“Jilu Wāween ko n̄an Kadikļo̧k Iakwelel ilo Baamļe eo Am̧,” N̄an Kōkajoorļo̧k Jodrikdrik ro, M̧aaj 2022
Mour Jiban̄
Jilu wāween ko n̄an Kadikļo̧k Iakwelel ilo Baamļe eo Am̧
Baam̧le eo am̧ ej ke akweeļ jet iien? Kwoj jab make iaam̧.
Kōmeļeļe jān Alyssa M. Gonzalez
-
“Ejjab jokkin wōt juon! Ej aō iien!”
-
“A, kwar jab kajitōk n̄an kōjerbale men ņe!”
-
“Baba! Anita ej kato lo̧o̧n n̄an n̄a!”
Eļan̄n̄e jet iaan uwaak kein kwoj kemejmeji, kwoj maron̄ mōttan juon baam̧le. Im ejjeļo̧k baam̧le ejjab ioon lokjak ko. Elder David A. Bednar jān Doulul eo an Jon̄oulruo Rijilōk ro juon kattōn ear kwalok ke ajiri ro nejin raar inebata, “Mam̧a, kwon lale lene!”1
Āindein wōt kar baj wōt bwe jum̧ae en delon̄e juon baam̧le. Ilo m̧ool, jet armej rej jerbal eļapļo̧k n̄an kōm̧m̧an bwe en walok menin. Rilo̧mo̧o̧r eaar katakin ilo kalikare,“Eo ewōr jetōb in jum̧ae ilo e ejjab jān Eō, ak ej jān devil, eo ej jemān jum̧ae, im ej pukwōj būruōn armej n̄an aitwerōk kōn illu, ippān doon” (3 Nipai 11:29).
Jab Mijak! Naan eo ej katakin kōj bwe ewōr men ko jemaron̄ kōm̧m̧ani n̄an kadikļo̧k jum̧ae ilo baam̧le ko ad—im bōk elapļo̧k lem̧ōņōņō!
Wāween 1: Joļo̧k Kaan eo
Kijeek ko rej aikuj kaan n̄an kattūl. Ejjeļo̧k oktak jān Iakweleel. Im ejjeļo̧k men en eļapļo̧k an ankaane jum̧ae āinwōt akweel. Kiiō, ta eo komaron̄ kōm̧m̧ane eļan̄n̄e juon ej jino akweeļ ibbam̧?
Ekwe, komaron̄ jab kālet n̄an akweeļ ippān. Rilo̧mo̧o̧r ej waanjon̄ak eo ad eweppān ilo men in. Ilo aolepān iien jerbal eo An kar kōjdate, nana aer kōm̧m̧an n̄ane, jum̧aeiki, im eļaptata dōbāāle. Kiiō, jekdoon n̄e uwaak ko an rekajoor im kajju, E eaar jab wōr jetōb in jum̧ae ippān. Im ilo jem̧lo̧kin E ear jab bar ukōtļo̧k ilo an ire, jekdoon n̄e emaron̄ kar kūr laļtak “elōn̄ļo̧k jān jon̄oul im ruo lijiōn enjel” n̄an An jipan̄ (Matu 26:53). Ijjelo̧kin, E ear jar kōn rikōjdat ro an, jekdoon ilo iien eo ekar etoto ioon dōbāāl (lale Luke 23:34).
Eļļo̧k jān akweeļ ekōm̧m̧an bwe kwon erom̧ juon eo em̧m̧anļo̧k an ron̄jake. Im n̄e ej em̧m̧anļo̧k ad ron̄jake, emaron̄ em̧m̧anlok ad kenono ipen doon im erom rikōm̧m̧an ainem̧m̧an. Eļļo̧k jān akweeļ ekoba barāinwōt uwaak kōn juon ainikien elur im kōm̧m̧an ta eo jemaron̄e n̄an depij en̄jaake ko ad ilo jelā.
Ijjelo̧kin kaan n̄an kakobaba, enan̄in aolep akweeļ ko im jum̧ae rej jakoļo̧k. Āinwōt an jeje ko rekwojarjar katakin “naan in uwaak e jouj, ej kajeorḷọk illu (Jabōn Kōnnaan Ko 15:1).
Wāween 2: Kwaļo̧k Iakwe
Kwaļo̧k iakwe n̄an membōr in baam̧le eo am̧ ej juon iaan men ko rem̧m̧an n̄an bōbrae menin lokjak ko jen m̧weo. Kōm̧m̧ane men in emaron̄ bar kabōjrak jum̧ae jān an waļo̧k ilo jinion!
Kiiō jekdoon n̄e jum̧ae ej kōm̧m̧an anjo̧ n̄an dibuk katōrak ko ad, iakwe im meanwōd remaron̄ kōro̧o̧l men otemjej.
Katak kin bwebwenato eo ilo Baibōļ kōn kōrā eo ekar kakkure kien erreo. Ekkar n̄an kien ko an Moses, kōrā eo rej aikuj kar kade. Armej ro raar illu raar im kōnaan bwe Jisōs en kajeiki kōrā eo.
Bōtaab ta eo Rilo̧mo̧o̧r ear uwaak im ba? M̧oktata, E ear jab uwaake kajitōk eo aer iien eo em̧ōkajtata. E ear bukelōlō im jeje ioon bwidej ilo jidik iien m̧okta jān an kōnono. (Jiban̄: jet iien eļap an em̧m̧an n̄an jab m̧ōkaj in uwaak n̄e en̄jaake ko ad remootļo̧k ilōn̄.)
Ālikin E ear kwaļo̧k an iakwe im ettā n̄an kōrā eo ilo iien eo E ej kenono n̄an jarlepju in armej ro, “Eo iami ejjeļo̧k an jerawiwi, en kade m̧okta kōn juon dekā.” (Jon 8:7).
Jisōs eaar lale kōrā eo ilo iakwe, ejjab n̄an leļo̧k kaje. Eaar kwaļo̧k An maron̄ jeerļo̧k an bōd ilo An kūr kōrā eo n̄an, “ilo̧k, im jab bar jero̧wiwi” (Jon 8:11).
Jiron̄ļo̧k baam̧le eo am̧ bwe kwoj iakwe er. Kwaļo̧k ke iakwe ej jeerļo̧k bōd im kōtļo̧k er n̄an oktak—jekdoon n̄e rej illu ippam̧. Iakwe emaron̄ ukōt menotemjej.
Wāween 3: Jar
Jar ej bōktok kōjeram̧m̧an ko an Anij n̄an mour ko ad. Ilo Bok in Mormon, Amulek ej katakin, “Kwōj aikuj lutōkleplepļo̧k am̧ ilo ijoko jikūm̧ rettino, im jikin ņojak ko am̧, im ilo am̧ āne jem̧aden.
“Aaet, … būruōmi ren obrak, jab jokwōd jān jar n̄an E iien otemjeļo̧k n̄an oņaake eo ami, im barāinwōt n̄an oņaake an ro rej pād ipeļaakimi” (Alma 34:26–27).“
Em̧o̧o̧l “ro rej bed ibelakūm̧” koba baam̧le eo am̧—jekdo̧o̧n ro rejjab jokwe ippam̧ kiiō. Kōn menin, jar ippān baam̧le eo am̧. Jar kōn baam̧le eo am̧. Jar bwe kwon maron̄ kōmaanwa ilo inem̧m̧an eļan̄n̄e ewōr juon ej kainebataik eok. Jar bwe kwon jelā wāween uwaaki men ko reppen ko rej walōn̄tak ilo baam̧le eo am̧. Jar kōn jipan̄ an Anij. Jar kin eļapļo̧k lem̧ōņōņō im iakwe n̄an deļo̧n̄e im̧weo im̧ōm̧. Innem kōm̧m̧ane aolep men ko kwoj maron̄ kōm̧m̧ani bwe men eo en waļo̧k.
Ilo am̧ kōļapļo̧k am̧ kate eok mour kōn gospel eo an Jisōs, kwonaaj loe ke baam̧le eo am̧ enaaj barāinwōt bōk kōjeram̧m̧an. Iakwelel enaaj dikļo̧k, im kwonaaj loe m̧ōņōņō eļaplo̧k.