“Bwanaan Linahei,” Ibukin Kakorakoraia Kairake, Maati 2022.
Bwanaan Linahei
Man te katangitang nakon rongorongon te utu, e kabongana raoi bwanaana Linahei.
Rawetamnei iroun Stephane Sayeb; kamataata n te tamnei iroun Claire Lock
Linahei D. mai Tahiti e ataa aron kabongakin bwanaana ni kakabwaiaia tabeman—ni kawai ae riaon ti teuana. Te katooto, e kamatebwai bwa e na riki bwa temanna te tia ibuobuoki ibukiia ake iai aia kangaanga n aia taetae. “I tangiria ni buokiia ataei ma aia tibering ke n aroia n taetae,” e taku.
Anne ai tibwa moana. E bungiaki inanon te utu aika tarena n te anene, Linahei, 14 ana ririki, e reke irouna taai aika a mwaiti n kabonganaa bwanaana ibukin te anene. “Ngai ma mwaneu ti tatangiria n anene. E taneiai n anene n te bwanaa ae rietata, ao ngai ae rinano!”
Ao ni kabane te utu bon taan katangitang, naba. “Tinau e katanga te biano ni buokira n reireiniira taian kuuna, ao tamau e katanga te kitaa ao te ukirere.” Ao e na riki te utu anne bwa taan katangitang ngkana akea te bwai ni katangitang ae e uarereke ae e ororeaki? “Ngai ma tamau ti tatangiria n katanga te to‘ere, ae bon aron te oro turam ni Borinitia.”
Ma taan ni katangtang aika a boutokaia, a na utu a buokia n ae riaon riki te katangtang. “Au karo a kaungaai n taainako n au kamatebwai, ao tamau e anganai kakabwaia n te nakoanibonga.” Ngkana a roko taai n kanganga, e ataia ae e kona n rairaki nakon Tamana are i Karawa. “I ataia bwa mwaitira tangirau iroun te Atua ao E teimatoa n tei imwaia natina.”
Linahei e aki ti kabongana bwanaana n te katangtang ao te tataro, e taetae naba iaon buokaia utu ake a mena n iteran te rabuna are teuana.
Te Bwana n Tangira Ibukiia Utu Ake ni Iteran te Rabuna are Teuana
“Iai miiu n te tairiki teuana ike I a nooria aomata aika tebubua tabun mwaitiia, ma akea mai buakoia ae kona n marooro,” e taku. “I taku bwa I kinaia, ma I aki koaua raoi.”
Linahei e aki ata ae na karaoia n miina n te moantai. Imwiina e a reke ana iango ae kakukurei: “Imwain te kaokoroaki ibukin te COVID-19, I a tia ni karaoa te bwabetito ae riaon 100 mwaitina ibukia au bakatibu—aomata ake inanon miiu a kona n tei ibukia au utu!”
E namakina riki te ingainga ibukin rongorongon te utu nakon are mai imwaina, Linahei e karaoi ni kabane ake e kona ni buokia ni kamwaingi araia inanon te tembora n karekei otenanti nakoia. E aki maan imwiina, Linahei ao tinana a weteaki bwa taan ibuobuoki iaon rongorongon te utu n aia uoote.
“Ti buoka te aine n ara uoote ni karinna n ana akaunti n te FamilySearch. Ngke e noora ana riki, e bon rang kukurei—ai bon tibwa ana moantai n noriia ni kabane ana bakatibu!”
“I taneiai n namakina te maama n taetae nakoia aomata n au uote,” Linahei e kaotia. “Ma ngkai iai tinau irarikiu, I namakina te aki maama n reireiniia aomata iaon rongorongon te utu.”
Kaota Bwanaam
Ngkai Linahei e rang n ingainga n kan buokia aomata bwa a na reiakina rongorongoia aia bakatibu. “I rangi n kan nonora aron kukureia aomata ngkana a karaoa rongorongon aia utu. Ao I taku bwa ara bakatibu ana kukurei ngkai iai nanora irouia ao ni karaoa aia otenanti.”
Ni weteana bwa te tia ibuobuoki ibukin rongorogon te utu, e a tia n baronga karaoan te waaki aei ibukiia ataeinainen ana uote. E aki ti buokiia n kakaea araia aia utu bwa a na uoti nakon te tembora, ma e buokiia naba ataein te Moanrinan ni karaoi aia akaunti bwa a na kona naba n rin.
“Ti nang nakon te tembora n te tai ae aki maan,” e taku.
Ko tangiria n tamaroa n ai aron Linahei? Tai raraoma, e bon kona n riki. “A kona kaain te roronrikirake ni moantaai n karaoi ana mwakuri te Atua man kabonganaan bwaai n rabakau aika boou,” e taku Linahei. “Bwaai ni kabane ake a buokira n iangoia ara bakatibu e bon rang tamaroa. I ataia bwa karaoan rongorongon ara utu e uota te kukurei ae korakora nakoia ni kabane inanon maiuia. E a tia rongorongon te utu ni uotai ni kaniiai ma au bakatibu ao nakon Kristo n te tai ae ti teuana.”
Ma mwakuri ni kabane ake e karaoi ibukiia ana bakatibu, teuana te bwai ni koaua: ana utu Linahei bon tiaki tii te rongorongo!