“E Mafai e le Atua Ona Fesoasoani ia i Tatou i Taimi Faigata,” Mo le Malosi o le Autalavou, Mati 2022.
E Mafai e le Atua ona Fesoasoani ia i Tatou i Taimi Faigata
E silafia e Iesu Keriso le ala e fesoasoani ai ia i tatou taitoatasi, po o a lava o tatou tofotofoga.
Na Savali le Faaola i luga o le Vai, saunia e Walter Rane
Ou te manatua le lagona a o ou talavou, i le ola ai i le mea sa foliga mai o ni taimi faigata. Sa i ai se taua tele i le lalolagi. O alii talavou e matutua teisi atu ia te a‘u na fasiotia i le taua. Sa i ai vesiga faikegi i tuaoi lata ane. E lei muta lava le pa’ū o le tamaoaiga i le lalolagi atoa, ma e toatele tagata sa matitiva. Sa na o matou ma lou aiga le Au Paia o Aso e Gata Ai i le nuu sa matou nonofo ai.
Ae, sa ou fiafia ma talitonu o le a lelei mea uma. Sa aoaoina au, e pei o outou, o o tatou tofotofoga o se faamanuiaga faamoemoeina pe afai latou te liliu atu ai i tatou i le Tama Faalelagi ma le Faaola mo se fesoasoani.
Aisea e oo mai ai Tofotofoga?
O tofotofoga tatou te maua ai le avanoa taua e filifili ai e faatino le faatuatua. E mafai ona tatou ole atu i le tatalo mo se fesoasoani mai ia Iesu Keriso, o le e silafia le ala e fesoasoani mai ai ia i tatou. Sa Ia oo i tofotofoga uma o le a tatou feagai. Na te silafia lelei le ala e fesoasoani ai ia i tatou uma taitoatasi. Ma e alofa o Ia ia i tatou.
O le faamoemoega o luitau i le olaga o le vaai lea i mea o le a tatou filifili e fai. Pe o le a tatou faatinoina ea le faatuatua e tausi ai poloaiga ua Ia tuuina mai ia i tatou i soo se tofotofoga tatou te feagai? E faia e le aunoa e se Atua alofa le mea e sili ona lelei mo i tatou. E mafai ona Ia aveesea pe faaitiitia la tatou suega pe afai o le a faamalosia ai lo tatou faatuatua. O isi taimi, atonu Na te le faia.
A o e suesueina uluai olaga o perofeta i le Feagaiga Tuai ua e iloa ai le ala e fesoasoani mai ai le Alii ia i tatou i lea laasaga ma lea laasaga ina ia manumalo ai i tofotofoga faigata. Mo se faataitaiga, o le ala a le Alii na fesoasoani ai ia Iosefa ma Mose na aoaoina ai au i le ala e ole atu ai ma maua le fesoasoani i taimi faigata.
O Tofotofoga o Iosefa
O Iosefa, le atalii faapelepele o Iakopo, sa lafoina i se lua e ona uso ona faatau atu ai lea o ia e fai ma pologa i Aikupito. Sa ta‘u atu e ona uso i lona tama ua fasiotia o ia. A o avea Iosefa ma se auauna pologa, sa tuu atu e le Alii ia te ia le mana e faaliliu ai miti a Farao. Sa ia faaali atu ia Iosefa le auala e mafai ai e Aikupito ona taulimaina se oge i le lumanai. Na Ia tuuina atu ia Iosefa le malosiaga sili e tetee atu ai i faaosoosoga, ina ia tatalaina mai le falepuipui, ma i le 32 o ona tausaga ina ia faatu i le tofi maualuga e Farao. Sa fai atu Farao e uiga ia Iosefa, “Pe tatou te maua ea se tusa ma lenei tagata, o le ua iai le Agaga o le Atua?”1
O se lesona mo au mai le ala na fesoasoani ai le Alii ia Iosefa o le auala e mafai ai ona Ia fesoasoani ia i tatou i taimi faigata. A o faia pea e Iosefa ni filifiliga sa‘o, sa faamalosia e le Alii ia Iosefa, tuuina atu ia te ia mana faaleagaga, ma faamaluluina loto o tagata na siomia o ia.
Ua Vaai Mose ia Ieova, saunia e Joseph Brickey
O Tofotofoga o Mose
E faapena foi, o le fesoasoani a le Alii ia Mose i ona tofotofoga sa talitutusa ma Lana fesoasoani ia Iosefa. Na amata foi tofotofoga o Mose i lona talavou. Sa vavaeese Mose mai ona matua. O lana uluai tofotofoga o le tausia lea e le afafine o Farao. I le puipuia ai o se Isaraelu, sa ia fasiotia ai se Aikupito ma sa tatau ai ona sola i le toafa.
Sa faaali atu le Alii ia Mose ma valaauina o ia e laveai le fanauga a Isaraelu mai le nofopologa i Aikupito. O lena galuega e foliga mai e le mafai ona faia, o se tofotofoga na manatu Mose sa le mafai ona ia faia. O tofotofoga ma suega sili ona faigata o lou olaga e ono oo mai pe a tuuina atu ia te oe se galuega a le Alii e foliga mai e faigata tele ma e te lagona e te manaomia le fesoasoani a le Atua.
Na amata e le Alii i le tuuina atu ia Mose o le fesoasoani o le a e manaomia. Sa ia ta‘u atu ia Mose o Ia lea o le a faamalosia o ia i tofotofoga o i luma atu.
“O A‘u O Lē Ola: ma … e te fai atu i le fanauga a Isaraelu, o ia na auina mai au ia te outou.”2 Faatasi ai ma lena faamautinoaga, na maua ai e Mose le faatuatua ma le malosi mo le faasologa o tofotofoga i ona luma i lana galuega atofaina. E le gata ina sa valaauina o ia e le Alii ae o le a muamua atu le Alii i ona fofoga i ni auala faavavega.
Malamalama o le Lalolagi, saunia e Walter Rane
O Ou Tofotofoga
O taimi faigata o le a feagai ma oe ma au o le a tulaga ese. E leai ni olaga se lua e tutusa lelei. O tofotofoga e fetaui ia i tatou taitoatasi e ala i se Tama Faalelagi alofa ma Lona Alo Pele, o Iesu Keriso. O le ala La te tali mai ai i a tatou tatalo mo se fesoasoani o le a avea ma soo se mea e sili ona lelei mo i tatou. Mo nisi atonu o le faamalosia lea o i tatou, ma mo isi atonu o le tuuina mai lea ia i tatou o le olioli a o tatou tauivi i le faatuatua.
Mo i tatou uma, o le fesoasoani sili tatou te manaomia ao tofotofoina i tatou, i soo se auala ma po o le a lava le umi, o se faatuatua malosi lea ia Iesu Keriso. O le faatuatua lena na mafai ai e Iosefa ona faaliliu miti i Aikupito. O se faatuatua mautinoa ia Iesu Keriso lea na lototele ma faamalosia ai Mose i lona tofiga faigata e fesoasoani i le Alii e faasaoloto Lona nuu.
I lou talavou, ua uma ona tofotofoina outou i taimi faigata, e pei ona sa ou i ai. Ae e pei o au, ua aoaoina oe ia faalagolago ia Iesu Keriso. Ua ou iloa nei le pogai na ou lagonaina ai se talitonuga o le a lelei mea uma ma e oo lava i le olioli a o ou laitiiti. E le faapea sa ou faamoemoe i taimi ia lelei atili ai pe faigofie atu. Sa ou lagonaina le mautinoa afai o le a ou faatuatua ma auauna atu ia te Ia, o le a lelei mea uma.
Sa fai atu lo‘u tinamatua i lo’u tama e pepese faatasi ma ia a o agai atu i le fale ina ua uma ona ta‘u atu ia te ia o le a le pine ae maliu o ia i le kanesa: “A tatou oti ae le’i au i ai, … Ua lelei! Faafetai!”3 Ou te tuuina atu la‘u molimau e silafia e Iesu Keriso toetu le ala e fesoasoani ai ia i tatou taitoatasi, po o a lava o tatou tofotofoga. E manaomia na o le tatou ole atu ma le faatuatua ia te Ia.
E alofa Iesu Keriso ia te oe ma o le a fesoasoani ia te oe, i taimi uma, ma e tusa ai ma mea e sili ona lelei mo oe. Ou te molimau atu ai, ma le alofa tele ia te outou, ma mo Ia, i le suafa o Iesu Keriso, amene.