“O Motugaafa e Tolu mo le Faaitiitia o Finauga i Lou Aiga,” Mo le Malosi o le Autalavou, Mati 2022.
Fesoasoani o le Olaga
O Motugaafa e Tolu mo le Faaitiitia o Finauga i Lou Aiga
E fefinauai lou aiga i nisi taimi? E le o tuua na o oe.
Ata na tusia e Alyssa M. Gonzalez
-
“E lē fea! O lo’u taimi lenei!”
-
“Ei, e te lei fai mai e nonō atu lena mea!”
-
“Tamā! O loo faaeto mai le laulaufaiva o Anita ia te au!”
Afai e i ai se tasi o na manatu faaalia e masani ona e faalogo i ai, atonu o oe lava o se vaega o se aiga. Ma e leai se aiga e sao mai i feteenaiga. Sa faasoa mai e Elder David A. Bednar o le Korama a Aposetolo e Toasefululua i se tasi taimi e faapea, sa faitio lana fanau, “Tina, o loo manava e ia lo‘u ea!”1
O se mea masani mo finauga le ulufale atu i se aiga. O le mea moni, e sili atu ona galue malosi se tagata ina ia tupu lena mea. Na aoao manino mai le Faaola, “Aua e moni, e moni ou te fai atu ia te outou, o le e i ai le agaga o le finauga ua le mai ia te au o ia, ae ua mai le tiapolo ia, o le o le tama o le finauga, ma ua faaoso e ia loto o tagata ia fefinauai ma le ita, o le tasi i le isi” (3 Nifae 11:29).
Ae aua le fefe! Ua aoao mai i tatou e le talalelei e tele mea e mafai ona tatou faia e faaitiitia ai finauga i o tatou aiga—ma maua ai le tele o le olioli!
Motugaafa 1: Aveese le Suauu
E manaomia e le afi le suauu e ola ai. E tutusa lelei ma le fefinauai. Ma e leai se mea e faatupuina ai se finauga e pei o nisi finauga. O lea la, o le a se mea e mafai ona e faia pe afai e amata ona finau mai se tasi ia te oe?
Ia, e mafai lava ona e musu e finau atu. O le Faaola o lo tatou faataitaiga sili i lea vaega. I Lana galuega atoa sa inosia ai o Ia, sa le lelei le taulimaina, faalataina, ma iu ai ina faasatauroina. Ae, e ui lava ina sa malosi ma tuusao ana tali, sa lei ia te Ia lava se agaga o finauga. Ma i le iuga e lei tali atu o Ia, e tusa lava pe na mafai ona ia aioi e auina mai “o agelu e sili ona toatele i lekeona e sefulu ma le lua” e fesoasoani ia te Ia (Mataio 26:53). Nai lo lena, sa Ia tatalo mo Ona fili, e oo lava ina ua tautau o Ia i luga o le satauro (tagai Luka 23:34).
O le musu e finau atu e mafai ona avea ai oe ma se tagata e lelei atu le faalogo. Ma pe a tatou faalogo lelei, e mafai ona tatou fesootai lelei atu ma avea ma se e faatupuina le filemu. O le musu e finau atu e aofia ai foi le tali atu ma se leo toafimalie ma le faia o mea tatou te mafaia e taofiofi ai o tatou lagona.
A aunoa ma le suauu e faaopoopo atu iai, o le tele o le finauvale ma finauga o le a faaitiitia. E pei ona aoao mai le mau, “O le tali filemu e liliueseina ai le ita” (Faataoto 15:1).
Motugaafa 2: Faaali atu le Alofa
O le faaalia o le alofa i tagata o lou aiga o se tasi lea o auala sili e taofia ai feteenaiga i le aiga. O le faia o lena mea e mafai ai foi ona taofia ai le aliae mai o finauga!
Ae e tusa lava pe o finauga e mafai ona oo mai e aunoa ma lo tatou iloa, o le alofa ma le agalelei e mafai lava ona suia ai mea.
Mafaufau i le tala o le Tusi Paia e uiga i le fafine na molia i le mulilua. E tusa ai ma le tulafono a Mose, sa tatau ona fetogi o ia i maa. Sa mananao le motu o tagata na feita iai ina ia tausalaina o ia e Iesu.
Ae o le a le tali a le Faaola? O le mea muamua lava, sa lei vave tali atu o Ia i o latou manaoga. Sa Ia tootuli ma tusi i le eleele mo sina taimi a o lei fetalai atu. (Faaiteite: o nisi taimi e sili atu le le tali vave atu ao tigā lagona.)
Ona Ia faaalia lea o le alofa ma le agaalofa mo le fafine ina ua Ia fetalai atu i le motu o tagata, “O so outou e leai sana agasala, ia lua’i togi se maa ia te ia” (Ioane 8:7).
Sa taulimaina e Iesu le fafine i le alofa, ae le o le tausalaga. Sa Ia faaalia Lona naunau e faamagalo o ia a o Ia valaaulia o ia e “alu ia oe, aua e te toe agasala” (Ioane 8:11).
Ta’u atu i lou aiga e te alofa ia i latou. Faaali atu lena alofa e ala i le faamagaloina o i latou ma faataga i latou e sui—e tusa lava pe o latou faaalia le ita ia te oe. E mafai e le alofa ona faia ai le eseesega atoa.
Motugaafa 3: Tatalo
O le tatalo e aumaia ai faamanuiaga a le Atua i o tatou olaga. I le Tusi a Mamona, na aoao mai ai Amoleka, “E ao ina outou sasaa atu o outou agaga i totonu o o outou afeafe, ma o outou nofoaga lilo, ma i o outou vao.
“Ioe, … ia tuu o outou loto ia faatumuina, ia alu atu pea ia te ia i le tatalo e le aunoa, mo lo outoou manuia, ma le manuia foi o i latou o e ua siomia ai outou” (Alema 34:26–27).
E mautinoa lava “o i latou o e ua siomia ai outou” e aofia ai lou aiga—e oo lava ia i latou atonu e le o nonofo faatasi ma oe i le taimi nei. O lea, tatalo faatasi ma lou aiga. Tatalo mo lou aiga. Tatalo ina ia mafai ona taofiofi lou ita pe a faaita oe e se tasi. Tatalo ina ia e iloa le ala e tali atu ai i tulaga faigata e oo mai i lou aiga. Tatalo mo se fesoasoani faalelagi. Tatalo mo ni taliega ma ni alofa se tele ia ulufale atu i lou aiga. Ona fai lea o mea uma e te mafaia ia tupu lena mea.
A o e taumafai e ola atoatoa i le talalelei a Iesu Keriso, o le a e iloa ai o le a faamanuiaina foi lou aiga. O le a faaitiitia finauga, ma o le a faateleina lou olioli.