“Anij Emaron̄ Jipan̄ Kōj ilo Iien ko Reppen,” N̄an Kōkajoorļo̧k Jodrikdrik ro, M̧aj. 2022.
Anij Emaron̄ Jipan̄ Kōj ilo IIen ko Reppen
Jisōs Kraist ejeļā ekōjkan jipan̄ kōj kajjojo, jekdo̧o̧n ta mālijjon̄ ko ad.
Rilo̧mo̧o̧r eo ekar Etetal ioon Dān, jān Walter Rane
Ij keememej ta eo ekar āinwōt ke ikar juon rūm̧m̧an ded, mour ilo ta eo ekar āinwōt iien ko reppen. Ekar wōr juon pata an laļ in eļapļo̧k an kijon̄. Likao ro rerūttoļo̧k jidik jān eō rekar mej ilo iien tariņae. Ekar wōr ire an kumi ko ilo bukōn ko repaak ijo jikū. Economic depression eo an aolepān laļ in ekar jan̄in de jem̧ļo̧k, im elōn̄ armej ro raar jeram̧ōl. Baam̧le eo aō im n̄a kar Armej ro Rekwojarjar ilo Raan Ko Āliktata de ro ilo bukōn eo ijo kōm kar jokwe ie.
Aaet, ikar m̧ōņōņō im lo̧udin̄din̄. Kar katakin eō, āinwōt bar kom̧, bwe mālijjon̄ ko ad rej juon kōjeraam̧m̧an ilju im jekļaj eļan̄n̄e jej oktakļo̧k n̄an Jemedwōj Ilan̄ im Rilo̧mo̧o̧r eo kōn jipan̄.
Etke Mālijjon̄ ko?
Mālijjon̄ ko rej letok n̄an kōj iien eo em̧m̧an aorōk n̄an kāālet n̄an kōjerbal tōmak. Jemaron̄ kajjitōk ilo jar kōn jipan̄ jān Jisōs Kraist, eo ejeļā ekōjkan jipan̄ kōj. E ekar en̄jake aolep mālijjon̄ ko jejjāmin naaj jelm̧ai. E ejeļā ilo weppān ekōjkan jipan̄ aolep kajjojo iaad. Im E ej iakwe kōj.
Jibadbad eo an apan̄ ko ilo mour in ej n̄an lo ta eo jenaaj kāālet n̄an kōm̧m̧ane. Jenaaj ke kōjerbal tōmak eo n̄an kōjparok kien ko E ekar litok n̄an kōj ilo jekdo̧o̧n ta mālijjon̄ ko jej jelm̧ai? Juon Anij in iakwe ej aolep iien kōm̧m̧ane ta eo em̧m̧an tata n̄an kōj. E emaron̄ kōm̧akūt ak kadikļo̧k idajon̄jon̄ eo ad eļan̄n̄e menin enaaj kōkajoorļo̧k tōmak eo ad. Iien ko jet, E emaron̄ jab.
Ilo ami kar ekkatak m̧oktaļo̧k kōn mour ko an rikanaan ro ilo Kallim̧ur M̧okta kom̧ kar lo wāween eo Irooj ej jipan̄ kōn bun̄tōn n̄an bun̄tōn n̄an anjo̧ jān mālijjon̄ ko reppen. N̄an waanjon̄ak, wāween an Irooj jipan̄ Josep im Moses ekar katakin eō ekōjkan kajjitōk im bōk jipan̄ ilo iien ko reppen.
Mālijjon̄ ko an Josep
Josep, ļeo nejin Jekob ejitōnbōro, kar joļo̧k n̄an lowaan juon ro̧n̄ jān ļōm̧aro jein innām wia kake n̄an kōm̧akoko ilo Ijipt. Kar jiron̄ļo̧k jemen jān ļōm̧aro jein bwe em̧ōj kar m̧ane. Ke Josep ekar juon rijerbal rikōm̧akoko, Irooj ekar leļo̧k n̄an e kajoor n̄an ukōt ettōņak ko an Pero. E ekar kwaļo̧k n̄an Josep ekōjkan an Ijipt naaj maron̄ ņa mejļan juon n̄ūta ilju im jekļaj. E ekar leļo̧k n̄an Josep kajoor jim̧we eo n̄an jum̧ae kapo, n̄an an kar rōļo̧k jān kalbuuj, im ilo 32 iiō dettan n̄an an walōn̄ļo̧k n̄an opij eo eutiej jān Pero. Pero ekar ba kōn Josep, “Je maron̄ ke lo āinwōt ḷein, juon eṃṃaan im jetōb in Anij ippān?”1
Juon katak n̄an n̄a jān wāween eo Irooj ekar jipan̄ Josep ej ekōjkan An maron̄ jipan̄ kōj ilo iien ko reppen. Ke Josep ekar kōm̧m̧ani kāālet ko rejim̧we wōt, Irooj ekar kōkajoorļo̧k Josep, kar leļo̧k n̄an e kajoor ko ilo jetōb, im kar kōmeraikļo̧k bōro ko būruōn armej ro ipeļakin.
Moses Seeing Jehovah [Moses ej Lo Jeova], jān Joseph Brickey
Mālijjon̄ ko an Moses
Ejja āinwōt, jipan̄ eo an Irooj n̄an Moses ilo mālijjon̄ ko an ekar ainlo̧k wōt n̄an jipan̄ eo An n̄an Josep. Mālijjon̄ ko an Moses rej barāinwōt ijjino ilo iien an jodikdik. Moses ekar jepeļļo̧k jān ro jinen im jemen. Idajon̄jon̄ eo an im̧aan tata ekar n̄an kōkkajiririk jān lio nejin Pero. Ilo bōbrae im jojomar eo an RiIsrael, ekar m̧an juon RiIjipt im aikuj in kar ko n̄an āne jem̧aden.
Irooj ekar waļok n̄an Moses im kar kūr e n̄an kadiwōjļo̧k ro nejin Israel jān kōm̧akoko ilo Ijipt. Menin ekar āinwōt juon jerbal epen ekar juon idajon̄jon̄ me Moses ekar en̄jake eļapļo̧k jān e. Mālijjon̄ eo im idajon̄jon̄ ko reppen tata an mour eo am̧ remaron̄ itok n̄e lewaj juon jerbal jān Irooj me āinwōt elukkuun in pen im kwoj en̄jake bwe kwoj aikuji jipan̄ eo an Anij.
Irooj ekar jinoe ilo an leļo̧k n̄an Moses jipan̄ eo kwonaaj aikuji. E ekar jiron̄ Moses ke kar E eo me enaaj kar kōkajoorļo̧k e ilo idajon̄jon̄ ko repād im̧aan.
“N̄a Eo N̄a E: im … āindein aṃ naaj ba n̄an ro nejin Israel, N̄A E, eo ear jilkinwōj eō n̄an koṃ.”2 Kōn kallim̧ur jab in, Moses ekar bōk tōmak eo im kajoor eo n̄an kōro̧ro in idajon̄jon̄ ko im̧aan ilo jerbal eo an me kar kappeik. Irooj ekar jab kūr wōt e ak Irooj enaaj kar ilo̧k im̧aan mejān ilo wāween ko raar āinwōt kabwilōn̄lōn̄.
Light of the World [Meram an Laļ], jān Walter Rane
Mālijijon̄ ko Am̧
Iien ko reppen kwe im n̄a jej jelm̧ae naaj jej uwaer. Ejjeļo̧k ruo mour ko rej lukkuun in eier wōt juon. Mālijjon̄ ko rej jetjet n̄an kōjwōj kajjojo jān juon Jemedwōj Ilan̄ eo ej iakwe im Nejin Jitōnbōro, Jisōs Kraist. Ilo wāween eo me rej uwaaki jar ko ad kōn jipan̄ renaaj ilo jabdewōt jekjek em̧m̧an tata n̄an kōj. N̄an jet emaron̄ in n̄an kōkajoorļo̧k kōj, im n̄an ro jet maron̄ letok n̄an kōj lan̄lōn̄ ilo ad kakkōt ilo tōmak.
N̄an aolepād wōj, jipan̄ eo jej aikuji eļap tata ilo ad idajon̄jon̄, ilo jabdewōt wāween im kōn jekdo̧o̧n ewi aitokan, ej juon tōmak eobrak kōn kajoor ilo Jisōs Kraist. Ekar tōmak jab eo in me ekar kōtļo̧k bwe Josep en ukōt ettōņak ko ilo Ijipt. Ekar juon tōmak em̧ool ilo Jisōs Kraist me ekar kōberan im kōkajoorļo̧k Moses ilo ijjitōn̄ eo an epen n̄an jipan̄ Irooj kōjo̧o̧r armej ro An.
Ilo iien jodikdik eo ami, em̧ōj kadede ami kar idajon̄jon̄ kōn iien ko reppen, āinwōt kar n̄a. Ak āinwōt n̄a, em̧ōj katakin kom̧ n̄an lōke ilo Jisōs Kraist. Ij kile kiiō etke ikar en̄jake juon lo̧udin̄din̄ ejej uwaan im em̧ool lan̄lōn̄ ke ikar dik. Ekar jab bwe ikar kōtmene iien ko n̄an em̧m̧anļo̧k ak pidodoļo̧k. Ekar bwe ikar en̄jake lōke bwe eļan̄n̄e inaaj kar lōke im jerbal n̄an E, aolep men renaaj kar ilo juon jekjek naaj em̧m̧an.
Būbū ekar kajjitōk ippān jema n̄an al ippān ilo iaļ eo an ļo̧k n̄an m̧weo jān iien eo ekar jiron̄e ejjab to liin ekar mej jān kānjōr: “Elan̄e jenaaj mij mokta eindein, … Aolep men naaj emman! Aolep men naaj emman!”3 Ij kwaļo̧k aō kam̧ool bwe Jisōs Kraist eo ekar jerkakpeje ejeļā ekōjkan jipan̄ kajjojo iaad, jekdo̧o̧n ta mālijjon̄ ko ad. Jej aikuj in wōt kajjitōk kōn tōmak ilo E.
Jisōs Kraist ej iakwe eok im naaj jipan̄ eok, ilo aolep iien, im ekkar n̄an ta eo ej em̧m̧an tata n̄an kwe. Āindein in kam̧ool, kōn iakwe n̄an kom̧, im n̄an E, ilo etan Jisōs Kraist, amen.