“Inanon Cagayan, Biribin,” Ibukin Kakorakoraia Kairake, Maati 2022.
Ti Kanga n Nebonebo
Inanon Cagayan, Biribin
Tamnei iroun Getty Images
Magandang araw! Kamusta?
(Nanon anne “Te bong ae raoiroi! Ko uara?” n te taetae n Tagalog.)
Arau bon Agravaine L.
I nako man te taun ae uarereke i Cagayan kaawan Biribin. I maeka ma tibutoru te unnaine ao tibutoru te unimwaane, tibu te unimwaane, tibu te unnaine, au maama, ao tariu aika uoman. Eng, e bon rang ni bubura ara utu! Anne te bwai ae riki ikai i Biribin. A kinaki i Biribin ibukin aia reitaki n aia utu ae matoatoa. Anne iteran te bwai ae mamate nanou iai n te maeka ikai. Te tabo ae kabuebue bon ti te boneti!
Bwaai aika a mamate nanou iai bon warekan maekatiin ao te kakauongo nakon te rawebwana ao katangitang aika kakorakora. I tangiria naba ni korei reeta bon nakon, kainbau, ao ara ataei nakon taai aika a na roko!
Te Kamatebwai ao te Tibwatibwa
Te bwai ae mamate nanou iai ngkai I a riki bwa kaain Ana Ekaretia Iesu Kristo ibukiia Aika Itiaki ni Boong aika Kaitira bon atakina ae I a mena inanon Ana Ekaretia Kristo ae koaua. I tangiria n nakon te tembora, tibwaua te euangkerio, ao n nakon te tieminari ma raoraou. I reiakina ae mwaiti man taian taneiai aikai.
Iai n tabetai au kangaanga ma te teimatoa n uaa te toki. Ma I karaoa au kabanea ni kona ni kamatebwai booki aika tabu ni katoa tairiki. Nakomai, Iriirai e buokai n au kamatebwai n ae korakora! I tangiria naba ni wareki karaki man aia maekatiin kairake ake tabeua n te Ekaretia. I kabongana te Gospel Library app bwa e aonga n ae iai rongorongo aika kakorakora inanon au buua, n aki tabe bwa I mena ia.
Angiia raoraou n te reirei bon kaain te Ekaretia. I aki toki n iangoa anne are nanona bwa akea au tai n tibwaua te euangkerio. Ma I reiakinna bwa tibwauaan te euangkerio e aki kainnanoia bwa ko na mena ibuakoia aomata aika kakaokoro aia koaua. I tangiria n tibwaua au koaua ma raoraou n te reirei, ao neienne bon te membwa naba!
Te Tabati
E raroa ara auti ma te tabo ae mena iai ana kateitei te Ekareti, ngaia ae ngai ma mwaneu ti moantaai ni karaoi ara babaire bwa ti aonga n roko n ara bootaki iaon te tai (ke ni moantaai, au kantaninga bwa e na nakoraoi)!
Ti uti n te aoa 4:00 n te moaningabong. ao n nakonako nakon ana auti ai tinau, are bon iaon kawaina nakon ana kateitei te Ekaretia. Ti kaibibiti ara kunnikai n nakonako nakon ara kunnikai aika onoti. Ao imwiina ti a manga nakonako riki inanon 30 te miniti n nakon ana kateitei te Ekaretia (ke 25 te miniti n tabetai ngkana ti nakonako ni kawaekoaira). Bukina bwa ti katauraoira ibukin Tabati ake imwaira, tiaki kona n rimwi! Eng, ti aki kona n rimwi. E bon rangi ni bokaboka te kawai ngkana e bwaka te karau. N te taina ao e rang korakora te karau are I a bae iaon te bokaboka ao I aki kona ni mwaing!
Ma a bane n nakoraoi n te tai are ti roko iai n te taromauri. I namakina te rau ao te kimwareirei n taekina taekan te euangkerio ao n tibwauai rongorongon ara Tia Kamaiu aika raraoi. I tangiria n tibwaua au koaua ni katoa bootakin te aki mamatam ao te kaotikoaua! Au kiraati n te Reirei n Tabati bon taabo naba aika tamaroa n tibwauai au atatai ibukin ana euangkerio Iesu Kristo ao n reirei mairouia naba tabeman.