Unin Tōl eo im N̄a

Jodikdik ro rej kwaļo̧k ekōjkan aer mour kōn naan ko an Unin Tōl ko an Doulul eo an Jiron̄ ro im Doulul eo an Priesthood eo an Aron

Jetōb eo Emaron̄ Jipan̄ Eō Jeļā Ewi Wāween Jerbal

Jān Alicia Tjahyono

“Āinwōt juon rikaļoor an Jisōs Kraist, Ij kajjieon̄ n̄an erom̧ āinwōt E. Ij kappukot im jerbale kean̄ ko im kwaļo̧k n̄an ro jet ilo āt eo ekwojarjar Etan.”

Ilo iien ajeded in COVID-19, elōn̄ armej ekar dik wōņeer ak kōļļā ko aer ak luuji jerbal ko aer. Ikar kōņaan kapidodoikļo̧k jidik eddo eo aer. Kōn jipan̄ eo jān jinō im jema, im kōjerbal jāān ko aō make, ikar jino elleļo̧k m̧ōn̄ā ko n̄an ro rej pād ilo aikuj. Ikōn kōm̧m̧ane menin ilo aō wōrtar m̧ōn̄ā n̄an ro jet jān juon wōtbai tākji app. Jet iien ij bōkļo̧k m̧ōn̄ā ko n̄an jikin ko kar kōjenolo̧k n̄an ro me rej apan̄.

Ilo Indonesia elōn̄ rikattōr motorbike tākji ro. Kōmij kōjerbal juon app ilo taļboon ko am n̄an jikejuuļ im kōļļāik wōrtar ko aer. Ilo iien ajeded in nan̄inmej eo, rikattōr ro rekar jelm̧ae juon iien eped n̄an kōm̧m̧ani im bōk wōrtar ko aer.

Juon raan, ikar ļoor juon im̧we jān Jetōb Kwojarjar eo n̄an jipan̄ juon rikattōr ijaje kajjien. Ikar wōrtar m̧ōn̄ā ko jān wōtbai tākji app eo. Bōtaab ke ekar tōparļo̧k reejtōren eo n̄an būki m̧ōn̄ā ko, ikar jilkinļo̧k n̄an e juon ennaan, jiron̄ļo̧k e bwe m̧ōn̄ā eo ikar wōrtōr n̄an e. Ekar ilbōk im kar jab tōmak ke kijen m̧ōn̄ā eo. Ke ikar ba n̄ane e ke kijen m̧ōn̄ā eo, ekar kajju kam̧m̧olool eō im ekar jar kōn eō. Ekar ba enaaj kar bōk m̧ōn̄ā eo n̄an m̧weo im̧ōn im leļo̧k n̄an ajri eo nejin. Ekar lukkuun in m̧ōņōņō. Menin ekar kōm̧m̧an aō lukkuun en̄jake m̧ōņōņō barāinwōt!

Jekdo̧o̧n men̄e baam̧le eo aō im n̄a kar barāinwōt jelm̧ae jet apan̄ ko, ikar ron̄jake Jetōb eo im kar kāālet n̄an jerbal. Kōm kar maron̄ in en̄jake lan̄lōn̄ im lem̧ōņōņō, eo ekar jipan̄ kōm anjo̧ ioon apan̄ ko am.

Ij lukkuun in kam̧m̧oolol kōn Jetōb Kwojarjar. En̄jake in ej kakeememej eō kōn juon eoon jān Kallim̧ur Ekāāl, Jon 13:34: “Kien ekāāl Ij lewōj n̄an koṃ, koṃwin yokwe doon; āinwōt Iar yokwe koṃ, koṃwin barāinwōt yokwe doon.” Ijeļā ilo ad ļoor Jetōb eo, jenaaj bōk kōjeraam̧m̧an ko rekabwilōn̄lōn̄ jān Jemedwōj Ilan̄.

Rijeje eo ej jokwe ilo West Java, Indonesia.