arou ni Beku

Iroun Alicia Tjahyono

“Ngkai ngai ana reirei Iesu Kristo, I kataia n riki n ai Arona. I ukoukori ao ni mwakuriia oin au kaotioti ao ni buokiia tabeman n Arana ae tabu.”

N tain butanakon te aoraki ae te COVID-19, a mwaiti aomata aika a kerikaaki aia karekemwane ao tabeman a bua aia mwakuri. I tangiria ni kabebetei tabeua rawawataia. N raonaki ma te boutoka mairoun tinau ao tamau, ao ni kabongana oin au mwane, I moanna n anga te amwarake nakoia ake a kainnanoia. I karaoa aio man otanakin amwarake ibukiia tabeman rinanon te bike taxi app. N tabetai I katikui amwarake n taabo ake a katauaki ibukiia naake a kainnano.

I Indonesia a mwaiti turaiwa n te taekiti n te bwatika. Ti kona ni kabonga te app n ara tarebon ni kabaei araia ibukin te ibuobuoki. N tain butinakon te aoraki, e korakora aia kangaanga turaiwa ni karekei taian oota.

N te bong teuana, I ira te wirikiriki mairoun te Tamnei bwa n na buokiia turaiwa. I otan amwarake man te bike taxi app. Ma ngke e roko n te tabo n amwarake n anaa te amwarake, I chat nakoina, n tuangnga ae e a tauraoi te amwarake ibukina. E miimi ao e aki kakoaua ae bon ibukina. Ngke I taekinna ae bon ibukina, e waekoa ni kaitauai ao e tataro ibukiu. E taku bwa e na uota te amwarake nakon mweengana ao e na angan natina. E bwanaa n rangi ni kukurei. I bon namakina naba te kukurei!

E ngae ngke ngai ao kaain au utu a kaitara naba ma tabeua kangaanga, I kakauongo nakon te Tamnei ao n rineia bwa n na mwakuri. Ti bane ni kona n namakina te kimwareirei ao te kukurei, are e buokiira n tokanikai iaon ara kangaanga.

I rang kakaitau ibukin te Tamnei ae Raoiroi. Te taneiai aei e kauringai te kibu man te Nu Tetemanti, Ioane 13:34: “I angani ngkami te tua nabangkai, ba kam na i tangitangiri; n ai arou ngke I tangiringkami, ba kam na i tangitangiri naba.” I ataia ngkana ti ira te Tamnei, ti na karekei kakabwaia aika kamimi mairoun Tamara are i Karawa.

E maeka te tia korokaraki i West Java, Indonesia.