“Wāween Jelm̧ae Jilu Jekjek in Mālijjon̄ ko,” N̄an Kōkajoorļo̧k Jodrikdrik ro, Mar. 2022.
Itok Ļoor Eō
Wāween Jelm̧ae Jilu Jekjek in Mālijjon̄ ko
Mour elōn̄ apan̄ ko roktak, bōtaab oktakļo̧k n̄an Anij ej uuwaak eo aolep iien.
Meļeļe ko jān Simini Blocker
Kōn ebanban, ļōm̧aro jein Josep rekar wia kake e n̄an kōm̧akoko innām kar jiron̄ jemeer ke em̧ōj kar m̧ane jān mennin mour awia ko.
Josep in Ijipt eo maron̄ kar kajjitōk elōn̄ kajjitōk ko kōn wāween eo mour eo an ekar mejaļļo̧k. Kom̧ naaj ekkatak kōn mour eo an ilo allōn̄ in, bōtaab en̄in ej jom̧ōkaj in ta eo ekar waļo̧k n̄an e:
-
Ļōm̧aro jein raar wia kake e n̄an kōm̧akoko.
-
Āinwōt juon rikōm̧akoko, kar bōd aer ņā ruōn kōn an kajjieon̄ in mej jekkare lio ippān irooj eo an.
-
Innām ekar erom̧ rikalbuuj ium̧win ruo iiō ko raittok.
Pijaiklo̧k ta eo kwomaron̄ kar en̄jake eļan̄n̄e kwar Josep. Ilo jekjek eo edik tata, kwomaron̄ kar po n̄an kajjitōk: “Etke n̄a?” “Ta eo ikar kōm̧m̧ane bwe in bōk menin?”
Men̄e ekar jab kōm̧m̧ane juon jorrāān, kar jilkinļo̧k Josep n̄an kalbuuj ium̧win ruo iiō ko raittok.
Jilu Jekjek in Mālijjon̄ ko
Elder Neal A. Maxwell (1926–2004) jān Doulul eo an Jon̄oulruo Rijilōk ro ekar juon iien katakin kōn jilu jekjek in mālijjon̄ ko roktak jemaron̄ jelm̧ae ilo mour in:
-
Jekjek 1: Mālijjon̄ ko me rej itok jān jerawiwi ko ak bōd ko ad make.
-
Jekjek 2: Mālijjon̄ ko me rej waļo̧k kōnke en̄in ej juon laļ ejab wānōk, eobrak kōn nan̄inmej, kij, im armej jab wānōk.
-
Jekjek 3: Mālijjon̄ ko me Anij ej kōņaan bwe jen en̄jaki kōnke E ekōņaan bwe jen eddōkļo̧k.
Ilo ioļapļap in juon mālijjon̄, jemaron̄ po n̄an kajjitōk, “Etke n̄a?” Bōtaab kajjitōk jab eo emaron̄ jab lukkuun in jipan̄ āinwōt ad kōtmene. Elder Maxwell ekar je bwe jekdo̧o̧n ta ewōr ippād māllijon̄, “tōprak eo ealikkar bwe ejjeļo̧k oktak ilo jekjek eo; Anij ej kōņaan bwe jen dibuk apan̄ jab eo. Aaet E ej kallim̧uri kōj bwe An jouj ebwe n̄an kōj.”1 Ilo bar juon wāween ba, Jemedwōj Ilan̄ ejjab kōtļo̧k bwe jen dibuk mālijjon̄ ko ilo An jab letok n̄an kōj jipan̄ eo jej aikuji kōn Pinmuur eo an Jisōs Kraist.
Waanjon̄ak eo an Josep
Jen mōk bar lale mālijjon̄ eo eļap kein kajuon an Josep: Ļōm̧aro jein raar wia kake n̄an kōm̧akoko.
Menin ekar ke juon “Jekjek 1” mālijjon̄? Josep ekar ke bōktok menin n̄an ioon make? Ekwe, jaab. E ekar kwaļo̧k jejjo iaan ettōņak in kanaan ko an ikkijien ļōm̧aro jein Ettōņak ko raar kwaļo̧k bwe e enaaj kar erom ritōl eo aer juon raan. Aaet, ļōm̧aro jein raar jab kōņaan ron̄jake men jab eo. Ilo m̧ool, “eļapļo̧k wōt aer kōjdate kōn etōņak ko an im naan ko an.” (Jenesis 37:8).
Eļan̄n̄e kwar pād ilo wāween eo an Josep, kwomaron̄ pijaikļo̧k eok make am̧ ļōmņak, “Eļan̄n̄e ikar jab jiron̄ļo̧k er kōn ettōņak ko aō!”
Ak ekar ke ijello̧kin an juon “Jekjek 2” mālijjon̄? Mālijjon̄ eo an Josep ekar ke itok jān juon laļ eo ejab wānōk, eo ekoba armej ro jet rej kōjerbal anemkwoj in kāālet eo aer ilo jab jetjet? Bōlen. Bar juon alen, enaaj kar pidodoļo̧k n̄an Josep n̄an an kōjōboulul bōran im ļōmņak kōn ekōjkan an aolepān jorrāān ko an raar bōd an ļōm̧aro jein. Ak ekōjkan an lio pāleen Potibar kar riab. Ak jekdo̧o̧n butler eo me kōn ium̧win ruo iiō ko kar meļo̧klo̧k in jiron̄ Pero kōn Josep, jekdo̧o̧n ālkin an kar kallim̧ur enaaj kar (lale Jenesis 40:23).
Ak men kein aolep raar ke “Jekjek 3” mālijjon̄ eo āliktata? Ilo bar juon wāween ba, Anij ekar ke kōtļo̧k bwe men kein Josep en en̄jaki n̄an jipan̄ e eddōkļo̧k? Ilo kajjitōk in, Josep make ekar en̄jake uwaak eo me ekar jidikin aaet. Āliktata ke ekar ioon ļōm̧aro jein bar juon alen, ekar ba, “Innām kiiō koṃwin jab būroṃōj, im jab āliklik, kōn ami kar wiakake eō n̄an ijin: bwe Anij ear jilkintok eō iṃaami bwe in kōjparok mour” (Jenesis 45:5, kōmejaja kar kobaiktok).
Kiiō, keememej, Josep kar wia kake n̄an kōm̧akoko ke ekar 17 iiō dettan. Ekar 30 an iiō ke ekar jutak im̧aan Pero n̄an ukōt ettōņak ko me āliktata enaaj kar kanemkwoj e. Ekōm̧m̧an bwe en 13 iiō ko, ak enan̄in jimettan in mour eo an m̧ae tōre in, ijo Josep ekar luuji anemkwoj eo an kōn ejjeļo̧k ruwōn make. Bōtaab ekar wōr an tōmak bwe “Anij ekar jilkintok [e]” n̄an kōjparok mour. Jekdo̧o̧n ia eo mālijjon̄ eo ekar itok jāne, Josep āliktata ekar jeļā bwe Anij ekar wōr juon an kōttōpar.
Men eo ekar bwe n̄an e. Menin emaron̄ bwe n̄an kōj.
Josep ekar jeorļo̧k an ļōm̧aro jein bōd im em̧ool kar kōjparok mour ko aer ilo n̄ūta eo. Josep ekar jeļā bwe Anij ekar tōl im kōjparok mour eo an.
Mālijjon̄ ko Ami
Jemaron̄ joļo̧k eļap maron̄ pedped ioon etto. Jemaron̄ ļōmņak, “Etke ikar kōm̧m̧ane men eo?” ak “Eļan̄n̄e wōt lieņ ak ļeeņ kar jab m̧oņe eō.”
Bōtaab pedped ioon ta-eļan̄n̄e im jamin kōm̧m̧an jabdewōt men ko rem̧m̧an ijjeļo̧k metak kōn etke im wāween an juon māllijon̄ itok n̄an eo am̧. Ilo jem̧ļo̧kin, aenōm̧m̧an im kōkajoor jej en̄jaki ilo ad itok n̄an Kraist im lōke ilo E, āinwōt an Josep in Ijipt kar en̄jake. Eļan̄n̄e jej kōm̧m̧ane menin, aolep mālijjon̄ ko ad remaron̄ erom̧ kain mālijjon̄ ko me rej jipan̄ kōj eddōk im epakaeļo̧k Anij im erom̧ āinwōt E.
Būreejtōn Henry B. Eyring jān Būreejtōnji eo Kein Kajuon ekar katakin, “Kwomaron̄ bwūlōn̄ etke juon Anij eo eļap iakwe ippān im ewōr ippān aolep kajoor ej kōtļo̧k bwe jen bōk mour in idajon̄jon̄ eo me epen. Ej kōnke E ejeļā bwe jej aikuj eddōkļo̧k ilo erreo ilo jetōb im emourur ilo ānbwin bwe jen maron̄ mour ilo aelōn̄ eo An ippān baam̧le ko ad indeeo.”2
Jinōkjeej ko Indeeo
Eļan̄n̄e jaar jerawiwi, jej aikuj ukweļo̧k. Eļan̄n̄e juon mālijjon̄ ej pād ilo kōttōpar ko ad n̄an em̧m̧anļo̧k, jemaron̄ im jej aikuj kōm̧m̧ane menin. Bōtaab elōn̄ wōt iaan kapan̄pan̄ ko jej jelm̧ai ilo mour in ekkā an aitok aer pād jān ad kōņaan—jet iien to̧o̧ņ wōt ad mour. En̄ eo, barāinwōt, uwaak eo ej n̄an oktakļo̧k n̄an Anij.
Mour in ej meļeļe n̄an kōkajoorļo̧k im idajon̄jon̄ n̄an kōj. Im Anij enaaj etetal ippād eļan̄n̄e jej pukōt E! Elder Dale G. Renlund jān Doulul eo an Jon̄oulruo Rijilōk ro ekar katakin, “Am̧ tōmak ilo Jemedwōj Ilan̄ im Jisōs Kraist enaaj jinōkjeej eļapļo̧k jān am̧ maron̄ pijaiki. Aolep kalijōkļo̧k—eļaptata kalijōkļo̧k ko relukkuun in uwaan kakitōtō—naaj kwojarjari n̄an ļapļo̧k eo am̧.”3
Ekar ke “jetjet” bwe Josep en kar dibuk ta eo ekar dibuki? Jaab. Bōtaab kōnke ekar dibuk ta eo ekar dibuki, ekar maron̄ in kōjparok mour ko an laļ ko, ekoba baam̧le eo an make.
Kwomaron̄ in pād ilo ioļapļap in mālijjon̄ ko am̧ make āinwōt kar Josep. Kwomaron̄ in jab lo jibadbad eo. Ak jemļo̧k eo.
Baj keememej wōt, jouj eo an Anij ebwe. Oktakļo̧k n̄an E, im E enaaj jerbali kabwilōn̄lōn̄ ko ilo mour ko ami.